Esdras 7 - Azumeina Bible 1999 (MPG)

ESDRAS MI LE SUN MAMBA

Amulâ Artazerses mi he vuna yam Esdras

1 Bugol ahle ndazina, kid’a Artazerses amul ma Perse-na nga mi tamulid’a, Esdras mi tcholï Babilon, mi mba. Mam mi Seraya goroma. Azariya, Hilkiya, 2 Salum, Sadok, Ahitup, 3 Amariya, Azariya, Merayot, 4 Zeraya, Uzi, Buki, 5 Abisuwa, Fines, Elazar ki ma ngol ma ngat buzuna Aron, azi pet ni Esdras abuyom ngolo. 6 Mi tcholï Babilon, ni ma we mbaktumba, ni ma we gat ta Ma didina Alona hi Israel-lîna mi hat mi Moise-sina. Ma didina Alo mama mi nga ki sed’emu. Kayam ndata, amulâ mi hum ahlena pet suma mi tchenem kazina. 7 Israel suma hiuna, suma ngat buzu suma hiuna, suma hi Levi-na, suma hle sawala, suma a ngom vun gongîyonina ki suma Netin-na, a mba Jerusalem ni kur biza d’a kid’iziyad’a hamulâ Artazerses-sa. 8 Esdras mi mba Jerusalem mî kur til ma vahlâ kur biza d’a kid’iziyad’a hamulâ Artazerses-sa. 9 Mi tcholï Babilon á i Jerusalem mî kur bur ma tuna hi til ma avo’â, mi mba Jerusalem mî kur bur ma tuna hi til ma vahlâ, kayam Alo mam ma djivina iram nga tinda kamu. 10 Kayam Esdras mi he tam á wäd’u zlad’a hAlonid’a, á tit yam gata hAlonid’a, á hat Israel-lâ yam gata hAlonid’a ki vun ma he ma tetengâ mi.

Sunda amulâ Artazerses mi hat mi Esdras-sa

11 Wana ni mbaktum mba amulâ Artazerses mi hat mi Esdras ma ngat buzu ma we gatina, ni ma nga mi hat vun ma he ma Alona mi hum mi Israel-lîna:

12 An Artazerses, amulâ hamuleinina, an ni he mbaktum mba wanda mi ang Esdras ma ngat buzu ma we mbaktum ma we gata hAlo ma akulona.

13 An ni he vuna ala a arang lovota ang i ki Israel-lâ ki mazi suma ngat buzuna ki mazi suma hi Levi suma a nga kur leu mandina pet suma a tin huruzi á i Jerusalem-ma. 14 An ki man suma de d’al suma kid’iziyana, ami sunung sä Juda ki Jerusalem á gol na ni suma a nga tit ni d’igi gata hAlo mangâ d’a nga abonga de hina ko zu? 15 Ang i ki bege d’a hapa ki lora suma an ki man suma de d’alâ ami hamizi kur min mamid’a mAlona hi Israel ma yam ma kaka nga avo Jerusalem-ma. 16 Ang i ki bege d’a hapa ki lora pet suma ang mba fazi yam andaga d’a Babilon-ndina, ki he d’a hawa d’a suma ki suma ngat buzuna a mba hat kur min mazid’a yam gong nga kud’ora hAlo mazina d’a nga Jerusalem-mba mi. 17 Kayam ndata, ang ngom bege ndata djivid’a, ang gus amuzlei suma andjofâ, gamlâna, gro tumiyôna kahle suma ndak yam he d’a hawa d’a afutina, ki d’a süm guguzlud’a kahle suma ndak á he he d’a hawad’ina, ang hazi yam yima ngal ahle suma ngat buzuna kur gong nga kud’ora hAlo magina d’a nga Jerusalem-mba. 18 Bege d’a hapa ki lora suma a arâ, agi ki b’oziyongâ lagi ki sun nda djivi d’a ndak iragi á led’a kur minda hAlo maginid’a. 19 Ang tchuk ahle suma a hangzina kä avok Alo ma nga Jerusalem-ma á le ki sun gong nga kud’ora hAlo mangîd’id’a. 20 Ang mba yo beged’a hamulâ d’a ndak ang bazat yam ahle suma ding suma ndak yam gong nga kud’ora hAlo mangîd’ina.

21 An amulâ Artazerses ni he vuna mi agi suma ngom beged’a pet suma sä abo alum ma Efrat-na abom ma fladegenina ala agi hagi beged’a nenet mi ma ngat buzuna Esdras ma we mbaktum ma we gata hAlo ma akulonina kahlena pet suma mam mba mi djobogi kazina. 22 Agi hum bege d’a hapa ndak ir kilona 30.000, gemena kilona 30.000, süm guguzlud’a lidirâ 4000, mbulâ lidirâ 4000, ndjuvuna ni kur min magid’a. 23 Ar vun ma hed’a pet ma Alo ma akulona mi huma, a le sunda kam memet yam gong nga kud’ora hAlo ma akulona tala ar hurum mi zal yam leu manda ki grona d’uo d’a.

24 Kayam ndata, ami nga vagi ad’ud’a woi ala ar agi vagi bege d’a ngat yam sumid’a, d’oze tara, d’oze bege d’a a i kakoid’id’a, abo suma ngat buzuna, d’oze abo suma hi Levi-na, d’oze abo suma hle sawala, d’oze abo suma a ngom vun gongîyonina, d’oze abo suma Netin-na ki magumei suma a le sunda kur gong nga kud’ora hAlonid’ina d’i.

25 Ang Esdras, ata ned’a Alona mi hangzid’a, ang tin suma ka sariyad’a ki suma nglona á ka sariyad’a hi suma pet suma sä abo alum ma Efrat-na woi hina ki suma a we gata hAlo mangîd’ina, ang tagat mi suma a wat nga d’uo na mi. 26 Sama lara pî ma nga mi tit yam gata hAlo mangîd’a ki gat man an amulîd’a memet tuo na, a mba kam sariyad’a kam a tchum mbei d’oze a digim mbei d’oze a hurumum ahligiyem mboze a gum dangeina.

Esdras mi le mersi mAlona

27 Esdras mi dala: Lei mersi mi Ma didina Alona habuyoi ngolo ma mi mal djib’era hamulîd’a woi mi min gong nga djifâ hi Ma didinid’a avo Jerusalem-ma. 28 Ni ma iram nga tinda kan mi mbud’un djivid’a avok amulâ ki mam suma de d’alâ ki mam suma sun suma ad’engîna, ni ma ad’eng mamba nga ki sed’en an tok nglo suma Israel-lâ á i ki sed’ena.