Melkisedek amul ma ngat buzuna
1 Kayam Melkisedek máma namul ma Salem-ma, ni ma ngat buzuna mAlo ma kal teglesâ. Kid’a Abraham nga mi hulong avo bugol kus sa mi kus yam amuleinid’a, Melkisedek mi ngavam mi b’e vunam kamu. 2 Abraham mi pad’am vun ahlena tutu pet, nala, dogo mam hum tu, dogo mam hum tu. Melkisedek, ad’u simiyêm nala Amul ma d’ingêrâ; kal pet mam namul ma Salem-ma, nala Amul ma b’leng nga halasa. 3 Mam mi ma abum nga d’i, asum nga d’i, ad’u andjavam nga d’i, bur mam ma vuta nga d’i, nga mi mit tuo mi na. Mi hle tamî d’igi Alona Goroma na, mam mi Ma ngat buzuna gak didin.
4 Agi gologi ngola hi sa mámid’a. Ni ma abui ngolo Abraham mi pad’am vun ahle suma dodogo suma mi hurumuzï ata yima ayînina. 5 Wani kur vun ma hed’a hi Gata hi Moise-sina, suma ngat buzu suma ad’u andjafâ hi Levi-na, a nga ve vun ahle suma dodogona abo Israel-lâ, nala, b’oziyozina. Wani azi tazid’a nandjafâ hi Abraham-ma mi. 6 Wani Melkisedek ma ala nandjavazi d’uo na, mi ve vun ahle suma dodogona abo Abraham ma Alona hlum vunama, mi b’e vunam kam mi. 7 Bei gigrita ba, sama b’e vunam yam ndramina, mi kal ma mam b’e vunam kama. 8 Suma hi Levi suma a nga ve vun ahle suma dodogona abo sumina, ni suma a nga ad’u ad’enga hi matnina. Wani d’igi mbaktumba hAlonid’a ti de na ala Melkisedek ma ve vun ahle suma dodogonina ni ma a nga le glangâsâ kam ala ni ma bei matna na. 9 Ndak á ded’a hina ala Levi tam ma ve vun ahle suma dodogona abo sumina, mi he vun ahle suma dodogona d’igi Abraham mi he na mi. 10 Wani ata yima Levi mi nga kur abum ngolo bei vuta tua na, Melkisedek mi ngaf ki Abraham.
11 Sun nda ngat buzuna d’a a hat mi suma hi Levi-nid’a, nad’u tinda hi gat ta Alona mi hat Israel-lîd’a. Wani ladjï sun mazi d’a ngat buzuna ti nda’î memed’u ni, ni kayam me ba, a hal ma ngat buzu ma ding ma d’igi Melkisedek na ba, nga d’igi Aron na d’uo ge? 12 Wani le a mbut sunda hi suma ngat buzunid’a kä ni, mbeî a mbut gata kä mi. 13 Wani Salei ma a de zla ndata kama mi nad’u andjaf ma dingâ. Sa tu ad’u andjavam mi le nga sun nda ngat buzuna avok Alona d’i. 14 Kayam ei wei tetet ala Saleina mi ndeï nad’u andjafâ hi Juda-na, wani Moise mi de zlad’a hi suma ngat buzunid’a ni yam andjaf máma d’i.
Ma ngat buzu ma hle tam d’igi Melkisedek na na
15 Kayam ei wei tetet ala ma ngat buzu ma dingâ mi nde tam mbei pid’ak mi hle tam d’igi Melkisedek na. 16 Wani mam mbut ma ngat buzuna ni yam minda hi sumid’a d’i, wani mi mbut ma ngat buzuna ni kad’enga hari d’a bei dabid’a ba d’a. 17 Kayam Alona mi de woi kam kur mbaktum mamba ala:
Angî ma ngat buzuna gak didin
d’igi Melkisedek na.
18 Kayam ndata, vun ma he ma avo’â mi mbut vama hawana, kayam ad’engêm nga d’i, djivi mamba nga d’uo mi. 19 Kayam gata hi Moise-sa ndak á le vama ndak memetna d’i, wani vama ei tini huri kam ma kal teglesâ mi mba wa. Kayam mamu, ei hud’i go gen Alona.
20 Mi mbut ma ngat buzuna ni yam gun tad’a hAlonid’a. 21 Wani suma hi Levi-na a mbut suma ngat buzuna bei gun tad’a. Wani Jesus mi mbut ma ngat buzuna ni yam gun tad’a ata yima Alona mi de woi kam ala:
An Ma didina ni gun tanu,
nga ni djok vunan ndi:
Ang mba mbut ma ngat buzuna gak didina.
22 Kayam ndata, Jesus ni Ma gabei ki vun ma djin ma awili ma djivi ma kal teglesâ.
23 Gagazi, suma ngat buzuna nablaud’a, wani matna mi d’elezi lovota á i avogovok kur sun mazid’a. 24 Wani Jesus ni Ma nga kaka gak didina. Sama ding ndak á vrak blangâm kur sun nda ngat buzuna d’i. 25 Kayam ndata, mi ndak memet á sut suma a nga mba gen Alona ki simiyêma gak didin, kayam mam nga karid’a teteu á tchen Alona kaziya.
26 Jesus ni Ma ngol ma ngat buzu ma ndak memet keina, ni Ma d’ingêrâ, ni Ma bei zlad’a kama, ni Ma bei le tchod’a ba na. Alona mi walam mbei ki suma le tchod’a, mi hlum sä kur akulod’a gevemu. 27 Wani Jesus mi le nga d’igi suma nglona hi suma ngat buzuna suma dingâ na d’i. Azi ni suma a nga ngat buzuna burâ ki burâ yam tcho mazid’a avogo, bugol yam mba hi sumid’a mi. Wani ata yima mi he tam mbei vama ngat buzuna yam tchod’a hi sumina, mi le hina ni yam tu. 28 Kayam gata hi Moise-sa ti tin suma amangeîna suma nglona hi suma ngat buzunina. Wani gun nda Alona mi gun tam bugol gatid’a, ti tin Gorâ ngol ma ngat buzu ma ndak memetna gak didin.
© Azumeina Bible © Alliance Biblique du Tchad, 1999.
