Suma hi Dan-na a djok yam andaga d’a dinga
1 Kur atchogoi ndata amul nga avok Israel-lâ d’i. Andjafâ hi Dan-na nga mi hal yima kaka, kayam gak kur bur máma pî b’raud’a mba nga kam á hum djona aduk Israel-lâ d’uo tua. 2 Suma hi Dan-na a yo suma gangrangâ vahl ad’u adezeziya, ni suma a kaka Sora ki Estawol-lâ. A sunuzi á d’u ambasa á golot mi, a dazi ala: Agi i gologi ambasa. A mbaza yam ahinad’a hi Efraim-mba, gak a i avo hi Mika, a bur kua. 3 Kid’a azi mbaza go kazina hi Mika-nid’a, a hum del gor azong ma hi Levi-na, a hut gevem go, a djobom ala: Ni nge mi mbang ka hî ge? Ang le ni me ata yi máma ge? Ni me mang nga ka hî ge?
4 Mi dazi ala: Mika mi lan ahlena hina hina, nga mi wuragan beged’a. An mbut ni mam ma ngat buzuna mi.
5 A djobom ala: Ang djop Alona kayambala ami wamiya, na ni akoi mamid’a mba d’i ve kami ko zi ge d’a?
6 Ma ngat buzu máma mi dazi ala: Agi igi ki halasa! Ma didina mi tinigi kur akoi magi d’a agi nga ita. 7 Suma vahl ndazina a iya, a mbaza Layis, a fe sumazina a nga kaka ki halasa tchugot d’igi suma Sidon-na na, ki halasa bei djib’era ba. Sa mi nga gevezi á lazi ndak koze á te kazi d’uo mi. Azi ni kaka woi dei ki suma Sidon-na, azi ve nga bana ki suma ding nguo mi. 8 Suma vahl ndazina a hulongî gen b’oziyozina avo Sora ki Estawol.
B’oziyozina a djobozi ala: Agi mbagi ni ki zla me ge?
9 Azi dazi ala: Agi tchologi akulo! Ei ndei i ata sum ndazina durâ, kayam ami wami ambasa ti djivid’a heî! Ni nana ba, agi nga dagi zla tu d’uo ge? Ar agi lagi azulomba d’i! Agi bad’agi tagi ei i hlei ambas ndata! 10 Fata agi kalagi kuad’a, agi mba fagi suma a nga kaka ki halasina. Andaga ndata ti bubud’a, Alona mi hagizi abogi mi. Ni yima ahle suma yam andagad’a ka hina a kid’ak nga kua d’uo na mi.
11 Ades suma hi Dan-na kikisa karagaya a tchol Sora ki Estawol, a i kahle mazi suma dur ayîna abozi mi. 12 Azi i ve kangâ go ki Kiriyat-Jarim ma yam ambas sa Juda-d’ina. Ni kayam ndata ba, yima nga bugol Kiriyat-Jarim-ma a nga yum gak ini ala Mahane-Dan. 13 Azi tchol kua kolâ, a i yam ahinad’a hi Efraim-mba, a i gak avo hi Mika. 14 Ata yi máma suma vahl suma a i á d’u ambas sa Layis-sina a de zlad’a mi b’oziyozina ala: Agi wagi nga ala kur azì ma wana filei ma a yum ala efona ki ma a yum ala terafima kagu ma tcheta ki ma a gulud’um ki kaweina mi na a nga kua mi d’uo zu? Ni zla magid’a á wagi vama agi luma.
15 Azi tchol a i kal avo hi gor azong ma hi Levi-na avo hi Mika, a djobom ala na ni mi nga ni hawa ko zu? 16 Ades suma hi Dan suma kikisa karagaya suma a nga kahle suma dur ayîna abozina, a ve tazi tchola woi abu avun agre’â. 17 Kid’a ma ngat buzuna mi nga tchola woi abu avun agre’â ki suma kikisa karagaya suma a nga kahle suma dur ayî mazina abozinid’a, suma vahl suma a i á d’u ambasina a kal avo, a hlägu ma tcheta ki filei ma a yum ala efona ki ma a yum ala terafima kagu ma tchet ma a gulud’um ki kawei ma yorina mi. 18 Kid’a sum ndazina a kal avo hi Mika, a hlägu ma tcheta ki filei ma a yum ala efona ki ma a yum ala terafima kagu ma tchet ma a gulud’um ki kawei ma yorina mi d’a, ma ngat buzuna mi dazi ala: Agi lagi ni me na ge?
19 Azi hulong dum ala: Ang ba! Ang duk abong avunangû! Ang mbeï ki sed’emiya! Ang mba mbut nabumiya, ang mba mbut ma ngat buzu mamina mi. Djivid’a ang le sunda mandjafâ kadesâ hi Israel-lîna, kal la ang lat mi sama tunid’a d’uo zu?
20 Ma ngat buzuna tam lum djivid’a heî, mi hle filei ma a yum ala efona ki ma a yum ala terafima kagu ma tcheta, mi ge tam aduk ablaud’a.
21 Azi tchol id’a, a tchuk kemba ki d’uwarâ kahlena pet avoroziya. 22 Kid’a azi hut tei dei kazina hi Mika-nid’a, ndrom sumazina a tok taziya, a nde dik ad’u suma hi Dan-na. 23 Azi yi suma hi Dan-na. Suma hi Dan-na a mbut iraziya, a de mi Mika ala: Ni zla me ge? Suma ablau suma wana ni suma me na ge?
24 Mika mi hulong dazi ala: Filei man ma an luma, agi yom zlapa ki ma ngat buzuna pet, agi igi ki sed’eziya! Ni me mana mi ar nga d’ei ge? Ni nana ba, agi dan ala: Ni zla me ge ge?
25 Suma hi Dan-na a dum ala: Ami min humung deleng gevemi ka hî d’i kayambala suma asa’atna a tchol ki sed’eng a bang ngei ki sum mangâ d’uo d’a. 26 Suma hi Dan-na a tchuk tazi iya. Kid’a Mika mi wala azi ad’enga kalamu d’a, mi hulong avo hatamu.
Azì ma ngolâ hi Dan-na ki yi mam ma kud’ora
27 Suma hi Dan-na a yo ahle suma Mika mi lazina, a ve ma ngat buzu ma nga mi lum sundina mi, a nde yam suma Layis suma a nga kaka tchugot ki halasina, a tchazi ki mbigeu d’a fiyaka, a ngal azì ma ngolâ woi mi. 28 Sama prud’um mbeina nga d’i, kayam mi ni woi dei kazì ma Sidon-na, sama bana ki sed’em nga d’uo mi, mi ni kur hor ra abo ma Bet-Rehop-mid’a. Suma hi Dan-na a minim akulo, a kak kua. 29 Azi yazì ma ngol máma ala Dan ki simiyê abuzi Dan ma a vud’um mi Israel-lîna. Wani avok a yazì ma ngol máma ala Layis. 30 Suma hi Dan-na a tin agu ma tchet máma mi aziya. Jonatan Gersom gorom ma Moise gorom ngolonina azi ki groma ni suma ngat buzuna mandjafâ hi Dan-na gak mba kur atchogoi d’a a yo suma kur ambasa a izi magombid’a. 31 Azi tin agu ma tchet ma Mika mi luma mi azi kur atchogoi d’a lara pet ta gonga hAlonid’a ti nga avo Silo-d’a.
© Azumeina Bible © Alliance Biblique du Tchad, 1999.
