Sofar mi de mi Job ala: Ang hulongî gen Alona
1 Sofar ma Näma-na mi hulong de mi Job ala:
2 Zla d’a ded’a ablau d’a tchotcho d’a wanda,
sana ndak á hulong zla d’a ded’a kat tuo zu?
Ni sama de zlad’a ablaud’ina ba, mi mbut ma gagazina zu?
3 Nata zla mang nga ded’a wü ndata ba,
ang mba d’el vun suma zu?
Ang mba las suma hina gagak
tala sa mi vang ki zla d’uo d’a zu?
4 Ang nga de mAlona ala: An ni ma bei zlad’a kana,
an ni ma yed’etna avorongû!
5 Ladjï Alona mi min de ni zlad’a ni,
ar mi mal vunam mi dang zlad’a ni mam tamba!
6 Ladjï mi dangî zla mam mba ne d’a gumun nda kal teglesa ni,
ata yi máma ang mba wala
Alona doli mi arî tcho mang nga hiud’a woi d’ö!
*
7 Ang ndak á fek ad’u zla d’a yiyika hAlonid’a zu?
Ang ndak á fek ad’u wäd’u d’a memeta hi Ma ad’engêm kal petnid’a mi zu?
8 Ti kal akulod’a dei;
ang mba le ni nana ge?
Zul mat ta yiyika kal yima azuleina;
ang mba wat ni nana ge?
9 Fiyak mata ti kal bubud’a handagad’id’a,
bubu mata ti kal alum ma ngolâ mi.
10 Le mi kala, le mi ve sana,
le mi yum ata yima ka sariyad’a ni,
ni nge ba, mi d’elem ge?
11 Kayam suma ka zlad’a, mam waziya,
nga mi we sun nda ata yat tuo d’a azi nga lata atogo zak mi.
12 Le lovota nga yam sama lilid’a á mbut sama wad’ud’a ni,
koro ma abageina mba mi vut koro ma avo na mi!
*
13 Wani le ang min hurung woi djivid’a tetet,
le ang mat abong mAlona,
14 le ang wal lei dei ki sun nda tcho d’a ang lat kabonga,
le ang ar tchod’a ti kak kur zlub’u manga d’uo ni,
15 ang mba hle yang akulo bei ndala ndub’uk ba,
ang mba tchol ad’enga, ang mba le mandar ruo mi.
16 Ang mba mar rei yam ndak manga
d’igi sana mi mar rei yam mbiyo ma djang ngeina na.
17 Kak mang nga yam andagad’id’a,
mba d’i b’o kal afat ta falei d’ad’ara,
yima nduvunda mba mi mbut ni d’igi b’o d’a yorogod’a na mi.
18 Ang mba kak ki hur ma ade’esâ,
kayam hur mang ma tinda mi nga;
ang mba gol yina gevengû,
ang mba bur kä ki halasa bei va mi lang ba.
19 Ang mba bur kä bei sa mi lang va ba,
ablaud’a a mba hal ndjunda atangû.
20 Wani suma asa’atna irazi mba d’i zal leyo,
a mba fe yima ngei tazina d’i,
hur mazi ma tinda ni matna mi.
© Azumeina Bible © Alliance Biblique du Tchad, 1999.
