1 Wana ni zla d’a Ma didina mi tagat tei mi mam ma djok vuna Habakuk-ka:
Habakuk nga mi tchi yam bateid’a hi sumid’a
2 Habakuk mi dala:
Ma didina, ni gak mindja ba,
an nga ni yang á ndjunumiya,
wani ang nga humumi d’uo ge?
An nga ni yang yam huwak ka kamid’a,
ang min á sud’umi d’i.
3 Ni kayam me ba, ang aran an nga ni gol tchod’a,
ang nga gol djop vuna ki irang na ge?
Hurumba ki huwaka a nga avoronu,
ayîna ki yalâ a tchol akulo mi.
4 Ni kayam ndata ba, gata mbut ab’lenga,
d’ingêra ad’engêt nga d’uo mi.
Kayam ma tchona nga mi kus yam ma d’ingêrâ;
sariya d’a kad’a pî, d’ingêra nga kua d’uo mi.
Ma didina mi hulong humba mi sum mama
5 Ma didina mi de mi sum mama ala:
Gologi andjaf suma nguyugina,
agi mba lagi atchap
kayam an mba ni le sunda kur atchogoi magid’a;
le sa mi dagizi zlat pî,
agi mba hagi gagazid’a kat ti.
6 Gola! An nga ni yï suma Babilon-na á te yam suma;
ni suma asa’at suma lahlena bei djib’era ba na,
ni suma a nga bine abozi yam ambasa
á yo ambas sa nga ni mazid’a d’uo d’a.
7 Azi ni suma tcho suma kal lei papa suma
suma a nga lazi mandarazina,
kur subur ta mazid’a gat mazid’a tcholî ata azi tazid’a.
8 Akulumei mazina a djang kal bolina,
ayî mazina kal ngû ma meid’a nga d’i tchum fladegena.
Suma djang akulumei mazina
a tcholï nata yima deina,
a nga pir akulo,
a pirî d’igi b’aru ma sir asem kä á ve vanina na.
9 Sum ndazina pet a mba ná te leud’a kad’enga,
a nga i irazi avogovogo.
A nga yo suma magomba d’igi lesâ na.
10 A nga las amuleina,
a nga san ad’u suma nglona;
gulumun ma ad’eng ma d’elezina nga d’i.
Azi nga mbu andagad’a ad’um akulo,
a nga tup kam á dik azì máma.
11 Ad’engêzi nga d’i i avogovogo,
nga d’i kal d’igi simetna na;
ad’engêzi nalo mazina.
Habakuk nga mi tchi avok Alona kua
12 Habakuk mi de kua ala:
Ei dedei angî Ma didina
Alo man ma bei tchod’a,
ang nga mit ti.
Ma didina, angî ahina manda,
ang tin suma djangû ndazina,
ang hazi ad’enga á gad’amiya.
13 Ang irangî bei tchod’a ba
nga d’i min gol tchod’a d’i,
ang ndak á gol sama djop vun suma d’uo mi.
Ni kayam me ba, ang nga gol suma mbut ira hina tä ge?
Ni kayam me ba, ang kak hina tchugot
ata yima sama tchona nga mi le
sama kalam ki d’ingêrina ndakina ge?
14 Ang nga le suma ni d’igi azi ni kulufâ na,
d’igi ahle suma dram kä suma salazi nga d’uo na na zu?
15 Suma Babilon-na a nga yo suma akulo
ki tunglîd’a d’igi suma a vik kulufâ na,
a nga tanazi kabei mazina,
a togozi kur koli mazina,
ata yi máma a nga le furîd’a ki hur ma hapma.
16 Kayam ndata, a nga ngat buzuna mabei mazina,
a nga ngal dubang ma his djivid’ina mabei mazina á lum ad’umu.
Kayam ni mam ba, nga mi vigizi kuluf ma djivi ma mbulâ;
te mazina nga mi zul mi.
17 Na ni a mba i avogovok á pat mbigeu mazi d’a fiyaka,
á tchi andjaf suma bei wazi hohowozi zu?
© Azumeina Bible © Alliance Biblique du Tchad, 1999.
