Job mi de kua ala: Alona mi ar suma asa’atna hawa
1 Job mi de kua ala:
Ni kayam me ba, Ma ad’engêm kal petna mi de woi yam bur mam ma ka sariyad’a d’uo ge?
Ni kayam me ba, mam suma d’engzengâ a we bur máma d’uo ge?
2 Suma a nga djok agu ma ir hagad’ina woyo,
suma dingâ a nga kul aho’â, a nga poloziya.
3 A nga yo korona hi suma hokuyod’ina,
a nga ndamuzleina harop suma modonod’ina mi.
4 A nga vit suma houd’a woi kur lovota,
a nga orom suma hohou suma yam ambasina á ngei tazi ata yima tuna.
5 Gola! Azi ni d’igi koro ma abageina na,
a nga buzuk yorogo tcholol á hal tena.
Ni hur fulâ ba, a nga hal tena kua mi grozina.
*
6 A nga ngat hat ma ar hur asinenina,
a nga tchi hele guguzlud’a hi suma asa’atnid’a mi.
7 A nga bur kä andjege gandila bei baruna ataziya,
a nga ki borogo ma a tchugum kazi abo ab’lengina d’i.
8 Alo ma mi se yam ahinad’ina nga mi toziya,
a nga vabozi ata ahinad’a, kayam a nga fe yima ngei tazina d’i.
9 Suma a nga ve gor ma hokuyod’a woi avun apona,
a nga vahle suma denga abo sama houd’a mi.
10 Suma houd’a a nga arazi a tit gandila bei baruna ataziya,
a nga zi mbugulud’a hawunid’a, wan pî meid’a nga tchaziya.
11 Kur kangâna hi suma bei kud’or Alonina, a nga yor mbulâ kua,
a nga miret guguzlud’a, wani a nga tchat ti.
*
12 Suma a nga lá matnina a nga tchi hur azì ma ngolâ,
suma a fe dakina a nga tchi ki delezi akulo,
wani Alona mi tin nga humam
yam tcho mazi d’a b’lak ndrozina ndata d’i.
13 Suma asa’atna a nga min b’od’a d’i,
a nga we lovot mam mba nglod’a d’i,
a nga tit kur lovot mam mba gureid’a d’uo mi.
14 Ma tchi matna nga mi tchol akulo ki pipira
á tchi suma houd’a ki suma kid’aka woyo,
mi kul andjege mi.
15 Ma mizeuna nga mi tin iram á djup yima rumîd’a,
nga mi zlup ahlena iram mbeyo,
nga mi dala: Ni nge mi wan nge?
16 Suma kula a nga tcho ir gongîyona andjege,
a nga ngei tazi faleya,
a nga we b’od’a ki irazi d’i.
17 Yorogod’a ni nduvun nda matna iraziya,
a nga ve banad’a ni ki nduvunda.
*
18 Wani agi nga dagi ala:
Sama asa’atna mba mi dol lei
d’igi vama dol akulo yam mbinina na,
suma kur ambasina a gum yi mam ma kaka vuna.
Mam mba mi hle lovota á i ata yima guguzlud’a bugol luo d’a.
19 D’igi andaga d’a sod’a ki yima huwa’â a nga tche mbiyo nesâ na,
yima azuleina mba mi le ki suma tchona ni hina dedege mi.
20 Asuzi d’a vud’uzid’a mba d’i mar kaziya,
a mba mbut ni vama te ma djivina mi ndjuvulâ,
sa mba mi djib’er kazi d’uo d’a.
Gola! A nga kus sama asa’atna woi d’igi a kus tchagilaka woi na.
21 Sum ndazina a nga latcha d’a gendreged’a ndaka,
a nga le djivid’a matcha d’a modonod’a d’uo mi.
22 Hawa yak!
Alona kad’eng mamba nga mi ngom suma murud’umba,
nga mi tcholozi akulo ata yima azi djib’er ala azi dok kak ki arid’a d’uo d’angû na.
23 Mi nga mi hazi yima kak ma halasâ ki hur ma tinda,
mi nga mi tin iram yam lovot mazid’a mi.
24 A mba hle yazi akulo hina ndjö,
a mba dap pei d’igi suma petna na,
a mba kazi woi d’igi suma a ka yam awuna woi na mi.
25 Le hina d’uo ni, ni nge ba,
mba mi dala an ni ma ka zlad’a ba,
mi mbud’un zla manda zla d’a hawa yaka ge?
© Azumeina Bible © Alliance Biblique du Tchad, 1999.
