Suma nglo suma avok sumina ni Debora azi ki Barak
1 Bugol matna hi Ehut-na, Israel-lâ a nde le sun nda ding nga Ma didina tam nga d’i lum djivi kat tuo d’a. 2 Ma didina mi hazi woi abo Jabin amul ma Kanan ma nga mi tamula avo Hasor-râ. Azigar mam ma ngolâ ni Sisera, yam ma kaka ni Haroset-Goyim. 3 Jabin mi nga ki pus ma kawei ma dur ayîna kikis zlengâ, mi djop vun Israel-lâ ngola gak bizad’a dok mbà. Ata yi máma Israel-lâ a nde tchi yam Ma didina ala mi ndjunuziya.
4 Kur atchogoi ndata Debora d’a djok vun Alona d’a atchad’a hi Lapidot-ta, ni d’a ngola nga avok Israel-lîd’a, 5 ti nga kaka ad’u amilaû ma a yum ala amilaûna hi Debora-na aduk Rama ki Betel yam ahinad’a hi Efraim-mba. Israel-lâ a nga i gevet kayam ti kazi sariyad’a. 6 Ti ge sunda ti yï Barak Abinowam goroma ei Kedes-Neftali, ti dum ala: Ma didina Alona hi Israel-lîna mi hang vuna ala: Ang i yo suma ad’u andjafâ hi Neftali-na kandjafâ hi Zabulon-na 10.000, ang i ki sed’ezi yam ahina d’a Tabor-ra. 7 An mba ni lobï Sisera ma ngol ma dur ayîna hi Jabin-na ki pus mam ma dur ayîna ki azigar mama woi geveng avun toliyon nda Kison-nda, an mba ni hangzi abongû.
8 Barak mi hulong dat ala: Le ndak i ki sed’enu ni, an iya; le ndak i ki sed’en nduo ni, an nga ni i d’i.
9 Debora ti hulong dum ala: Djiviya! An nga ni i ki sed’engû. Wani ang mba fe subura kur ayî ma dur máma d’i. Kayam Ma didina mba mi he Sisera nabo atchad’a. Bugola, Debora ti tchola, ti i ki Barak avo Kedes. 10 Barak mi yi andjafâ hi Zabulon-na kandjafâ hi Neftali-na avo Kedes. Suma 10.000 a i blogomu; Debora ti i ki sed’em mi. 11 Heber ma ad’u andjafâ hi Ken ma wal tam mbei kandjafâ hi Ken ma dingîna, azi nandjafâ hi Hobap ma Moise atanamina, mi ve zlub’u mamba kur yi máma gak mbaza ad’u sen ma Sänanim ma go ki Kedes-sâ.
12 Suma a mba de mi Sisera ala: Barak Abinowam goroma mi mba nga yam ahina d’a Tabor-ra. 13 Sisera mi tok pus mam ma kawei ma dur ayî ma kikis zlengîna ki sum mama pet avo Haroset-Goyim, mi i ki sed’ezi avun toliyon nda Kison-nda.
14 Ata yi máma Debora ti de mi Barak ala: Ang tchol iya! Gola! Bur ma inina ni bur ma Ma didina mi hang Sisera abongâ; Ma didina nga mi tit avorongû!
Barak mi tchuk asem kä woi yam ahina d’a Tabor-ra ki suma 10.000 blogom mi. 15 Ma didina mi ndjoî Sisera ki pus mama ki sum mama ki mbigeu d’a fiyaka woi vivreng avok Barak. Sisera mi yak asem mbei kur pus mama, mi ring kasemu. 16 Barak mi dik ad’u pusâ ki azigarâ gak a mbaza Haroset-Goyim; a tchi azigarâ hi Sisera-na woi ki mbigeu d’a fiyaka pepet bei sa sut tu ba.
17 Sisera mi ring kasem kur zlub’ud’a hi Jayel atchad’a hi Heber ma ad’u andjafâ hi Ken-nina, kayam b’leng nga halasa nga aduk Jabin amul ma Hasor-râ ki suma hi Heber ma ad’u andjafâ hi Ken-nina. 18 Jayel ti nde woi avok Sisera, ti dum ala: Salana, ang mbeya, ang le mandar ri. Mi kal kur zlub’u mata, ti ngeyem kä ad’u borogona.
19 Mi dat ala: An nga ni tchenegu, hanï mbiyo ma tche dö; vunan so heî. Ti but vun bid’im mba ambira, ti humzi á tched’a, ti hulong tchugum borogona kam kä.
20 Mi dat kua ala: Ndak tcholza woi avun zlub’ud’a. Le sa mba mi djobok ala: Sa nga ka hî zi ge ni, ndak dum ala: Hawa! Sa nga ka hî d’i.
21 Sisera mi bur sena ngola abo seîd’a. Jayel atchad’a hi Heber-ra ti hleï tcheble ma a b’al ki zlub’ud’a kä na, ti hleï martona abot mi, ti hud’ï lalam, ti balam tcheblena andei humam te’es gak mi ndeza kä woi andaga, mi mid’a.
22 Wani Barak nga mi digï ad’u Sisera. Jayel ti nde woi ti ngavamu, ti dum ala: Ang mbeï an tagang sama ang halama. Mi kal avo hatad’u, mi we Sisera mi nga ged’a kä matna ki tcheblena b’ala andei humamu.
23 Ni kur bur máma ba, Alona mi hulong Jabin amul ma Kanan-na yam kä avok Israel-lâ. 24 Israel-lâ a nga kus yam Jabin amul ma Kanan-na avogovogo, a lum baba, a tchum mbeyo.
© Azumeina Bible © Alliance Biblique du Tchad, 1999.
