Hur ma tinda ki leu d’a Israel-lâ a dap peyo
1 Adjeu Israel-lâ a ni guguzlu
d’a djivid’a vut heîd’a.
Le d’i vut ngola kala ni,
a min yima ngal ahle suma ngat buzuna ablaud’a kal mi.
Le ambas mazid’a ti mbut ambas sa djif fa heî d’a kala ni,
azi tin ahle suma ge humba teteng kal mi.
2 Azi mbut suma hur ma mbàmbàna,
a mba zi tcho mazid’a kaziya.
Ma didina mba mi b’lagazi yi mazi
ma ngal ahle suma ngat buzu ma tetengâ kä woyo,
mba mi b’lagazi ahle mazi suma azi
tinizi á ge humbina woi mi.
3 Ki tchetchemba, a nga dala:
Ei nga kamul li,
kayam ei nga lei mandara Ma didina d’i.
Na ni amulâ mba mi le ni nana kei ge?
4 A nga de zla d’a hawa yaka,
a nga gun tazi gun nda ka zlad’a,
a nga djin vunaziya,
wani sariyad’a mba d’i zul kazi
d’igi asu ma tchona mi zul hur asinena na.
5 Suma Samari-na a mba le mandarâ
abo gor amuhl ma yor ma Bet-Aven-na.
Suma a mba yor tazi kamu,
suma ngat buzuna a mba tchi kam
kayam subur mamba dap pei da’.
6 A mba i ki sed’em
he d’a hawad’a mamul ma ngol ma Asiri-na.
Suma Efraim-ma a mba tchuk susub’ok,
Israel-lâ a mba mbut zulona
yam nga hur mazina mi.
7 Samari kamul matna a mba kal lei
d’igi agu ma gorâ mi dol akulo yam mbina na.
8 Yima nding ma teteng ma a tinim iram vam ma Bet-Aven
ma Israel-lâ a le tchod’a kuana,
a mba b’lagam mbeyo.
Kekerezeuna kaweid’a a mba deî
ata yi mazi ma ngal ahle suma ngat buzu ma tetengâ.
A mba de mahuniyôna ala: Agi ngeyemiya,
a mba de mi yima nding ma tetengâ ala:
Ang dris kä kamiya.
Israel-lâ a mba dut vama azi zarama
9 Ma didina mi dala:
Agi Israel-lâ, agi lagi tchod’a avo Gibeya adjeu dei,
gak ini agi nga igi avogovok kur tchod’a.
Na ni ayîna mi nde nga yam suma tchona
avo Gibeya d’uo zu?
10 An mba ni tozi d’igi hurun min na.
fata an tozi yam tcho mazi d’a azi dugud’ot led’id’a,
suma a mba tok tazi á duruzi mi.
11 Suma Efraim-ma a ni d’igi amuhl hla wei
d’a a had’at djivi d’i d’a min to awunid’a na.
Wani an mba ni gat dju’â ata delet ta djivid’a,
an mba ni zlubut ahlena huyogot mi.
Suma Juda-na a mba zuma,
suma hi Jakob-ma a mba tan hersena mi.
12 Agi zaragi d’engzenga, agi mba dud’ugi djivid’a,
agi zumugi asine ma awilina mi.
Yina mba wa tala agi hulongôgï gen an Ma didina
gak an vogi suta kagi d’igi mbina na d’a.
13 Wani agi zaragi ni tchod’a,
agi dud’ugi ni sun nda d’ingêr ruo d’a,
agi tagi vud’a zla d’a kad’a.
Agi tinigi hurugi ni yam pus magi ma dur ayîna,
yam ablaud’a hi azigar maginid’a mi.
14 Kayam ndata, siwel la ayîna
mba d’i tchol aduk sum magina,
azì magi ma ad’eng ma ngunguna pet
mba mi b’lak keyo,
mba mi b’lak kei
ni d’igi Salman mi b’lak Bet-Arbel
kur bur ma ayî ma mi ndjirep asud’a ki grotna woina na.
15 An Ma didina nga ni dagiya:
Agi suma Betel-lâ,
an mba ni le ki sed’egi ni hina dedege
yam asa’at magi d’a ngol la kala,
a mba tchamul ma Israel-lâ tchi tua ba yina fo.
© Azumeina Bible © Alliance Biblique du Tchad, 1999.
