Filei ma tuwal ma kur gong nga kud’orina
1 Kur biza d’a karagayad’a bugol la a yomi magombid’a, kur bur ma vahlâ hi til ma karagayana, ata yima an nga kaka kä hur aziyana, suma nglo suma Juda-na a nga kaka kä avoron mi. Salad’a Ma didina mi tin abom kanu. 2 An nga ni gol yina. Gol wani, vana hle tam d’igi sana na mi nga tchola. Tcholï akulo ata furum dei gak i kä asem nakud’a, tchol ata furum dei gak i akulo kam vana nga mi wile d’igi kawei ma hleu ma a hegem mbeina na mi. 3 Mi mad’ï vana mi hle tam d’igi abona na, mi van tumus sa kanda. Kur vama ndum mbei ma mi tcholï ata Alonina, Muzu’â mi hlan ndei akulo aduk andaga kakulod’a, mi i tinin avo Jerusalem avun agrek ma krovona abo ma norâ, ni yima a tin nga filei ma Alona hurum nga mi zal kama kuana.
4 Gola! Subura hAlona hi Israel-lîd’a, ti nde tat tei iran ata yi máma. Ti hle tat d’igi ta an wad’ï ti nde tat tei iran kur horid’a na. 5 Alona mi dan ala: Ang gor sana, ang hle irang akulo abo ma norâ. An hle iran akulo abo ma norâ mi. Gol wani, filei ma Alona hurum nga mi zal kama mi nga tinda abo ma norâ avun agrek ma i ata yima ngal ahle suma ngat buzunina avun yima kala.
6 Mi dan kua ala: Ang gor sana, ang wahle suma azi nga lazi wana zu? Gola! Israel-lâ a nga lahle suma nglo suma ndjendjed’a á walan ndei ki gong man nda an tinit irat vata. Wan pî, ang mba wahle suma nglo suma ndjendje suma dingâ kua!
7 Mi mba ki sed’en avun yima kal ki hur atrangina, an gol yina. Gol wani, huyok gulumuna nga tchod’a. 8 Mi dan ala: Ang gor sana, ang hulut ir gulumuna. An hulut ir gulumuna mi. Gol wani, vun gonga nga. 9 Mi dan ala: Ang kal krovo, ang wahle suma ndjendje suma tcho suma a nga lazi ka hina.
10 An ni kala, ni gol yina. An wahle suma a hle tazi d’igi ahle suma a dram kä na na na kahle suma a hle tazi d’igi ahle suma ari suma ndjendjed’a na na ki filei ma Israel-lâ a ndjaram akulo huyok gulumuna a nguyum mbei d’uhlâ pet mi. 11 Suma nglo suma Israel-lâ dok kid’iziya a nga, adigazi Jäzaniya Safan goroma mi nga mi. Azi pet a nga tchola avok filei ma tetengâ, nge nge pî mi nga ki va mam ma ngal dubang ma his djivid’ina abomu, a nga ngal dubang ma his djivid’ina. Andosâ nga mi rip kazi kä ririp mi. 12 Mi dan kua ala: Ang gor sana, ang nga wahle suma suma nglo suma Israel-lâ a nga lazi kur nduvunda wana zu? Nge nge pî filei ma tcheta mi nga oîd’a kur gong mamba! Kayam azi nga dala: Ma didina nga mi wei d’i, Ma didina mi ar wa ambas sa wanda woyo.
13 Mi dan kua ala: Ang mba wahle suma nglo suma ding suma ndjendje suma a nga lazina kua d’ei.
14 Mi in avun agre’â hi gong mam mba kud’ora ma abo ma norîna. Gol wani, aropma a nga kaka kä, a nga tchi horâ yam alo ma a yum ala Tamus-sâ. 15 Alona mi dan ala: Ang gor sana, ang we d’ang zu? Ang mba wahle suma ding suma ndjendje suma nglo suma a kal suma wanina kua d’ei.
16 Mi in hur atrang nga krovo d’a avun gong mam mba kud’orid’a. Gol wani, andjofâ d’igi dok mbà yam vahl na a nga tchola avun gong nga kud’or ndata aduk yima kala ki yima ngal ahle suma ngat buzuna. A he huyogozi mi gong ndata, a mbut irazi abo ma yorogona, a grif kä abo ma yorogona avok afata.
17 Mi dan ala: Ang gor sana, ang we d’ang zu? Na ni ndjendje d’a Israel-lâ a nga lat ka hid’a ti ndagazi nga d’uo tua zu? A nga oî yam ambasa ki murud’umba á djiu hur man ma zala akulo, a nga hud’ï abo aguna atchinazi mi. 18 An mi, an mba ni lazi ki hur man ma zala na mi, an mba ni wazi hohowozi d’i, an mba ni djib’er kazi d’uo mi. Fata azi mba tchi ki delezi d’a ngola akulo humanda, an mba ni humuzi d’uo mi.
© Azumeina Bible © Alliance Biblique du Tchad, 1999.
