Sofar mi de kua ala: Ni zla d’a hohoud’a yam sama asa’atna
1 Sofar ma Näma-na mi de mi Job kua ala:
2 Gola! Djib’er manda nga d’i zud’un á hulong zla d’a ded’a,
kayam djib’er ra kurun nda nga d’i aran nduo d’a.
3 An hum ngul la ang nga ngulunda,
wani djib’er manda nga d’i hulongôn humba ala:
4 Ki dedei d’a Alona mi tin sana yam andagad’a ka hî d’a,
ang we nga d’ala
5 suma asa’atna a hle sawal la bangâna
ni gid’enga hina ngiyeû go,
furîd’a hi sama nga mi kud’or Alona d’uo na
ni gid’enga hina getib’engû d’a d’uo zu?
*
6 Le ngol mamba ti i gak hur alona,
le yam i doï d’ugula pî,
7 mam mba mi ba woi ki iram fafat d’igi sud’om na.
Suma a wum adjeuna a mba dala: Mi nga ni lara ge?
8 Mam mba mi pir d’igi adï d’a ded’a na,
a mba fum bugol luo d’a,
a mba digim d’igi vama nde tam irang andjegena na.
9 Sama mi wum adjeuna, mba mi wum mbuo d’a,
yima mi kak kua adjeuna, a mba wum kua bugol luo mi.
10 Mam mba mi hulong ndjondjoî mam mba mi b’ad’at abo sumid’a,
groma a mba hulong ahlena mi suma houd’a mi.
11 Ad’eng nga mam nga ki sed’et kazongômba,
mba mi i kä ki sed’et aduk andaga d’a gugud’upa mi.
*
12 Le tchod’a ti adjib’eta avunamu,
le mi ngeyet kä ad’u sinamu,
13 le nga mi ngomod’u, mi arat nga woi d’i,
le mi vat nga akulo d’id’igamu ni,
14 te mama mba mi bu kurum krovo,
mba mi mbut ayî mageid’a kurum krovo mi.
15 Nga mi lik ndjondjoîd’a,
wani mba mi hulong vinit teyo;
Alona mba mi yot tei kurumu.
16 Mi nga sop ayî mageid’a,
sina hengre’â mba d’i tchumu.
*
17 Mam mba mi we alum ma nga mi djang ki mbul ayumina
d’oze toliyon nda nga d’i djang ki mbul ambirid’a d’uo d’a.
18 Mam mba mi hulong ahle suma mi fe ndaka kazina akulo,
mba mi ligizi d’i,
mba mi le furîd’a ki mbiyo ma mam fuma d’uo mi.
19 Kayam mi le suma hohoud’a ndaka, mi arazi woyo,
azì ma mam yom abozi kad’engina,
mi hulong mi minim nga akulo d’i.
20 Kayam djib’er mamba nga d’i tin kä abo d’od’ok ka kurumba d’i,
mi ndak á sut vama aduk ndjondjoî mambina tu d’i.
21 Va mi ar nga abom bei ted’a d’i.
Kayam ndata, ndjondjoî mamba mba d’i kak tatâ d’i.
*
22 Kur ndjondjoî mamba mam mba mi fe ndaka;
aneka hi suma a nga kur ndakina mba d’i tok kamu.
23 Ata yima mi min tam á hop hayama,
Alona mba mi mba kayî mam ma bibiliuna kamu,
mba mi sumzi kam kä á mbut te mama.
24 Le mi ring ngei abo ahle suma sï suma kaweina ni,
yeû d’a kawei ma hleuna mba d’i tchogomu.
25 Nga mi pat yeûd’a woi huyogomu,
nga mi ve vama sï ma tchogom adudugama woyo,
mandara matna mba mi vum atogo zak mi.
*
26 Ndjondjoî d’a a nga ngomot kamba ni nduvun nda i’îlika.
Aku d’a sa vat nga kabom mbuo d’a mba d’i ngalamu,
aku ndata mba d’i ngal ahle suma a ar kur zlub’u mambina woi mi.
27 Akulod’a mba d’i gum ad’u tcho mamba woyo,
andagad’a mba d’i kak djangûna ki sed’em mi.
28 Ahle suma avo hatama a mba kal leyo,
a mba dap pei kur bur ma Alona mba mi mba kayî mamina.
29 Wana ni wurak ka Alona nga mi ngomot yam sama asa’atnid’a,
ni djo ma Alona mi ngamzi kama mi.
© Azumeina Bible © Alliance Biblique du Tchad, 1999.
