Suma ngat buzu suma a tinizi irazi vazina
1 Ma didina mi de mi Moise kua ala: Wana ni vama ang mba lum á tinizi irazi vazi tala azi kak á lan sun nda ngat buzuna d’a: Ang vamuhl ma gorâ tu, ang yo gamlâ ma bei dakina mbà 2 kavungô ma bei angufina ki woî ma bei anguf ma tib’egem ki mbulîna ki fangasu ma a lum ki mbulîna, ang lazi ni kafut ta adiged’id’a hi gemenid’a. 3 Ang tchuguzi kur kayad’a, ang mba ki sed’ezi zlapa kamuhl ma gorâ ki gamlâ ma mbà máma mi á he he d’a hawad’a. 4 Ang mba ki Aron azi ki groma avun zlub’u d’a ngaf tad’a, ang dazi ala a mbus abozi kasezi woi ki mbina. 5 Ang yo baruna, ang tchuk baru d’a krovo kä d’a ata Aron ki baru d’a ngol la fiyaka ki efod’a ki baru d’a didi’â, ang d’agam furum ki tali ma yam efod’ina. 6 Ang d’ud’um kadamula akulo kamu, ang hle lor ra kal teglesa bebed’ed’a, ang b’alamzi ata kadamul la avorom d’ara. 7 Ang hle mbul ma a tinim iram vama, ang vomzi kamu, ang tinim iram vamu. 8 Ang mba ki Aron groma, ang tchuguzi baru d’a nglod’a ataziya. 9 Ang d’ak Aron azi ki groma furuzi ki talina, ang d’ud’uzi kadamula kazi mi. Sun nda ngat buzuna ti arî mazid’a, ti arî gata kazi gak didin. Ni hina ba, ang tin Aron azi ki groma kur sun ndata.
10 Ang mba kamuhlâ avun zlub’u d’a ngaf tad’a. Aron azi ki groma a tin abozi kamu. 11 Ang ngat amuhl máma kä avogon an Ma didina avun zlub’u d’a ngaf tad’a. 12 Ang go buzuna hamuhlîna, ang yamam ki tchitchid’ang tu yam yima ngal ahle suma ngat buzuna kengêm ma djudjungûhlâ, ang vo buzu ma arâ kä ata kawei ma kä ad’u yima ngal ahle suma ngat buzunina pet mi. 13 Ang yo mbul ma yam aruwatnina pet, ang ngat aduduka vunat ma lelegem ma go ki b’orozombina ki b’orozomba zla tat djak ki mbul ma katna mi, ang ngalazi yam yima ngal ahle suma ngat buzuna. 14 Wani ang yo hliwa amuhlâ ki bagam ki sud’omu, ang i ngalazi woi bugol kangâ. Wana ni vama ngat buzu ma yam tchod’ina.
15 Ang veï gamlâ tu, Aron azi ki groma a tin abozi kamu. 16 Ang ngad’amu, ang go buzuna, ang vom abu huyok yima ngal ahle suma ngat buzuna pet. 17 Ang tchalam hliwim kä woi teteng, ang mbus aruwatna kasema woyo, ang tchuguzi yam hliu ma ang tchalam kä woi tetengâ ki yamba mi. 18 Ar ang ngalam mbei yam yima ngal ahle suma ngat buzuna ki zla tam pet. Wana ni vama ngat buzu ma ngala mi an Ma didina; ni vama his ma afufuîna avoronu.
19 Ang veï gamlâ ma mbàna, Aron azi ki groma a tin abozi kamu. 20 Ang ngat gamlâ máma, ang gom buzuwamu, ang dom ata Aron azi ki groma vun humazi d’a ndjufa, ata tchitchid’azi d’a abozi d’a modo d’a ndjufa, ki tchitchid’azi d’a asezi d’a modo d’a ndjufa mi, ang yam buzuna ad’um mba ara abu huyok yima ngal ahle suma ngat buzuna pet mi. 21 Ang go buzu ma yam yima ngal ahle suma ngat buzunina do ki mbul ma a tinim iram vama mi. Ang yamazi yam Aron ki baru mamba, yam groma ki baru mazina mi. Ni hina ba, ang mba tin Aron iram vam ki baru mamba, ang mba tin groma irazi vazi ki baru mazina mi. 22 Ang yo mbulâ hi gamlânina kandjawam ki mbul ma yam aruwatnina kaduduka vunat ma lelegem ma go ki b’orozombina, ki b’orozomba zla tat djak ki mbul ma katna kab’al ma ndjufâ mi, kayam ni gamlâ ma ngad’a yam tin nda a tin sana kur sundid’a. 23 Ang hle avungô ma a lum bei angufa ki woî ma a lum ki mbulîna ki fangasuna tu suma nga kur kaya d’a nga tinda avorondina. 24 Ang hazi abo Aron azi ki groma pet. A tagazi akulo abo hî abo hî avogon an Ma didina. Ndata ni he d’a hawa d’a taka. 25 Ang hulong vazizi aboziya, ang ngalazi yam yima ngal ahle suma ngat buzuna akulo yam vama hum á ngala woi petna. Wana ni vama ngat buzu ma ngala avogon an Ma didina; ni vama his ma afufuî ma lan tan djivid’ina mi. 26 Ang hle didik gamlâ ma mbà ma ang tin ki Aron iram vama, ang hlum abong akulo, ang tagam abo hî, ang tagam abo hî avogonu. Wana ni b’rau manga. 27 Ang hle didi’â kab’al gamlâ ma ang pad’am mbei adjï suma ang tagazi akulo suma ang tin ki Aron azi ki groma kur sundina, ang tinizi irazi vaziya. 28 Ahle ndazina a arî b’raud’a hi Aron azi ki gromid’a. Ti arî gat ta Israel-lâ a mba tit kat burâ ki burîd’a, kayam ni vun ahle suma pat suma Israel-lâ a mba pad’azi kur ahle mazi suma ngat buzu suma zlap darigï suma a mba handjï mi an Ma didinina.
29 Aron le mi mit wa ni, baru d’a a tinit irat vata mba d’i arî mi grom suma a mba vrak blangâm kur sundina. Azi mba tchugut atazi ni kur bur ma a mba tinizi irazi vazi á kal kur sun nda ngat buzunid’a. 30 Ma ngat buzu ma ngol ma mba mi vrak balum Aron-na mba mi tchugut atam gak burâ kid’iziya. Ata yi máma mam mba mi kal kur zlub’u d’a ngaf tad’a á le sun nda ngat buzuna ata yima kud’orina.
31 Ang yo hliu gamlâ ma a tinizi ki kur sundina, ang yum hliwim kur yima tu ma a tinim iram vama. 32 Aron azi ki groma a te hliu máma kavungô ma ar kur kayad’ina avun zlub’u d’a ngaf tad’a. 33 A tahle suma a mba ngad’azi mi an Alona á zlup yam tchod’ina kahle suma a mba ngad’azi á tinizi ki kur sundina, á tinizi ki irazi vazi mi. Ar sama nandjaf Aron nduo na mi tazi d’i, kayam nahle suma a tinizi irazi vazina. 34 Le hliu vama a ngad’am buzuna á tinizi ki kur sundina kavungôna a ar akulo gak yorogo ni, ang ngalazi woyo. Ar sa mi tazi d’i, kayam nahle suma a tinizi irazi vazina.
35 Ang le ki Aron azi ki groma d’igi an hang vuna na. Ang mba le ni burâ kid’iziya á tinizi kur sunda.
36 Ang mba ngat amuhlâ burâ ki burâ á zlup yam tcho magid’a. Ni hina ba, ang mba mbut yima ngal ahle suma ngat buzuna vama a tinim iram vama. Bugola, ang vo mbulâ kam á tinim iram vamu. 37 Ang mba le burâ kid’iziya á le sun ndata yam yima ngal ahle suma ngat buzuna, ang mba tinim iram vam mi. Yima ngal ahle suma ngat buzuna mba mi ka’î yima a tinim iram vam ma kal teglesâ, vama lara ma doma mba mi mbut ni vama a tinim iram vama mi.
Ahle suma ngat buzu suma ngalazi burâ ki burîna
38 Ma didina mi de kua ala: Wana nahle suma ang mba hazi yam yima ngal ahle suma ngat buzunina: Tumiyô suma bizazi tutuna mbàmbà burâ ki burâ gak didin. 39 Ang he yorogo tu, fladege tu mi. 40 Ata yima ang mba ki timi ma yorogona á ngatina, ang mba kafut ta adiged’id’a kilona tu ki nusa, mbul ma d’igila hirwilingâ nus lidirâ ki süm guguzlud’a nus lidirâ mi. 41 Ata yima ang mba ki timi ma fladegena á ngatina, ang mba kafut ta adiged’id’a kilona tu ki nusa, mbul ma d’igila hirwilingâ nus lidirâ ki süm guguzlud’a nus lidirâ mi. Ang ngalaziya. Ni vama his ma afufuîna avogon an Ma didina. 42 Ni vama ngat buzu ma ngal ma andjavagi ma bugolâ mba mi lum gak didina. Ar agi handji avun zlub’u d’a ngaf tad’a mi an Ma didina. Ni kua ba, an mba ni ngavagiya, an mba ni dagi zlad’a mi.
43 Ni kua ba, an mba ni ngaf ki Israel-lâ; yi máma mba mi mbut ni yima a tinim iram vama abo wile man nda wiwilika. 44 An mba ni mbut zlub’u d’a ngaf tad’a ki yima ngal ahle suma ngat buzuna nahle suma an tinizi irazi vazina, an mba ni mbut Aron azi ki groma ni suma an tinizi irazi vazina mi, kayam azi lan sun nda ngat buzuna. 45 An mba ni kak aduk Israel-lâ, an mba ni arî Alo mazina. 46 Azi mba wala an ni Ma didina Alo mazi ma buzuguzï woi kur ambas sa Ezipte-d’a á kak adigazina. An ni Ma didina Alo mazina.
© Azumeina Bible © Alliance Biblique du Tchad, 1999.
