Azì ma ngol ma ad’eng ma bei gigeta ba na
1 Kur bur máma a mba hle sawal la wanda
yam andaga d’a Juda-d’a, a mba dala:
Ami nga kazì ma ad’eng ma ngunguna á ndjunumiya.
Ma didina mi ge gulumuna kamu,
mi hulong mi ge gulumuna kam kua.
2 Ar agi malagi vun agre’â woyo,
agi aragi andjaf suma d’ingêr
suma d’engzengâ a tchuk avo.
3 Sama mi tchol ngingring yam djib’er mambina,
ang Ma didina mba ngomom ki halasa
kayam mi deng tam natangû.
4 Agi dengêgi tagi ata Ma didina teteu,
kayam mam mi ahinad’a hatchogoi d’a lara ge pet.
5 Mi zut suma a nga kaka akulo ata yima ndingîna kä,
mi zut azì ma ngol ma akulo ata yima ndingîna kä andaga,
mi tom kä woi andaga ndjandjam mi.
6 Suma hohou suma amangeîna
a nga mired’em kä kaseziya.
Tchen nda dananda
7 Lovota hi suma d’ingêrîd’a, ti ni d’ingêr.
Angî ma d’ingêrâ,
ang nga blas lovota hi suma d’ingêrîd’a kä.
8 Gagazi, Ma didina, ami tinimi hurumi ni kayam angû.
Lovot mang nga ang tagata ni d’a d’ingêra.
Ami nga yangû, ami nga tchenengû.
Wana ni djib’er ra kurumi d’a ami minita.
9 Andjege an nga ni halangû,
an nga ni halang kurun krovo mi, kayam me,
ata yima ang nga ka sariyad’a yam andagad’a ka hina,
suma a nga hat á tit tit ta d’ingêra.
10 Le sana nga mi we hohowa sama asa’atna ni,
nga mi hat á tit tit ta d’ingêra d’i,
nga mi mba ki tchod’a yam ambas sa d’ingêra,
nga mi djib’er yam ngola hi Ma didinid’a d’uo mi.
11 Ma didina, abong nga zid’a akulo,
wani azi wum nga d’i.
Azi mba we zlezleû mang nga yam sum mangîd’a.
Zulona mba mi laziya,
akud’a mba d’i ngal mang suma djangûna woi mi.
12 Ma didina, ang ngomomi ki halasa,
kayam ahle suma ang nga lazi kamina pet,
ni ang ba, ndagazi vunaziya.
13 Ma didina Alo mamina, suliyo d’a dinga a te kamiya,
wani ni yam suma manga ba,
ami nga yang simiyêng wana.
14 Suma matna a nga hulong kak ki irazi d’uo d’a,
suma a bona a nga hulong tchol akulo d’uo mi.
Ang mba, ang dabazi wa woyo,
ang b’lak djib’er ra suma a djib’eret kazid’a woi pet mi.
15 Ma didina, ang zulumi andjavamiya,
ang zulumi andjavamiya.
Ang wet wa hagad’a hambas mamid’id’a woyo.
Suma a suburung yam sun mang nga led’a.
16 Ma didina, ata yima ami nga kur ndakina,
ami halangû,
ata yima ang ngobomina,
ami tcheneng ala ang ndjunumiya.
17 Ma didina,
ami avorong ni d’igi atcha d’a ti nde vuta
d’a ti gun kä abo tata ted’a
d’a ti nga d’i tchid’a na.
18 Ami vami wirâ, ami fami ndaka,
wani ata yima ami vud’umina,
ami vud’umi ni simetna,
ami wami nga lovot ta a mbami ki suta
yam andaga d’a ka hid’a d’i,
d’oze a mbami ki suma ding suma kak
yam andagad’a ka hina d’uo mi.
Tchola hi suma matnid’a ki ngop pa yam tchod’id’a
19 Magi suma matna a mba hulong zlit akulo,
mad’a sum mana a mba tchol akulo.
Suma a nga kaka kä aduk andaga d’a gugud’upina,
a mba hulong zlit akulo,
a mba er ad’uzi akulo ki furîd’a.
D’igi mbad’ï magid’a ti d’idje andagad’a ahlena a gra na,
andagad’a mba d’i hulong tchol ki suma a bona akulo hina mi.
20 Sum mana, agi igiya, agi tchugugi klavi hatagiya,
agi dugugi vun gonga blogogiya,
agi ngeyegi tagi ndjö gak ayî mama mi kal lei tua.
21 Kayam Ma didina mi nde woi ata yam ma kaka
á ngop suma yam andagad’ina yam tcho mazid’a.
Andagad’a mba d’i ar yam buzuna hi suma a tchazina woi pid’agi,
mba d’i ngei suma a tchazina kä d’uo d’a.
© Azumeina Bible © Alliance Biblique du Tchad, 1999.
