Suma ringâ a djop Jeremi
1 Suma nglona hi azigarîna pet, nala, Johanan Kareya goroma, Jezaniya Hosaya goroma ki suma pet suma a nga ata yi mámina, tin ad’ud’a ata gugureina gak mba yam suma nglona, a mba, 2 a de mi ma djok vun Alona Jeremi ala: Ar ang hum tchen mami d’a hud’a. Ang tchen Ma didina Alo mangâ yam djivid’a hi ami suma aramina pet. Kayam avok ami nablaud’a, wani ki tchetchemba, ami arami nakid’eid’a d’igi ang we ki irang ini na. 3 Ar Ma didina Alo mangâ mi tagami lovot ta ndak ami hlata ki vama ami luma mi.
4 Ma djok vun Alona Jeremi mi dazi ala: An huma! Gola! An nga ni tchen Ma didina Alo magina d’igi agi dagi na. An mba ni dagi woi bei ni ngeyegi zla d’a pet ta Ma didina mba mi hulongôgizi ded’id’a kä ba.
5 A de mi Jeremi ala: Le ami mba lami sunda yam zla d’a pet ta Ma didina Alo mangâ mba mi dangzi á damizïd’a d’uo ni, ar Ma didina mi le glangâs ma irat ma d’engzengâ kamiya. 6 Le ni zla d’a djivi d’oze zla d’a tcho, ami mba gami yami kä ad’u dela hi Ma didina Alo mami ma ami sunung gevema. Hina wani, ami mba lami furîd’a ata yima ami gami yami kä ad’u dela hi Ma didina Alo maminid’a.
7 Bugol burâ dogo, Ma didina mi hulong humba mi Jeremi. 8 Jeremi mi yï Johanan Kareya goroma ki azigar suma nglona pet suma a nga zlapa ki sed’ema ki suma pet tin ad’ud’a ata gugureina gak mba yam suma nglona. 9 Mi dazi ala: Ma didina Alona hi Israel-lâ ma agi sunun gevem ala an i ki tchen magi d’a hud’a avoromu na mi dala:
10 Le agi aragi kaka kur ambas sa wanda ni,
an mba ni minigi akulo,
an mba ni b’lagagi woi d’i,
an mba ni pagi ad’ugi kä,
an mba ni pad’agi woi d’i.
Kayam an mbut hat hurun yam tcho d’a an lagizid’a.
11 Ar agi lagi mandarâ abo amul ma Babilon ma agi nga lum mandarama d’i.
Agi lum mandaram mbi,
kayam an nga ki sed’egi á sud’ugi woi abomu.
An Ma didina ni de na.
12 An mba ni wagi hohowogiya.
Mam mba mi wagi hohowogiya,
mba mi hulongôgï yam andaga magid’a mi.
13 Wani le agi dagi ala: Ami min kagami yam ambas sa wanda d’uo, le agi humugi nga dela hi Ma didina Alo maginid’a d’uo, 14 le agi dagi ala: Hawa yak! Ami imi ni yam ambas sa Ezipte-d’a ata yima ami mba wami ayî ma durâ d’oze ami humumi adif fa ayîna d’oze ami mba kid’agami tena kua d’uo na, ni kua ba, ami mba kagami kua ni, 15 ki tchetchemba, agi suma Juda suma arâ, agi humugi zlad’a hi Ma didinid’a. Ma didin ma ad’engêm kal petna, Alona hi Israel-lîna, mi dala:
Le agi ngagi hurugi á i Ezipte,
le agi i kagagi sä kua ni,
16 ayî ma dur ma agi nga lum mandarama,
mba mi mba kagi sä kur ambas sa Ezipte-d’a;
baktara d’a agi nga djib’eregi kata,
mba d’i mba kagi sä Ezipte,
agi mba bogi sä kua.
17 Suma pet suma a nga huruzi á i Ezipte á kak sä kuana,
a mba tchazi avun ayîna,
baktarad’a mba d’i tchaziya,
d’oze tugud’ei d’a tcho d’a tchi matna mba d’i tchaziya.
Sama adigazi ma mba mi ar
roze mi sut tei abo ndak ka an mba ni mbazizi kazid’ina nga d’i.
18 Kayam Ma didin ma ad’engêm kal petna, Alona hi Israel-lîna, mi dala: D’igi an ni wet ayî mana ki hur man ma zal ma gugulu’â woi yam suma a nga kaka avo Jerusalem adjeuna na, le agi igi Ezipte ni, an mba ni wed’em mbei kagi na mi. Agi mba mbud’ugi ni vama ge vuna, vama atchapma, vama a golom isâ ki vama ngula. Agi mba wagi yima kä wana ki iragi d’uo d’a.
19 Agi suma Juda suma arâ, Ma didina nga mi dagiya: Agi igi Ezipte d’i. Agi wagi woi tetet ala an ni d’elegi ini.
20 Ni agi ba, lobogi tagiya, kayam agi sunun gen Ma didina Alo magina ala: Ang tchen Ma didina Alo mamina yam djivi mamid’a. Ahlena pet suma Ma didina Alo mamina mba mi dangzina, ang vamizi ad’uzi woyo. Ami mba lami sunda kaziya. 21 Wani an nga ni vagizi ad’uzi ini, wani agi nga humugi dela hi Ma didina Alo maginid’a d’oze ahlena pet suma mam han vuna kazi á dagizina d’uo mi. 22 Ki tchetchemba, agi wagi woi tetet ala a mba tchagi avun ayî ma durâ, baktarad’a mba d’i tchagiya, tugud’ei d’a tcho d’a tchi matna mba d’i tchagi kur yima agi min á i kagagi kua máma!
© Azumeina Bible © Alliance Biblique du Tchad, 1999.
