Andjaf ma mbut ira
1 Suma Efraim-ma a nguyun kä ki zla d’a kad’a,
andjaf suma Israel-lâ a nguyun kä ki mbut ira.
Suma Juda-na a nga zlapa ki an Alona tua,
a ni suma d’engzengâ avogon an Alo ma bei tchod’a ba na mi.
2 Suma Efraim-ma a te ni simetna,
a nga tit bugol simet ma abo ma yorogonina.
Burâ ki burâ a de ni zla d’a kad’a,
a nga hurum ahlena,
a djin vunazi ki suma Asiri-na,
a nga i ki mbulâ avo Ezipte mi.
3 Ma didina mi nga ki zlad’a ki suma Juda-na.
Mba mi mba á ngop suma hi Jakob-ma yam tit mazi d’a tchod’a,
mba mi wuragazi yam sun nda tcho d’a azi lata.
4 Jakob mi veï dodogasem wiyema ni kur asum dei.
Ata yima mi djeng sanina,
mi ndjiget kAlona.
5 Jakob mi ndjiget ki malaikana, mi kus kamu,
mi tchenem ala mi b’e vunam kamu.
Jakob mi fum sä Betel.
Ni kua ba, Alona mi de zlad’a ki sed’emu.
6 Ma didina Alo ma ad’engêm pet
ma simiyêm ala Ma didina na,
7 mi de mi Jakob ala:
Ang hulongî gen an Alo mangâ mbeî,
ang le djivid’a, ang tit yam d’ingêra,
ang tin hurung kan an Alo mangâ burâ ki burâ mi.
8 Agi suma Efraim-ma, agi ni suma mbut abogina,
kilo ma mbut ira mi nga abogiya,
agi minigi ni mbut ir suma tu.
9 Agi nga dagi ala:
Gagazi, ami ni suma ndjondjoîna,
ami fami ahlena ngola.
Wan pet ni sun nda ami lat kabomid’a,
a mba fe vama tcho tu pî avo hatami d’i.
10 Wani an ni Ma didina Alo magina
ei kur ambas sa Ezipte-d’a dei gak ini.
An mba ni hulong ni kagagi kur zlub’ud’a
d’igi a le kur bur ma vun til ma ngama na.
11 An de zla manda mi suma djok vuna,
an ar ahlena a nde tazi woi irazi teteng,
an de zlad’a woi ki d’ogolâ
mi suma djok vuna mi.
12 Suma Galät-na ni suma tchona.
Gagazi, azi tazi a mba mbut ni vama hawana.
A nga ngat amuzleina buzuna avo Gilgal burâ ki burâ,
wani yi mazi ma ngal ahle suma ngat buzu ma tetengâ
mi mbut ni d’igi ahina d’a nga mola hur asinenid’a na.
13 Jakob mi ring yam andaga d’a Aram-mba,
mi le sunda yam atchad’a,
ni yam atchad’a ba, mi pol aho’â.
14 Nata ma djok vuna ba,
Ma didina mi buzugï Israel-lâ woi avo Ezipte,
ni ma djok vun máma ba, mi ngom Israel-lâ.
15 Suma Efraim-ma a zal hur Ma didina ngola,
Salazina mba mi hulongôzi tcho mazi ndata kaziya,
mba mi hulongôzi sun mazi d’a zulona kazi mi.
© Azumeina Bible © Alliance Biblique du Tchad, 1999.
