Alona mi tak ad’eng mamba woi mi Moise
1 Moise mi hulong de mi Ma didina ala: A mba he gagazid’a kan ndi, a mba hum zla manda d’uo mi. A mba dan ala: Ma didina mi nde nga tam mbei irang ngi!
2 Ma didina mi dum ala: Ni me abong hi ge?
Mi hulong dum ala: Ni totogod’a.
3 Ma didina mi dum kua ala: Ang gat kä a ndaga! Mi gat kä ndaga, ti mbut guguina! Moise mi nde ringâ avoromu.
4 Ma didina mi dum kua ala: Ang mat abongû, ang vum andjawamu. Mi mat abomu, mi vumu; guguina mi hulong mi mbut totogod’a abomu!
5 Ma didina mi dum kua ala: Ang i le hina, wani azi mba he gagazid’a kang ala an Ma didina Alona habuyozi ngolona, Alona hi Abraham-ma, Alona hi Isa’â, Alona hi Jakob-ma, ni nde tan ndei irangû.
6 Ma didina mi dum kua ala: Ang tin abong didigangû. Mi tin abom didigamu. Bugola, mi hlum mbeyo; abom mi zak libina hapa mbû d’igi gagarad’a na!
7 Mi dum kua ala: Ang tin abong didigang kua. Mi hulong mi tin abom didigamu. Bugol mi hlum mbeyo; abom hulong mbut blangâm ma adjeuna!
8 Ma didina mi dum kua ala: Le a he nga gagazid’a kang nguo, le a hum nga zla manga yam vama simat ma avo’â d’uo mi ni, a mba he gagazid’a yam vama simat ma mbàna. 9 Le a he nga gagazid’a kang nguo, le a hum nga zla manga yam ahle suma simat suma mbà ndazina d’uo mi ni, ang gul mbiyo ma kur alumina, ang vom kä yam andagad’a; mbiyo ma ang gulumî kur aluma máma mba mi mbut buzuna.
Alona mi man Aron á djok vun Moise
10 Moise mi de mi Ma didina ala: Salad’a, an ndak ki! An ni sama nga ni de zlad’a atogo tchatchap puo na. Ad’u tinda ni kama d’oze ni kama hid’a d’oze nadjï dei d’a ang nga dan an azong mangâ zlad’id’a d’uo mi. Kayam vunan ki sinan a aneka á de zlad’a nadjeu dei.
11 Ma didina mi hulong dum ala: Ni nge ba, mi le vun sana ge? Ni nge ba, mi mbut sana ndumîd’a, d’oze ngela, d’oze ma wed’a, d’oze ma duka ge? Ni an Ma didina d’uo zu? 12 Ki tchetchemba, ang iya. An mba ni mbut vunangû, an mba ni had’ang vama ang mba duma.
13 Moise mi dum kua ala: Salad’a, an ndak ki! Ang sun sama dingâ!
14 Ata yi máma Ma didina hurum zal ata Moise, mi dum ala: Wiyengâ Aron ma hi Levi-na mi nga d’uo zu? An we nga mi de zlad’a atogo tchatchap. Gola! Mam tam nga mi djï á d’ugulongû; ata yima mi wangâ, mba mi le furîd’a kurum krovo. 15 Ang i dum zlad’a, ang vum ad’u zla d’a an dangzi wanda. An mba ni mbut vunang ki vunam mi, an mba ni had’agi vama agi mba luma. 16 Mam mba mi vrak blangâng á de zlad’a mi suma, mam mba mi mbut vunangû; ang mba vrak blangân an Alona á dum zlad’a mi. 17 Ang hle totogo ndata abongû. Ni ndat ba, ang mba le kahle suma yoyouna.
Moise mi hulong avo Ezipte
18 Moise mi hulong avo gen akunoma Jetro, mi dum ala: Ang aran an i gen b’oziyona avo Ezipte á golozi na ni a nga ni hawa ko zu?
Jetro mi hulong dum ala: Ang i lafiya.
19 Ma didina mi de mi Moise avo Madiyan ala: Ang hulong Ezipte, kayam suma pet suma a halang á tchid’ina a bo wa da’.
20 Moise mi vamamba ki groma, mi tinizi yam korona á hulong yam ambas sa Ezipte-d’a; mi hle totogod’a hAlonid’a abom mi. 21 Ma didina mi de mi Moise kua ala: Fata ang hulong Ezipte-d’a, ahle suma yoyou suma an hangzi abong wana, ang mba lazi avok Faron. Wani an mba ni b’alam hurumu, mam mba mi ar Israel-lâ á id’a d’i. 22 Ang i de mi Faron ala: Ma didina mi dala: Israel ni gorona, ni goron ma ngolâ. 23 An nga ni dangû, ang ar gorona mi iya, kayam mi lan sunda. Le ang aram mi i nga d’uo ni, an mba ni tchang gorong ma ngolâ woyo!
24 Kid’a Moise mi nga kur titid’a, mi mba kur yima dingâ tu, mi bur kä. Ata yi máma Ma didina mi mba atamu, nga mi halam á tchid’a. 25 Amamba Sefora ti hlahina d’a tena, ti ngat gorotna bayâd’a, ti do Moise asem ki babak d’iwamu , ti dum ala: Angî mandjuf ma buzuna kanu. 26 Ma didina mi aramu. Sefora ti dala: Ndjuf ma buzuna, ni kayam bayâ d’a ngata.
27 Ma didina mi de mi Aron ala: Ang i hur fulâ á ngaf Moise. Mi i ngaf Moise yam ahinad’a hAlonid’a, mi bed’em kok. 28 Moise mi väd’u zla d’a pet ta Ma didin ma sunuma mi dumzid’a mi Aron, kahle suma yoyou suma mi hum vuna kazi á led’ina pet mi.
29 Moise azi ki Aron a i tok suma nglo suma Israel-lâ pet. 30 Aron mi vazi ad’u zla d’a Ma didina mi dat mi Moise-sa pet, mi lahle suma ndandalâ kä avorozi mi. 31 Sum ndazina a he gagazid’a, a wala Ma didina mi mba wa gevezi á ndjunuziya, mi wazi wa ndak mazid’a. A tchuk guguvazi kä, a kud’uromu.
© Azumeina Bible © Alliance Biblique du Tchad, 1999.
