Job 42 - Azumeina Bible 1999 (MPG)

Job mi we wäd’u d’uo mamba

1 Job mi hulong mi de mi Ma didina ala:

2 An wala ang ndak á lahlena pet,

vama ang nga hurung kama,

vama d’eleng kam á led’ina nga d’i.

3 Ang dan ala: Ni nge ba, mi mbud’un nga hur mana nduvunda

ki zla d’a de d’a bei wat ad’ut babad’a ge?

Gagazi, an de ni bei wad’ud’a

yam ahle suma atchap suma kal kan

suma an ndak á wazi ad’uzi d’uo na!

4 Ang dan ala: Ang huma, an nga ni de!

An nga ni djobongû, ar ang van ad’ud’a!

5 Avoka an humung zlangî ki humanu,

wani ki tchetchemba, an wang wa ki iranu!

6 Ni kayam ndata ba, an ve tan ki zlad’a, an mbut hurunu;

ni kak kä aduk andaga d’a gugud’upa, aduk butna mi.

MA DIDINA MI HULONG TIN JOB BLANGÂM MA ADJEUNA

(42.7-17)

7 Kid’a Ma didina mi de zlad’a mi Job dad’a, mi de mi Elifas ma Teman-na ala: Hurun zal kang ki buniyông suma mbàna, kayam agi dagi nga zla d’a gagazid’a kan d’igi azong mana Job na d’i. 8 Ki tchetchemba, agi i yogï amuzleina kid’iziya ki gamlâna kid’iziya mi. Agi igi gen azong mana Job, i hagizi he d’a hawa d’a ngala. Azong mana Job mba mi tchen kagiya; an mba ni humumu, an mba ni lagi tchod’a yam lili magid’a d’i, kayambala agi dagi nga zla d’a gagazid’a kan d’igi azong mana Job na d’uo d’a.

9 Elifas ma Teman-na, Bildat ma Suwa-na ki Sofar ma Näma-na a i le d’igi Ma didina mi dazi na. Ma didina mi hum tchen nda Job mi tchenem kazid’a mi.

10 Bugol la Job mi tchen yam buniyôma tchenda, Ma didina mi hulongôm tinda kur djivi mam mba adjeud’a. Mi hulong mi hum ahlena yam ahle suma mam nga ki sed’ezi adjeu suma a ba woina kam kua mbàmbà. 11 B’oziyom suma andjofâ, b’oziyom suma aropma ki suma mam wazi adjeuna pet, a mbeï gevemu, a nga te ki sed’em avo hur aziyamu, a nga yoromu, a nga b’lengêm hurum yam ndak ka pet ta Alona mi mbamzi kamba. Nge nge pî mi hum kawei ma hapma tutu ki ngangam ma lora tutu he d’a hawad’a.

12 Ma didina mi b’e vunam yam kaka hi Job pa bugola kal kak mam mba avoka. Job mi nga ki tumiyôna 14.000, djambala 6000, amuzleina kakapa 1000 ki koro d’a aropma 1000 mi. 13 Mi vut gro andjofâ kid’iziya, grom suma aropma hindi mi. 14 Mi yi d’a avoka ala Jemima , ta mbàd’a ala Kesiya , ta hindid’a ala Keren-Hapuk mi. 15 Kur ambas ndata pet a nga fe arop suma djif suma d’igi Job grom ndazina na na d’i. Mi b’rawazi djona zlapa ki b’oziyozi suma andjofâ mi.

16 Bugol ahle ndazina, Job mi le bizad’a kis kam dok fid’i, mi we groma ki grom ngolona gak andjavam ma fid’ina. 17 Job mi mbut mamara kikra, mi mid’a.