Azongâ hi Ma didinina (Sawal la mbàd’a)
1 Agi suma nga kaka yam tilina, agi humundiya.
Agi suma sä deina, agi tinigi humagi humugi mi.
Ma didina mi yanï ni kur asun dei,
mi de zlad’a ki simiyên
ni kid’a an nde woi kur asunda dei mi.
2 Mi mbud’un vunan d’igi mbigeu d’a fiyak ka te heîd’a na,
mi dugun kä kangus abomu,
mi mbud’un d’igi yeû d’a vunat feta dedelemba na,
mi ngeyen kä kur azì yeû mamba
d’igi ir yeûd’a na.
3 Mi dan ala: Angî azong mana,
angî Israel ma an mba ni fe subura atangâ.
4 Wani an dala: An kau tan ni hawa;
ni hawa hina yak ba, an nga ni dap ad’engên ndeyo;
doli wani zla manda nabo Ma didina,
wurak manda nabo Alo mana mi.
5 Ki tchetchemba, Ma didina nga mi de va.
Mi mininï kur asun tala an kak azong mama
á hulongî kandjafâ hi Jakob-ma,
á togï Israel-lâ gevemu d’a.
An ni vama subura ir Ma didina,
Alo mana nad’eng manda mi.
6 Mi dala: Ni vama akid’eina iran tala ang kak azong mana
á tchol kandjafâ hi Jakob-ma akulo,
á hulongî ki Israel suma a arâ d’a,
wani an tining d’igi b’od’a na yam andjaf suma dingâ,
kayam ang tak sut manda woi mi suma
gak avun dabid’a handagad’id’a.
Hulong nga ngola hi suma a yozi magombinid’a
7 Ma didin ma wurak yam suma
ma tin tam irat vat yam Israel-lîna,
mi de mi sama suma a golom isâ,
mi sama andjaf suma a golomî vama ndjendjed’ina,
mi magoma hi suma te yambina ala:
Amuleina a mba wangû, a mba tchol akulo avorong mi.
Suma nglona a mba grif kä avorong
yam an Ma didin ma d’engzeng
ma an tin tan irat vat yam Israel ma ni manangâ.
8 Ma didina mi dala:
Ata yima sumad’a an hulong dangû,
kur bur ma suta an ndjunung mi.
An mba ni ngomongû,
an mba ni tining á djin vunang kandjaf suma
á tchol ambasa akulo,
á b’rau ahle suma djo suma kur ambas sa ar djonid’a,
9 á de mi suma kur dangeinina ala:
Agi buzugugi woyo,
á de mi suma a nga kur nduvundina ala:
Agi buzugugi woyo mi.
Azi mba te hatna avun lovota d’igi tumiyôna na,
azi mba te hatna akulo yam yima ndingâ pet mi.
10 Meid’a mba d’i tchazi d’i, vunazi mba mi so d’i.
Yima aku ma huwa’â kafata a mba lazi ndaka d’i,
kayam an ma wazi hohowozina mba ni ndjunuziya,
mba ni tinizi ata mbiyo ma laud’a mi.
11 An mba ni ge lovota yam ahinad’a,
suma a mba hulong tit kua mi.
12 Gola! Suma sä deina a nga djïya.
Gola! Suma dingâ ni suma abo ma norâ,
suma dingâ ni suma abo ma fladegena,
suma dingâ ni suma a tcholï yam ambas sa Sinim-mbina mi.
13 Ndak akulod’a, ndak er ad’uk akulo ki furîd’a;
ndak andagad’a, ndak le hur ma hapma;
agi ahuniyôna, agi eregi ad’ugi akulo, agi ayâgiya,
kayam Ma didina mi b’leng wa hur sum mama,
mi wazi wa hohowozi kur ndak mazid’a mi.
An mba ni mar kak ki
14 Siyon ti dala: Ma didina mi aran ndeyo!
Salad’a mi mar kan mi.
15 Ma didina mi hulongôt humba ala:
Na ni atchad’a ti mar yam gorot
ma ndat nga d’i hum aponina zu?
Ti we hohowa gorot ma ndeï kurutna d’uo zu?
Le ti mar kam pî, an mba ni mar kak ki.
16 Gola! An b’irik nga ni hur abon ma biyarâ,
iran nga tinda yam gulumun ma’â teteu.
17 Suma a minik akulona a nga djï ringâ,
suma a b’lagak kei a mbud’uk djonina
a mba buzuk kei kuruk mi.
18 Ndak hle irak akulo, ndak gol lei kengêk hina.
Suma pet a toga, a nga djï gevegu.
An Ma didin ma bei matna, ni de na.
Ndak mba tchuguzi atak pet
d’igi sana mi tchuk ahlena atam na.
Ndak mba djinizi atak d’igi gor wei d’a a kata
nga d’i tchuk ahlena atat na.
19 Yi mak ma a b’lagam mbei ma ar hawa papana na,
kandaga mak ka b’lak keid’a
mba d’i kid’ak suma á kaka.
Wani suma a b’lagak keina a mba wal lei dei ki sed’ek mi.
20 Grok suma a dap peina a mba dugud’ok
ded’a humak ala: Yina kid’agamiya.
Minimi yina, ami kagami kua.
21 Ndak mba d’i de kuruk ala:
Ni nge ba, mi vud’uk gro ndazina ge?
Kayam grona a dap peyo, an ni gendreged’a,
a i ki sed’en magomba, a digin ndeyo.
Ni nge wuluzi ge? An arî van tu.
Sum ndazina a tcholï ni lara ge?
22 Salad’a Ma didina mi dala:
Gola! An nga ni hlabon akulo mandjaf suma,
an mba mi pe drapod’a akulo mi suma.
Azi mba yoï grok suma andjofâ akulo ahlabaziya,
azi mba yoï grok suma aropma akulo kelezi mi.
23 Amuleina a mba mbut nabuyok suma a wulu’â,
amulei suma aropma a mba mbut nasuyok suma a wulu’â,
a mba grif kä avorok ki irazi andaga,
a mba trâk gugum ma huyok ase’â woyo.
Ndak mba d’i wala an ni Ma didina.
Suma a tin huruzi kana a mba mbut zulona d’i.
24 Vama grang ma dur ayîna mi hlumî avun ayînina,
a mba prud’um mbei abom zu?
Ma dangeina hi sama murud’umba,
a mba prud’umzi woi abom zu?
25 Ma didina mi dala:
Gagazi, magumeina hi grang suma durâ,
a mba yozizi woi aboziya;
vama ma te yam suma kad’engina mi hluma,
a mba bad’amzi woi abomu.
An mba ni dur ayîna ki mak suma djangûna,
an mba ni sud’uk gro’â woi mi.
26 Suma a nga djobok vuna’â,
an mba ni hazi hliwizi tamba á mutna,
a mba gurut ki buzuwazi
d’igi sana mi gurut ki süm guguzlu d’a ayîna na.
Suma pet a mba wala an ni Ma didin ma sud’uk
ma ad’engêm kal petna hi Jakob ma mi wurak ka’â.
© Azumeina Bible © Alliance Biblique du Tchad, 1999.
