Ezipte-na ni suma, a nga nAlona d’i
1 Ni zla d’a hohoud’a yam suma a nga i Ezipte á hal ndjundina.
Azi ni suma a deng tazi yam akulumeinina,
ni suma a tin huruzi yam pus ma dur ayîna yam ablau mambina,
ni suma a tin huruzi yam suma djang akulumeina
ala a ad’enga heyû na.
Wani azi ni suma a nga tin irazi
yam Ma tin tam irat vat yam Israel-lîna d’uo
suma a nga hal Ma didina d’uo mi na.
2 Wani Ma didina ni ma ned’a,
mi ndak á mba ki ndaka,
nga mi djok vunam yam zla d’a mam data d’i,
nga mi tchol akulo á kak djangûna
ki suma a nga tit bugol suma asa’atnina,
nga mi kak djangûna ki suma a nga ndjun
suma a le sun nda ata yat tuo d’ina mi.
3 Ezipte-na ni suma, a nga nAlona d’i.
Akulumei mazina a ni hliuna, a nga ni muzu’â d’i.
Ata yima Ma didina mi hlabom akulona,
sama mba á ndjundina mi ka nazlard’eid’a,
sama mam ndjunuma mi pu’î kä mi,
azi zla tazi djak a mba ba woyo.
Ma didina ni ma nga mi ngom Jerusalem-ma
4 Gola! Ma didina mi dan ala:
D’igi azlona d’oze azlo ma azongâ nga mi ngop
ades suma pola yam vama mi vuma,
nga mi le mandarâ abo siwel mazid’a
á arazi lovota d’uo na,
an Ma didin ma ad’engên kal petna mba ni le hina
fata ni tchuk asen kä yam ahina d’a Siyon-nda á dur ayîna kuad’a.
5 D’igi aluweina a nga dal akulo yam grozina na,
Ma didin ma ad’engêm kal petna mba mi ngom Jerusalem,
mba mi prud’ut tei mi ngomot mi sud’ut tei mi.
6 Agi Israel-lâ, agi hulongôgï gen ma agi aram mbei ki iragi fafatna. 7 Kur bur máma nge nge pî adigagi mba mi tchuk filei mam ma kawei ma hapma d’oze filei mam ma lor ma agi lagizi kabogi ma tchi matnina woyo.
8 Suma Asiri-na a mba puk kä
abo mbigeu d’a nga ni mbigeud’a hi sa d’uo d’a.
Mbigeu ndata mba d’i kaziya, a mba ring abod’u.
Azungeî mazi suma dur ayîna a mba le sun nda magomba mi.
9 Ma didin ma aku mamba nga kur Siyon ma aku mam
mba hîhîka nga kur Jerusalem-ma, mi dala:
Amul ma Asiri-na mba mi zlak abo mandarâ,
mazi suma nglona a mba ring a ar drapo mazid’a kä woi mi.
© Azumeina Bible © Alliance Biblique du Tchad, 1999.
