1 Agi mba dagi ala:
Agi mbeyegïya, ei hulongeî gen Ma didina.
Mam ma kizagei mbuleinina, mba mi tchiliya,
mam ma toina, mba mi djini mbiliya.
2 Kur bur ma mbàna mba mi tchiliya,
kur bur ma hindina mba mi tcholei akulo,
ei mba kagei ki irei avoromu.
3 Ei weya, ei halei lovota á we Ma didina,
ei wei ala nga mi mba gagazi d’igi yima fod’a na,
nga mi mba kei d’igi mbiyo ma hle yinina na,
d’igi alo ma hod’ogei ma mi rap yam andagad’ina na.
4 Ma didina mi dala:
Agi suma Efraim-ma, an lagi ni nana ge?
Agi suma Juda-na, an lagi ni nana ge?
D’engzeng magid’a ni d’igi amborogei d’a ge yorogod’a na,
d’igi mbad’ï d’a ti ge yorogo d’a ti kak ndjö ti gas seid’a na mi.
5 Kayam ndata, an nga ni zut suma djok vuna á togiya,
an nga ni tchagi ki zla d’a de d’a avunanda.
Sariya manda mba d’i ndeï woi
d’igi b’o d’a faleid’a na.
6 Kayam an min ni d’engzenga,
nga ni buzu ma ngata d’i;
agi wan an Alona
kal la agi han ahle suma ngat buzu suma ngalid’a.
Ahle suma ndjendje suma aduk Israel-lîna
7 Agi bud’ugi vun ma djinda kä woi
d’igi Adam na.
Ni kua ba, agi mbud’um iranu.
8 Galät nazì ma ngol ma suma kuruma
ni suma murud’umbina,
kurumî buzuna vam tu.
9 Adesâ hi suma ngat buzunina
nga mi tchi suma a i kud’or Alona
kur lovot ta Sikem-mbina,
d’igi suma tchigeta a nga bur suma kä na.
Wana ni vama tcho ma ndjendje ma kalâ!
10 An we vama tcho ma ndjendjed’a aduk Israel-lâ.
Ni kua ba, suma Efraim-ma a nga le gaulangâ,
Israel-lâ a mbut ndjendjed’a mi!
11 Agi suma Juda-na,
an nga ni nga yima ni ngobogi kuana mi.
© Azumeina Bible © Alliance Biblique du Tchad, 1999.
