Israel suma a hat hat ta tchod’ina
1 Ma didina mi de kua ala:
Agi suma ngat buzuna, agi humugiya,
agi suma avok Israel-lîna, agi tinigi humagiya,
agi suma avo hamulîna, agi humugiya,
kayam sariya d’a ka ndata ni kagiya,
kayam agi mbud’ugi ni dau ma yam sum manina avo Mispa,
agi mbud’ugi nabei d’a gunda kä yam sum manid’a yam ahina d’a Tabor-ra,
2 agi mbud’ugi ni zul la yiyik ka tchi matna avo Kitim mi.
Wani an Ma didina mba ni ngobogi ki zla tagi pet.
3 An we suma Efraim-ma,
Israel-lâ a nga vita iran nduo mi.
Wani ki tchetchemba, agi suma Efraim-ma,
agi mbud’ugi tagi gaulangâ,
Israel-lâ a mbut tazi ndjendjed’a mi.
4 Sun mazid’a nga d’i arazi lovota
á hulongî gen an Alo mazina d’i,
kayam muzuk ma gaulangâ mi nga adigaziya,
kayam azi wan nga an Ma didina d’i.
5 Yam mba ad’enga hi Israel-lîd’a
nga d’i le glangâsâ kaziya.
Kayam ndata, Israel-lâ ki suma Efraim-ma
a mba puk kä yam tcho mazid’a
zlapa ki suma Juda-na mi.
6 Azi mba i ki tumiyô mazina kamuzlei mazina
á halan an Ma didina,
wani azi mba fan ndi,
kayam an wal tan ndei dei ki sed’eziya.
7 Azi mbud’un iranu,
a vut ni gro suma nga ata yazi d’uo na.
Ki tchetchemba, ar tilâ tu a mba b’lagazi ahle mazina woyo.
Ayî ma dur ma aduk suma Efraim-ma ki suma Juda-nina
8 Agi bugi adifa avo Gibeya,
agi bugi adif fa ngola avo Rama,
agi eregi ad’ugi akulo avo Bet-Aven.
Agi suma Benjamin-na,
agi gologi blogogiya!
9 Suma Efraim-ma a mba mbut vama b’laka
kur bur ma an ngobozina.
Zla d’a an nga ni dat mandjafâ hi Israel-lîd’a
ni zla d’a gagazi d’a mba d’i led’a.
10 Amulei suma Juda-na
a ni d’igi suma a djok agu ma ir hagad’a woina na,
wani an mba ni vozi ayî mana kazi d’igi mbina na.
11 A le suma Efraim-ma tchod’a,
a mired’ezi kä kur sariyad’a
kayam azi ringî bugol ahle suma hawa ya’â.
12 An mba ni mbut d’igi fotna na
yam suma Efraim-ma,
d’igi ndjuvul ma mut sïna na
yam suma Juda-na mi.
13 Suma Efraim-ma a we tugud’ei mazid’a,
suma Juda-na a we mbil mazina.
Suma Efraim-ma a ge sunda
ata amul ma ngol ma Asiri-na.
Wani amul máma mi nga kad’enga á sud’uzi
d’oze a hazi kumana yam mbil mazina d’uo mi.
14 Kayam an mba ni mbut ni
d’igi azlona na yam suma Efraim-ma,
d’igi azlo ma azongâ na yam suma Juda-na,
an mba ni kizaga, ni ge tan ni iya,
an mba ni ve va,
sama mba mi prud’um abona nga d’i.
A mba hulongî gen Alona zu?
15 Ma didina mi dala:
An mba ni iya,
an mba ni hulong ata yan ma kaka
gak azi we tcho mazid’a,
gak azi mba mba á wan iranu.
Fata azi nde kur ndakid’a,
a mba halan ki hur ma hata.
© Azumeina Bible © Alliance Biblique du Tchad, 1999.
