Jerusalem ti ar go á b’laka; a prud’ut teyo
1 Ni zla d’a hohoud’a yam Ariyel, yam Ariyel
azì ma ngol ma Jerusalem ma David mi kak kuana.
Bizad’a ki bizad’a agi nga lagi vun tilâ
ata yima a ngama.
2 Ma didina mi dala: An mba ni lang ang Ariyel ndaka.
Suma a mba yor tazi kurungû,
a mba zam tazi kurung mi.
Ang azì ma ngol máma,
ang mba mbut iran ni d’igi yima ngal ahle suma ngat buzu
ma a yum ala Ariyel-lâ na.
3 An mba ni nguyung ki kang mana d’uhl,
an mba ni nguyung kahle suma
fuyogei suma ndjola ata yina teteng,
an mba ni mbu andaga akulo ad’ung
nguyung ngei d’uhl mi.
4 A mba hulongông yang kä,
zla mang nga ded’a mba d’i tcholï ni kä andaga.
Sa mba mi humung zla mang nga ded’a tetet tuo abo gugud’upa.
Deleng mba d’i ndei kä andaga d’igi sama azulâ na,
ang mba kud’uzï zla mang nga ded’a ni kä aduk andaga d’a gugud’upa.
5 Mang suma djangû suma mimiyâ’â
a mba mbut ni d’igi gugum ma fefelâ na,
suma mimiyâk suma a nga te yam sum ndazina kad’engina,
a mba mbut ni d’igi bra d’a simetna mi felet teid’a na,
ahle ndazina a mba le natogo hina zak
bei sa mi we ba.
6 Ma didin ma ad’engêm kal petna mba mi mba
á ndjun kangî ki breîd’a halonid’a.
Andagad’a mba d’i yir ki siwel la kal teglesa
ki babar ma bibi’â
ki sin aku d’a mba d’i ngal ahlena woid’a.
7 Andjaf suma mimiyâk
suma a mba mba atang ang Ariyel á durâ
suma a mba mba durung kazì mang ma ad’eng ma ngunguna
suma a mba mba tezeng ata azì mang
ma ad’eng ma ngunguna teteng mi na,
azi mba dap pei d’igi adï d’a de sanid’a na,
d’oze d’igi vama nde tam mbei ir sana andjegena na mi.
8 Andjaf suma mimiyâk suma a mba dur
suma yam ahina d’a Siyon-ndina,
a mba mbut ni d’igi sama meid’a tchum ba,
adïd’a ti dum ala nga mi te tena ba,
bugol mi zlit akulo ki hayam meid’a heleve’â na,
d’oze d’igi sama vunam so ba,
adïd’a ti dum ala nga mi tche mbina ba,
bugol mi zlit akulo vunam sod’a ki yama babana na mi.
Duka ki guruta ki sümid’a
9 Agi tchologi ndjö, agi lagi atchap,
agi dugugi iragiya, agi mbud’ugi suma duka,
agi nga gurud’ugiya, wani bei tchagi süm guguzlud’a ba!
Agi hlagi titigir, wani bei tchagi süm ma ayîna ba!
10 Ma didina mi burugi sen ma ngolâ.
Agi suma djok vuna mi dugugi iragi woyo.
Agi suma wagi ahle suma a nga mbana,
mi zlubugi ahlena woi iragi mi.
11 Ahle suma a nga nde tazi iragina pet, a mbut ni d’igi zla d’a kur mbaktum mba a reyêt vunat ki dubangîd’a na. A hat mi sama mi we ndumbina ala: Ang ndumud’u! Wani mi hulong dala: An ndak kuo, kayam vunat mi reîd’a ki dubangâ. 12 D’oze a mbut ni d’igi mbaktum mba a hat mi sama mi we nga ndumba d’uo na ala: Ang ndumud’u, wani mam mi hulong ded’a ala: An we nga ndumba d’uo na na mi.
Ahle suma a mba kang dumuzina a dap nga woi biya d’i
13 Salad’a mi dala:
Ata yima sum ndazina a nga hud’ï gevena,
a suburun ni ki vunaziya.
Wani huruzi ni woi dei ki sed’enu.
Le d’a a nga lan mandaranda
ni yam vun ma hed’a hi suma ma a had’azizina.
14 Kayam ndata, an nga ni zut sum ndazina
á le atchap yam ahle man suma yoyouna
kahle man suma ndandalâ avogovogo.
Ned’a hi mazi suma ned’a mba d’i dap peyo,
wed’a hi mazi suma wäd’u ahlenid’a mba d’i vit tei mi.
Agi vid’igi ni vid’a me d’a tchotchod’a na ge?
15 Ni zla d’a hohoud’a yam
suma a nga ngei nga hur mazina kä avok Ma didina
suma a nga le sunda kur nduvunda
suma a nga dala: Ni nge mi golei mi wei ge na.
16 Agi vid’igi ni vid’a me tchotchod’a na ge?
Na ni a mba ndjak sama min deina ki lubuna tu zu?
D’oze vama sana mi luma mi de yam salam ma luma ala
mi lan nga d’uo zu?
D’oze deina mi de yam salam ma minima ala
mi ni ma bei wed’a d’a zu?
Yina mbut batuwak ngola
17 Yina ar nga ngol li, Liban mba d’i mbut
ni d’igi asine ma wul awuna heîna na.
Asine máma mba mi mbut ni d’igi agud’a na mi.
18 Kur yi máma suma ngela a mba hum zla d’a kur mbaktumbid’a.
Ata yi máma suma duka a buzuguzï woi kur nduvunda
ata yima wura ma i’îli’â, a mba we yina.
19 Suma lulumana a mba le furîd’a ngola yam Ma didina,
suma hou suma aduk sumina a mba le hur ma hapma
yam Ma tin tam irat vat yam Israel-lîna mi.
20-21 Kur bur máma sama te yamba kad’engina nga d’uo d’a,
sama las suma nga d’uo mi.
Suma a le suma tchod’ina,
suma a nga ka sariyad’a yam sana ki zla mazi d’a ded’ina,
suma a nga gun dauna kä ata yima ka sariyad’a
á kal sama d’ingêrâ kur ndakina,
a mba tchazi woyo.
22 Kayam ndata, Ma didina Alona hi suma hi Jakob-ma
ma mi sut Abraham mbeina mi dala:
Ki tchetchemba, suma hi Jakob-ma zulona mba mi lazi d’i,
tazi mba d’i tchuk susub’ok kuo mi.
23 Fata grozina a mba we sun nda an lat kabon adigazid’a,
a mba tinin simiyên iram vamu,
a mba han an Ma tin tan irat vat
yam suma hi Jakob-mina ngola,
a mba lan an Alona hi Israel-lîna mandaran mi.
24 Suma djib’er mazid’a vit teina a mba humunu,
suma a nga gureîna a mba he tazi á hata mi.
© Azumeina Bible © Alliance Biblique du Tchad, 1999.
