Suma ka sariyad’a 1 - Azumeina Bible 1999 (MPG)

AHLE SUMA A LE GAK MATNA HI JOSUE-NINA

Israel-lâ a kak yam ambas sa Kanan-nda

1 Bugol matna hi Josue-na, Israel-lâ a djop Ma didina ala: Nandjaf ma lara adigami ba, mi i avok kikidji á dur suma Kanan-na ge?

2 Ma didina mi hulong dazi ala: Nandjafâ hi Juda-na ba, mi iya, kayam an hum ambasa abumu.

3 Suma hi Juda-na a de mi b’oziyozi suma ad’u andjafâ hi Simeon-na ala: Agi mbeï igi ki sed’emi á dur suma Kanan suma yam andaga d’a a hamizi djona ki toginid’ina. Bugola, ami imi ki sed’egi á dur suma yam ambas sa a hagizi djona ki toginid’ina mi.

Suma hi Simeon-na a i ki sed’eziya. 4 Suma hi Juda-na ki suma hi Simeon-na a iya. Ma didina mi hazi suma Kanan-na ki suma Peris-sâ aboziya; a tchi suma 10.000 adigazi avo Bezek. 5 A famulâ Adoni-Bezek, a durumu, a tchi suma Kanan-na ki suma Peris-sâ. 6 Wani Adoni-Bezek mi fak ringâ. Azi digim a vumu, a ngad’am tchitchid’am mba mudugunei d’a abomba ki d’a asemba woyo. 7 Adoni-Bezek mi dala: Amulei suma dok kid’iziya suma an ngad’azi tchitchid’azi d’a mudugunei d’a abozid’a ki d’a asezid’a woina, a yo bubuk te ma yak kä ad’u tabul manina. Alona mi hulongôn ni wuraka yam sun man nda an lata.

Azi vum a i ki sed’em sä Jerusalem; mi mit sä kua.

8 Suma hi Juda-na a nde Jerusalem durâ, a hlad’u, a tchi suma kurâ woi ki mbigeu d’a fiyaka, a ngal azina woi kakud’a mi. 9 Bugola, suma hi Juda-na a i á dur suma Kanan suma a nga kaka yam ahinad’a, suma a nga kaka abom ma sutnina, ki suma a nga kaka kä ata yima ligitina mi. 10 Suma hi Juda-na a i dur suma Kanan suma a nga kaka kur azì ma ngol ma Hebron ma a yum adjeu ala Kiriyat-Arba-na, a dur Sesai azi ki Ahiman ki Talmai mi. 11 Ata yi máma a djak vunazi á dur suma a nga kaka kur azì ma ngol ma Debir ma a yum adjeu ala Kiriyat-Sefer-râ. 12 Kalep mi dala: Sama mi dur azì ma ngol ma Kiriyat-Sefer mi hluma, an mba ni hum goronda Aksa atchad’a. 13 Otniyel Kenas ma Kalep wiyem ma gorâ goromina, mi durum mi hlumu. Kalep mi hum goromba Aksa atchad’a. 14 Ata yima ti kal avo hi Otniyel-lâ, mi zud’ut á tchen abut yam asinena. Kid’a ti tchuk aset kä woi yam koro matnid’a, Kalep mi djobot ala: Ndak min ni me ge?

15 Ti hulong dum ala: Ang han wa andaga d’a gangras sa abo ma sutnid’a da’. Ki tchetchemba, ang wan hohowonu, ang han golongeî suma laud’a mi! Kalep mi hat golongeî suma lau suma akulo ata yima ndingîna ki suma lau suma kä ata yima ligitimina mi.

16 Suma Ken suma ad’u andjafâ hi Moise akunomina, zlapa ki suma Juda-na, a tcholï Jeriko ma azì ma ngol ma amulongeîna nga kuana hur fulâ hi Juda-na abo ma sutna hi Arat-na, a i a kak aduk suma a nga kaka ata yi mámina.

17 Suma hi Juda-na a i ki b’oziyozi suma hi Simeon-na, a dur suma Kanan suma a nga kaka Sefat-na, a b’lak azina woi kakazeî, a yi azì ma ngol máma ala Horma. 18 Suma hi Juda-na a hlazì ma Gaza-na kandaga mamba, azì ma Askalon-na kandaga mamba, azì ma Ekron-na kandaga mamba mi. 19 Ma didina mi nga ki suma hi Juda-na. A hlazì ma yam ahinad’ina, wani a dik nga suma a nga kaka kur horina woi d’i, kayam azi nga ki pus ma kawei ma dur ayîna. 20 Azi hazì ma Hebron-na mi Kalep d’igi Moise mi de na. Mi dik Anak grom suma hindina woyo.

21 Suma hi Benjamin-na a dik nga suma Jebus suma a nga kaka Jerusalem-ma woi d’i. Suma Jebus-sâ a nga kaka Jerusalem ki suma hi Benjamin-na gak ini.

22 Suma hi Josef-fâ a i á dur Betel; Ma didina mi nga ki sed’eziya. 23 Suma hi Josef-fâ a sun suma, a d’u azì ma ngol ma Betel-lâ; azì máma a yum adjeu ala Lus. 24 Suma a i á d’u yinina, a we sana mi nde woi abu avun azina, a dum ala: Ang tagami lovot ta kal ki hur azinid’a; ami mba lang djivid’a. 25 Mi tagazi lovot ta kal kavo hur azinid’a. Azi tchi suma hur azinina woi ki mbigeu d’a fiyaka, wani a ar sa máma ki sum máma pet a i bei a lazi va ba. 26 Sa máma mi i yam ambasa hi suma Het-nid’a, mi min azì ma ngolâ tu, mi yum ala Lus. A nga yi azì máma ki simi máma gak ini.

27 Suma hi Manase-na a dik nga suma a nga kaka Bet-Seyan-na kazì ma nguyuzina, suma Täna’â kazì ma nguyuzina, suma Dor-râ kazì ma nguyuzina, suma Jibleyam-ma kazì ma nguyuzina, suma Megido-na kazì ma nguyuzina woi d’uo mi. Suma Kanan-na a min kak kur ambas ndata mi. 28 Kid’a Israel-lâ a fad’engid’a, a tin suma Kanan-na á lazi sun nda magomba, wani a digizi nga woi d’i.

29 Suma hi Efraim-ma a dik nga suma Kanan suma a nga kaka Gezer-râ woi d’uo mi; sum ndazina a nga kaka aduk suma hi Efraim-ma avo Gezer.

30 Suma hi Zabulon-na a dik nga suma Kanan suma a nga kaka Kitron-na ki suma a nga kaka Nahalol-lâ woi d’uo mi; sum ndazina a nga kaka aduk suma hi Zabulon-na, wani a tinizi á lazi sun nda magomba.

31 Suma hi Aser-râ a dik nga suma a nga kaka Ako-na ki suma a nga kaka Sidon-na ki suma a nga kaka Alap-ma ki suma a nga kaka Aksip-ma ki suma a nga kaka Helba-na ki suma a nga kaka Afik ki Rehop-ma woi d’i. 32 Suma hi Aser-râ a kak aduk suma Kanan suma a nga kaka yam ambasina, kayam a digizi nga woi d’i.

33 Suma hi Neftali-na a dik nga suma a nga kaka Bet-Semes-sâ ki suma a nga kaka Bet-Anat-na woi d’i. A kak aduk suma Kanan suma a nga kaka yam ambasina, wani suma Bet-Semes-sâ ki suma Bet-Anat-na a nga lazi sun nda magomba.

34 Suma Amor-râ a dik suma hi Dan-na woi yam ahinad’a, a arazi nga á tchuk asezi kä kur hora d’uo mi. 35 Suma Amor-râ a min a kak Har-Heres, Ajalon ki Sälbim mi, wani suma hi Josef-fâ a tinizi aneka kaziya, a tinizi á lazi sun nda magomba mi. 36 Hagad’a hi suma Amor-rîd’a ti i akulo ata yima djak akulo aduk ahina d’a Akrabim-mbina, ti i gak Sela, ti kal sä woi abo hî.