Job mi hulong dala: Alona mi kalan kad’enga ngola
1 Job mi hulong dala:
2 Gagazi, an we woi tetet ala ni hina!
Ni nana ba, sana mi mbut sama d’ingêrâ avok Alona ge?
3 Le sana mi min á tchi tuguyod’a ki sed’emu ni,
mba mi hulongôm humba yam zla d’a de d’a dubud’a tu d’i.
4 Ned’a ni mamba, ad’eng nga kal teglesa ni mamba mi.
Ni nge ba, mi d’elem bei mi ngobom ge?
5 Nga mi djok ahinad’a woi bei ti we ba,
kur ayî mama nga mi ulozot ad’ut akulo kad’u.
6 Andagad’a nga d’i yir abomu,
ad’ut ta ged’a nga d’i giget mi.
7 Nga mi he vuna mafata, afata nga d’i deî d’i.
Nga mi duk vuna yam tchitchiud’a mi.
8 Ni mam tu ba, mi gang akulod’a sä akulo,
nga mi tit akulo yam abilâ halum ma ngolîna.
9 Ni ma lades tchitchiu d’a nglo d’a a yat ala Avevelâ,
ki d’a a yat ala Gro yuguneina d’a,
ki d’a a yat ala Gro azungeîna d’a,
kades dumus sa abo ma sutnid’a mi.
10 Mi lahle suma nglo suma sana mi ndak á wazi ad’uzi d’uo na,
ki suma yoyou suma a ndak á ndumba d’uo na mi.
11 Gola! Mi kal gevenu, wani an wum nga d’i!
Mi kal leyo, wani an wum nga d’uo mi.
12 Ni nge ba, mba mi hulong ve vama mam hluma ge?
Ni nge ba, mi dum ala: Ang le na ni me ge ge?
13 Alona nga mi ve vun ayî mama kä d’i;
suma yam mba ad’engina a nga hulong yazi kä avorom mi.
*
14 An mba ni hulong ded’a nana ge?
Zla d’a an mba ni manat ni dumzid’a ni d’a lara ge?
15 Le an mbut ni ma d’ingêrâ pî,
an ndak á hulongôm zla d’a ded’a d’i.
An mba ni tchen ni man ma ka sariyad’a ba, mi wan hohowonu.
16 Le an yiya, mi humun pî,
an nga ni we tetet tala mi tin humam á humun delenu d’a d’i.
17 Ni mam ba, nga mi ndjireben ndei ki babar ma ngolâ,
nga mi zulun mbuleina atan bei d’obot ba.
18 Mi nga mi aran an nga ni muzuk hina nde d’i,
nga mi oyôn ni ki hur ma hat ma tchona.
19 Le ni zla d’a ad’enga ni,
mam mi Ma ad’engêm kal petna!
Le ni zla d’a ka sariyad’a ni,
ni nge ba, mba mi i ki sed’em ata yima ka sariyad’a ge?
20 Le an ni sama d’ingêrâ pî,
vunan mba kan sariyad’a kanu.
Le an ni sama bei zlad’a kana pî,
vunan mba mi mbud’un sama zla nga kama.
21 Le an ni sama bei zlad’a kana pî,
an min kak ki iran ndi,
an gol tan is mi.
22 Ahlena pet a nabo tazi tu.
Ni kayam ndata ba, an ve tan á ded’a ala:
Mi nga mi tchi sama bei zlad’a kama woi mi na,
mi tchi sama zlad’a kama woi mi.
23 Le tugud’ei d’a tchod’a ti mba atogo zak ti tchi suma ni,
Alona nga mi san ad’u kuk ka ti kuk suma bei zlad’a kazinid’a.
24 Mi handagad’a abo suma asa’atna,
mi duk ir suma ka sariyad’a woyo!
Le ni mam mbuo ni, ni nge ge?
*
25 Burun mi kal atogo kal sama sunum ma ring atogo za’â,
mi kal bei mi we djivid’a ba!
26 Mi kal atogo d’igi bato d’a avavatna na,
d’igi b’aru ma sir asem kä yam vana á ved’ina na.
27 Le an dala: An mba ni djib’er yam tchi mana d’uo,
an mba ni ar yor ta manda woyo, an mba ni le furîd’a ni,
28 an nga ni le mandarâ abo ndak manda pet,
an wala ang Alona mba ndumun d’igi sama bei zlad’a kama na d’i.
29 Ni an ba, zlad’a mba d’i vanu!
Ni kayam me ba, an kau tan hawa hina yak ke?
30 Le an mbus tan ndei ki nesâ,
le an mbus abon ndei ki sabulâ pî,
31 ang mba hulong gan kä kur zul la dorbopma,
an mba ni mbut ni vama ndjendjed’a ir baru mana.
32 Alona mi nga ni sana d’igi an na ba,
an hulongôm zla d’a ded’a
tala ami imi ata yima sariyad’a tu d’a d’i.
33 Sama adigami ma kami ir zla mamid’a woi
ma mi tin abom kami dja’â nga d’i.
34 Ar Alona mi hle totogo mam mba nga mi ton ki d’a woi kanu,
ar mandar mama mi b’lagan djib’er manda d’uo mi.
35 Le ni hina ni, an ndak á dum zlad’a bei mandarâ ba,
wani nga hina d’i, kayam zla manda ni van tu.
© Azumeina Bible © Alliance Biblique du Tchad, 1999.
