Faron nga mi dik ad’u Israel-lâ
1 Ma didina mi de mi Moise ala: 2 Ang de mi Israel-lâ, a hulong a vanguvora avok Pi-Hahirot aduk Mikdol kalum ma ngolâ ngagad’a yam Bäl-Sefon d’ar. Nata yi máma ba, agi vagi anguvora kua go kalum ma ngolâ. 3 Faron mba mi de yam Israel-lâ ala: A vid’a wa woi kur ambasa, fulâ mi duga wa abom kaziya. 4 An mba ni b’al hur Faron kiki. Mam mba mi digigi ad’ugiya, wani an mba ni mbut ni vama subura yam Faron ki azigar mama. Hina wani, azi mba wala an ni Ma didina. Israel-lâ a lahle suma Ma didina mi hazi vuna kazina.
5 Suma a mba, a de mamul ma Ezipte-na ala: Israel-lâ a ring wa. Ata yi máma Faron kazungeî mama djib’er mazid’a mbut kä yam Israel-lâ, a dala: Ei lei ni me hina ba, ei arei Israel-lâ a i ge? Ni kayam me ba, ei arazi á lei sun nda magomba d’uo ge! 6 Faron mi djin pus mam ma dur ayîna ad’u akulumeina, mi yo sum mama ad’um mi. 7 Mi i ki pus ma dur ayî ma djivi ma kalâ kikis karagaya ki pus ma ding ma dur ayî ma avo Ezipte-na pet mi, mi tin grang suma dur ayîna kam gagang mi. 8 Ma didina mi b’al hur Faron amul ma Ezipte-na kiki á dik ad’u Israel-lâ. Israel-lâ a buzu’î ad’u ad’enga hAlonid’a. 9 Ezipte-na kakulumeina pet ki pus ma dur ayîna hi Faron-na ki mam suma djang akulumeina ki azigar mama, a nga digizi ad’uziya, a tewezi ata yima azi vanguvora avun alum ma ngolâ abo ma Pi-Hahirot-na ngagad’a yam Bäl-Sefon d’arâ.
10 Kid’a Faron mi mba go ki sed’ezid’a, Israel-lâ a hle irazi akulo, a gol wani, Ezipte-na a nga djï blogoziya! Israel-lâ mandarâ vazi ngola, a nga tchi ki delezi akulo yam Ma didina. 11 A de mi Moise ala: Na ni yima tos matna nga avo Ezipte d’uo zu? Ni kayam me ba, ang yomï á tchid’a woi abagei hur fulâ ge? Ni kayam me ba, ang buzugumï woi avo Ezipte ge? 12 Gola! Wana ni zlad’a ami dangzï avo Ezipte ala: Ar ami lami sunda mi Ezipte-na. Ami lami sunda mi Ezipte-na hotei kal la ami bomi woi abagei hur fulâ d’a d’uo zu?
13 Moise mi hulong de mi Israel-lâ ala: Agi lagi mandar ri, agi kagagi ata yagi hina djang, agi mba wagi ini sut ta Ma didina mba mi sud’ugi inid’a. Kayam Ezipte suma agi wazi ini wana, agi mba wazi bugol luo d’a. 14 Ma didina mba mi dur ini kagiya, wani agi kagagi ni ki vunagi ma du’â.
Alona ge lovota kur alum ma ngolâ
15 Ma didina mi de mi Moise ala: Ni kayam me ba, ang tchi tchi máma kan hina ge? Ang de mi Israel-lâ a tchuk tazi tita. 16 Wani ang hle totogo manga, ang hlabong akulo yam alum ma ngolâ, ang walam mbei aduk mbà. Israel-lâ a mba kal kur alum ma ngolâ kasezi sod’a tchitching. 17 Wani anu, an nga ni b’al hur suma Ezipte-na kiki tala a tchuk tazi tita kä blogogi kur aluma d’a. An mba ni mbut ni vama subura yam Faron ki azigar mama pet ki pus mam ma dur ayîna ki mam suma djang akulumeina mi. 18 Ata yima an mba ni mbut vama subura yam Faron ki pus mama ki mam suma djang akulumeinina, Ezipte-na a mba wala an ni Ma didina.
19 Malaikana hAlona ma nga mi tit avok kangâ hi Israel-lîna, mi ge tam mi i blogoziya, d’ugul la tchola gongzong nga nga d’i tit avorozid’a, ti hulong ti tchol blogozi mi. D’ugul ndata ti tchol aduk kangâ hi Ezipte-na ki kangâ hi Israel-lîna, 20 nga d’i rumî yina yam suma dingâ, nga d’i b’o yina kur andjeged’a yam suma dingâ mi. Kayam ndata, kang ma mbà máma mi fe nga lovota á ngaf tam kur andjege ndata d’i.
21 Ata yi máma Moise mi hlabom akulo yam alum ma ngolâ. Ma didina mi keng mbina woi ki simet ma ad’eng ma abo ma yorogo ma sir kur andjege ndatina; mi so alum ma ngolâ woyo, mi wal mbina woi aduk mbà. 22 Israel-lâ a tchuk kä kur alum ma ngolâ kasezi sod’a tchitching. Mbina mi tchol lei ata abozi ma ndjufâ kabozi ma gulana d’igi gulumuna na mi. 23 Azigar suma Ezipte-na a nga digizi ad’uziya. Akulumeina hi Faron-na ki pus mam ma dur ayîna ki mam suma djang akulumeina a tchuk kä kur alum ma ngolâ blogoziya. 24 Ki yorogo tcholola, Ma didin ma nga aduk d’ugul la aku d’a nga tchola gongzongina, mi gol kangâ hi Ezipte-na, mi mbud’um batuwak. 25 Mi d’elezi abo pus mazi ma dur ayîna á djangâ, nga mi pret ti. Ata yi máma Ezipte-na a dala: Ei ringî woi avok Israel-lâ, kayam Ma didina nga mi duri kaziya!
26 Ma didina mi de mi Moise ala: Ang hlabong akulo yam alum ma ngolâ. Mbina mba mi hulongî kusa kä yam Ezipte-na, yam pus mazi ma dur ayîna, yam mazi suma djang akulumeina mi.
27 Moise mi hlabom akulo yam alum ma ngolâ. Kid’a yina ar go á fod’id’a, alum ma ngolâ mi hulongî kusa kä blangâm kad’enga bindit! Ezipte-na a nde tcha ringâ tata abo hep pa mi hebezi ped’eta. Wani Ma didina mi zud’uzi kä kur alum ma ngolâ atogo zak. 28 Mbina mi hulongî kusa kä, mi hlup pus ma dur ayîna ki suma djang akulumeina ki azigarâ hi Faron-nina pet. Suma a tchuk kä kur alum ma ngolâ bugol Israel-lîna, sa tu pî mi ar ri. 29 Wani Israel-lâ a nga tit kur alum ma ngolâ kasezi sod’a tchitching. Mbina mi nga tchola woi ata abozi ma ndjufâ kabozi ma gulana d’igi gulumuna na mi.
30 Kur bur máma Ma didina mi sut Israel-lâ; azi we matna hi Ezipte-na ki irazi samba kä avun alum ma ngolâ mi. 31 Israel-lâ a wad’enga hi Ma didina d’a mi dur ki Ezipte-na kazid’a, a ring mandara Ma didina, a he gagazid’a yam Ma didina kazong mama Moise mi.
© Azumeina Bible © Alliance Biblique du Tchad, 1999.
