Batranga nga ata yina pet, b’laka ti ar go mi
1 Ma didina mi dala:
Ata yima an min le sum mana djivid’a
an min sut Israel-lîna,
tchod’a hi suma Efraim-mid’a
ki tchod’a hi suma Samari-nid’a,
mba d’i buzuk kei avoronu.
Kayam azi ni suma ka zlad’a,
suma kula a nga kal avo,
suma tchigeta a nga tchola
ir palumba á b’lak ahlena mi.
2 A nga de kuruzi ala
an nga ni djib’er yam asa’at mazid’a d’i.
Wani ki tchetchemba, tcho mazid’a ti nguyuzi wa,
ti ni woi pid’ak avoron mi.
3 Azi nga lamulâ tam djivid’a kasa’at mazid’a,
a nga le suma avok sumina tazi djivid’a
ki zla mazi d’a kad’a mi.
4 Azi pet ni suma le mizeuna,
a hle tazi ni d’igi aku d’a für ra sama lavungôna mi vata na,
ata yima nga mi tib’ek afutina,
nga mi zud’ut akulo d’i gak afuta ti fak tua.
5 Kur bur ma vun tilâ hamul mazinina,
suma nglo suma avok suma a nga mbut tugud’eid’a
abo süm guguzlud’a,
amulâ nga mi ve suma las suma abozi akulo mi.
6 Ata yima a nga ndjak vunazi á tchol ki huneîd’ina,
huruzi mi mbut ni d’igi aku d’a füra na.
Wani andjege huruzi ma d’igi aku d’a füra na na nga mi bur sena.
Yorogo mi ngal d’igi aku d’a nga d’i ngala na.
7 Azi pet a gakud’a ni d’igi aku d’a füra na,
a nga ngal mazi suma nglo suma avorozina,
a nga tchamulei mazina woi mi.
Wani sa adigazi tu pî, mi yan nga d’i!
8 Suma Efraim-ma a tugut tazi kandjaf suma dingâ,
azi ni d’igi woî ma bei mbud’um ad’um ba na na.
9 Andjaf suma dingâ a nga tazi ad’engêziya,
wani azi nga we d’i.
Abusa nga d’i deî kazi ko,
wani azi nga we d’uo mi.
10 Yam mba ad’enga hi Israel-lîd’a
nga d’i le glangâsâ kaziya.
Hina pet pî,
a hulongî nga gen an Ma didina Alo mazina d’i,
a halan nga d’uo mi.
11 Suma Efraim-ma a mbut ni
d’igi gugu d’a yat nga d’uo d’a
bei wad’ud’a ba d’a na,
a nga yi Ezipte-na, a nga i Asiri mi.
12 Ata yima azi nga ina,
an mba ni tchuguzi abei manda kaziya,
an mba ni tchuguzi kä d’igi aluwei suma akulona na.
Ata yima azi nga tok kuana, an mba ni vigiziya.
13 Ni zla d’a hohoud’a kaziya,
kayam azi wal lei dei ki sed’enu;
b’laka nga d’i mba kaziya,
kayam azi le tchod’a avoronu.
An min á sud’uziya,
wani azi dan ni zla d’a kad’a.
14 Ata yima azi nga yana,
a nga yan ki hur ma tuna d’i,
wani azi nga tchi kur azang mazina,
azi nga ze tazi d’igi suma bei wanina na
á fe gemena, á fe guguzlud’a mi.
wani azi nga son vunanu.
15 Ni an ba ni had’aziya,
ni an ba ni hazi ad’enga,
wani azi nga de ni zla d’a tchod’a kanu.
16 Azi nga hulongîya,
wani nga ni gen an Ma sä akulo ma kal teglesâ d’i,
Azi ni d’igi yeû d’a bringîzlinga na,
amulei mazina a mba puk kä avun ayî ma durâ,
kayam zla d’a de d’a tcho d’a ndavunazid’a.
Ni kayam ndata ba,
a mbut vama sanda yam andaga d’a Ezipte-d’a.
© Azumeina Bible © Alliance Biblique du Tchad, 1999.
