Mbina mi djang ngei ata ahinad’a
(Gol Ndum 20.2-13)1 Ablaud’a hi Israel-lîd’a pet a tchol hur ful ma Sin-na á id’a d’igi Ma didina mi hazi vuna na, a vanguvora ata yima a yum ala Refidim-ma. Ata yi máma suma a fe nga mbiyo ma tched’a d’i, 2 a nde yalâ ki Moise, a dum ala: Ang hamï mbiyo ma tched’a.
Moise mi hulong dazi ala: Ni kayam me ba, agi yalandi ge? Ni kayam me ba, agi kugugi Ma didina ge?
3 Sum ndazina vun ma sod’a mi kal ataziya, a nga gureî yam Moise, a dum ala: Ni kayam me ba, ang buzugumï woi kur Ezipte á tchami woi ki vun ma sod’a ki gromina ki d’uwar mamina mi ge?
4 Moise mi nde tchina yam Ma didina, mi dum ala: An le ni nana ki sum ndazina ge? Ar hina nde tala azi durun kahinad’a d’a.
5 Ma didina mi hulong de mi Moise ala: Ang kal avok sum ndazina, ang yo suma nglo suma Israel-lâ ki sed’engû, ang hle totogo mang nga ang wat kalum ma Nil-lîd’a abongû, ang kal avogo. 6 Gola! An nga ni tchol sä avorong sä hî yam ahina d’a Horep-pa. Ang mba wat ahinad’a, mbina mba mi djang ngei irad’u, suma a mba tchumu. Moise mi le hina ir suma nglo suma Israel-lâ.
7 Mi yi yi máma ala Masa, mi yum ala Meriba mi, nala, Kuka ki Yalâ, kayam Israel-lâ a yal ki Moise, a kuk Ma didina mi, a dala: Ma didina mi nga adigei d’oze mi nga adigei d’uo zu?
Amale’â a mba, a dur Israel-lâ
8 Suma Amale’â a mba, a dur Israel-lâ ata yima a yum ala Refidim-ma. 9 Ata yi máma Moise mi de mi Josue ala: Ang man suma, ang nde á dur Amale’â. Ndjivin an mba ni tchol yam ahinad’a akulo ki totogod’a hi Ma didinid’a abonu.
10 Josue mi le d’igi Moise mi dum na, mi i á dur Amale’â. Moise azi ki Aron ki Hur a djak akulo yam ahinad’a. 11 Ata yima Moise mi hlabom akulona, Israel-lâ a kal yam Amale’â, wani ata yima mi gabom kä na, Amale’â a hulong kal yam Israel-lâ. 12 Moise abom kawa. Aron azi ki Hur a hlahinad’a, a tinimzi ad’umu, mi kak kad’u. Azi vum abom akulo, sa hî abo hî, sa hî abo hî. Abom mi ar sod’a ad’enga ngingring gak afata niga. 13 Josue mi kal yam Amale’â, mi tchazi woyo.
14 Ma didina mi de mi Moise ala: Ang b’ir ahle ndazina kur mbaktumba d’igi vama ge humba na, ang de mi Josue ala an mba ni dap Amale’â woyo; sa mba mi djib’er kazi d’uo d’a.
15 Moise mi min yima ngal ahle suma ngat buzuna, mi yum ala: Ma didina ni Bangâ mana. 16 Mi dala: Ma didina mi gun tam da’, mba mi dur ayîna ki Amale’â kur atchogoi d’a lara ge pet, kayam azi tchol huneîd’a ki sed’emu.
© Azumeina Bible © Alliance Biblique du Tchad, 1999.
