ALONA MI YI EZEKIYEL
Ma didina mi tak tam mbei mi Ezekiyel
1 Kur biza d’a dok hindid’a, kur bur ma vahlâ hi til ma fid’ina hi biza ndatina, kid’a an nga aduk suma a yozi magomba avun alum ma Kebar-rîd’a, akulo ti mal leyo, vana mi tcholï ata Alona, mi nde tam mbei iranu. 2 Ni kur bur ma vahlâ hi tilîna, ni biza d’a vahl hla a i kamulâ Jojakin magombid’a. 3 Ata yi máma Ma didina mi de zlad’a mi an Ezekiyel ma ngat buzuna Buzi goroma yam ambasa hi suma Babilon-nid’a avun alum ma Kebar-râ. Ni kua ba, Ma didina mi tin abom kanu.
4 Ata yi máma an gola, an we babar ma ngol ma bibi’â mi tcholï abo ma norâ ki d’ugul la ngola zlapa kakud’a, nga d’i wile ti ngui yina woi gevet d’uhl. Vana nga mi wile adigat d’igi kawei ma hleu ma a hegema na, mi nde woi aduk aku ndata. 5 An wahle suma arina fid’i aduk aku ndata. A buzugï woi kua, a hle tazi d’igi suma na. 6 Nge nge pî adigazi mi nga ki ira fifid’i, gigingâ fifid’i mi. 7 Asezi mi naduk hina d’ingêr, asezi ma tita ni d’igi asem gor amuhlâ na, nga mi wile d’igi kawei ma hleu ma a hegema na. 8 A nga kabona hi sana ad’u gigingâzi iram mbuta ata kengêzi ma fid’ina gagang. Nge nge pî mi nga ki ira fifid’i, gigingâ fifid’i mi. 9 Gigingâzi mi nga tinda avun tam tata. Ata yima a nga ina, a nga pret ti. Nge nge pî mi i nata yima mi nga vorom kuana. 10 Azi ki zla tazi d’a fid’id’a pet a nga ki ira hi sanid’a, azi ki zla tazi d’a fid’id’a pet a nga ki ira hazlonid’a abo ma ndjufâ, azi ki zla tazi d’a fid’id’a pet a nga ki ira hamuhlîd’a abo ma gulana, azi ki zla tazi d’a fid’id’a pet a nga ki ira hi b’arunid’a mi. 11 Wana ni iraziya. Gigingâzi ma mbà hina irambi ni sumota akulo. Nge nge pî gigingâm ma mbà hina mi ni tinda avun tam tata, ma mbà hina ni ma zlup ki tazina. 12 Nge nge pî nga mi i iram ata yima mi nga vorom kuana. A nga i nata yima muzu’â mi tagazizi á i kuana bei pret tazi ba. 13 Aduk ahle suma ari ndazina vana nga mi ngal d’igi aku d’a gordjona na, nga d’i trâ d’igi sina akud’a na. Nga d’i ngui aduk ahle suma ari ndazina, nga d’i yak kei ki wiled’a, wiled’a ti ndeï woi aduk akud’a. 14 Ahle suma ari ndazina a nga ringâ, a nga hulongî atogo zak d’igi wiled’a halonid’a na.
15 An gol ahle suma ari ndazina. An gol wani, vana hle tam d’igi abo pusâ na nga kä yam andagad’a go kahle suma ari suma fid’i ndazina ngad’a kazi tutu pet. 16 Abo pus máma a lum mi wile ni d’igi ahina krisolita na, ki zla tamba fid’id’a a lum nabo tam tu. Abo pus máma, ma lara pî a lumî kala kur tam kakal. 17 Ahle suma fid’i ndazina, ata yima a ina, a i nata abo ma fid’ina gagang bei pret tazi ba. 18 Fiyak mam mba akulod’a ni vama mandarâ, mam ki zla tam mba fid’id’a pet ni nguid’a woi ki ira d’uhl. 19 Ata yima ahle suma ari ndazina a ina, abo pus máma nga mi i ki sed’eziya; ata yima a pir akulo woi yam andagad’ina, abo pus máma mi pir akulo ki sed’ezi mi. 20 A nga i ata yima muzu’â mi tagizizi á id’ina. Abo pusâ nga mi i ki sed’ezi mi, kayam muzu’â hahle suma arinina mi nga kur abo pus máma. 21 Ata yima a nga ina, abo pus máma nga mi i mi; ata yima a tcholâ, abo pus máma mi tchol mi; ata yima mi pir rei akulo yam andagad’ina, abo pus máma mi pir rei akulo ki sed’ezi mi, kayam muzu’â hahle suma ari ndazinina, mi nga kur abo pus máma.
22 Vana mi nga akulo yam ahle suma ari ndazina d’igi hur alona na. Mam nga mi wile ni d’igi ahina kristala na, nga bara woi kazi akulo. 23 Ma lara pî gigingâm ma mbàna mi nga ganga woi ad’u hur alona kä aduk d’ingêr. Mi nga tinda avun tam tata, ma mbà hî na nazlup ki tazi mi. 24 Ata yima azi nga ina, an hum siwela hi gigingâzid’a d’igi siwela habil alum ma ngolîd’a na, d’igi dela hi Ma ad’engêm kal petnid’a na, d’igi siwela hi azigar suma ablau suma mimiyâ’îd’a na. Ata yima a tcholâ, a sumot gigingâzi kä. 25 Ata yi máma dela tcholï aduk hur alo ma nga akulo kazina. 26 Akulo yam hur alo ma nga kazina, vana hle tam d’igi ahina safira na, ang golomî d’igi zlam mba amula na. Akulo yam zlam ndata, vana ndeï kat hle tam d’igi sana na. 27 An we vama dingâ kua d’igi kawei ma hleu ma a hegem mbeina na. Nga mi ngal wiwilik, hle tam d’igi aku d’a nga d’i b’o yina woi gevet peta na. Tinï ad’ud’a kä ata ata vama he tam d’igi fur sana na na dei gak i kam akulo, tinï ad’ud’a ata furum dei gak i kä andaga, an we vama hle tam d’igi akud’a na b’o nguyum mbei d’uhl mi. 28 B’o d’a wile d’a nguyum mbei d’uhl ndata, ti hle tat ni d’igi virâ mi b’al alona ata yima nga mi sena na, ni vama hle tam d’igi subura hi Ma didinid’a na na.
Ata yima an huma, an ge tan kä avoromu. Bugola, an hum dela hi sanid’a ti dan zlad’a.
© Azumeina Bible © Alliance Biblique du Tchad, 1999.
