Burâ hi Ma didinina mi ar wa go
1 Agi bugi adifa kur Siyon,
agi tchagi wulula akulo
yam ahina man nda a tinit irat vata.
Ar suma a nga kaka yam ambasina pet a zlaga!
Kayam burâ hi Ma didinina nga mi djïya,
mi ar wa go mi.
2 Ni bur ma nduvunda, ni bur ma wura ma i’îli’â,
ni bur ma d’ugula, ni bur ma akukutna.
Nga mi djï d’igi yina mi fo woi yam ahuniyôna na.
Gola! Nades ahle suma b’lak ahlena ablaud’a,
ad’enga heî mi.
Ades ahle suma hina na a mba nga yazi tu d’i,
a mba mba bugol kur atchogoi
d’a mba d’i mbad’a d’uo mi.
3 Akud’a nga d’i ngal avoroziya,
sin akud’a nga d’i trâ blogozi mi.
Andagad’a tavorozi
ni d’igi asine ma Eden-na na,
ti mbut blogozi
ni d’igi hur ful ma d’ad’auna na mi.
4 Ang golozi ni d’igi akulumeina na,
a nga djang d’igi suma djang
akulumeina a djangâzi na mi.
5 Ang ala ni siwela hi pus ma dur ayî
ma nga mi pir akulo yam ahuniyônina na,
d’igi siwela hi sin aku d’a
nga d’i ngal kuzad’id’a na,
d’igi andjaf suma ad’eng suma
a ndjar á dur ayînina na mi.
6 Suma pet a nga zlak avoroziya,
irazi d’i mbut tei mbolol mi.
7 Azi nga ring d’igi grang suma durâ na,
azi nga djak akulo yam gulumuna
d’igi suma dur ayîna na.
Nge nge pî mi hle ni lovot mamba,
sa nga mi d’es sei kur lovot mamba d’i.
8 Nge nge pî nga mi zut ndram mbi,
nge nge pî mi hle ni lovot mamba,
azi nga tchila yam ahle suma
ayîna bei d’elezi ba.
9 Azi ndja abozi hur azì ma ngolâ,
a nga ring akulo yam gulumuna,
a nga tchuk klavi hur gongîyona
ir fenetred’a d’igi suma kula na.
10 Andagad’a nga d’i yir avoroziya,
akulod’a nga d’i giged’a,
afata ki tilâ a mbut nduvunda,
tchitchiud’a nga d’i wile d’uo mi.
11 Ma didina mi de zlad’a woi
avok adesâ hi azigar mamina,
kayam ades azigar mama
mi kal ablaud’a heî, ni vama mandarâ mi.
Gagazi, burâ hi Ma didinina
ni bur ma ngolâ, ni vama mandarâ mi.
Ni nge ba, mba mi tchol kur bur máma ge?
Yina mba wa á hulongî gen Ma didina
12 Ma didina mi dala: Ki tchetchemba,
agi hulongôgï geven ki hur ma tuna,
agi d’elegi tagi bei te tena,
agi tchigiya, agi gagi horâ mi.
13 Agi hawâgi ni baru magina d’i,
wani agi hawâgi ni hurugiya.
Agi hulongôgi gen Ma didina Alo magina,
kayam mam mi ma sumad’a,
ni ma we hohowa sumina,
nga mi mbut ayîna atogo d’i,
ni ma o mamba nga d’i dap puo na,
nga mi ar ngop pa mam nga hurum kat á ngopid’a woyo.
14 Dam mba mi ar ngop mam ndata woyo,
mba mi lagi djivid’a.
Ata yi máma agi mba mbagi ki he d’a hawa d’a afuta
ki d’a süm guguzlud’a mi.
D’el tad’a bei te tena á tchen Ma didinid’a ti mba wa
15 Agi bugi adifa kur Siyon,
agi tchagi wala yam bur ma d’el ta d’a bei te tenid’a,
agi yagi tagi á togogi tok ka a tinit irat vata.
16 Agi togogi suma á togogi tok ka a tinit irat vata,
agi togogi suma nglona ki kemba
ki gugurei suma tchapona mi.
Ar sama tel atchad’a awilina kamam mba mi teleta
a buzuk kei kur gong mazi d’a burâ.
17 Ar suma ngat buzu suma a le sunda mi Ma didinina
a tchi kur gong mam mba kud’ora
aduk vun agre’â ki yima ngal ahle suma ngat buzuna,
ar a dala: Ma didina, ang ngom sum mangâ,
ar suma ang tazi djonina a mbut zulona
tala andjaf suma dingâ a te kaziya d’a d’i.
Ni kayam me ba, a mba de kazi aduk andjaf suma dingâ ala:
Alo mazina mi nga ni lara ge ge?
MA DIDINA MBA MI HULONG LAZI DJIVID’A
Ma didina mi hulong humba mi sum mama
18 Ma didina nga mi hat hurum yam sum mama,
nga mi wazi hohowozi mi.
19 Ma didina mi hulongôzi humba,
mi de mi sum mama ala:
Gola! An nga ni sunugi gemena,
süm guguzlu d’a awilid’a ki mbulâ.
Agi mba hobogiya.
An mba ni aragi á mbut zulona
aduk andjaf suma dingâ d’uo d’a.
20 An mba ni dik magi suma djangû
suma abo ma norâ woi dei,
an mba ni digizi gak ni izi hur fulâ
yam andaga d’a so d’a gangrasa.
An mba ni dik azigar mazi suma avo’â
irazi abo ma ir apo d’a Matnina,
an mba ni dik azigar mazi suma bugolâ
irazi abo ma ir alum ma ngol ma Mediterane-na mi.
Mad’azi mba mi bua,
mba mi b’ik hisâ kä b’ib’ik.
An mba ni lazi hina,
kayamba azi lagi tchod’a ngola heîd’a.
21 Andagad’a, ar ndak le mandar ri,
ndak le furîd’a kayam Ma didina
mi lahle suma nglona!
22 Ahle suma abageina, ar agi lagi mandar ri.
Yima te hat ma hur fulîna nga mi d’uva,
aguna nga mi vud’a,
tulumeina ki guguzlud’a a nga hô vuta hôhô mi.
23 Agi suma Siyon-na, agi lagi hur ma hapma,
agi lagi furîd’a yam Ma didina Alo magina,
kayam mam nga mi sagi alona ata yamu,
nga mi sagi alo ma hod’ogeid’a
kalo ma dabid’a d’igi avok deid’a na.
24 Yima to awuna mba mi oî kawuna,
zul la miret guguzlud’a mba d’i oî
ki süm guguzlu d’a awilid’a ki mbulâ,
a mba sulul kä woi mi.
25 An mba ni wuragagi
yam biza d’a dodob’odjod’a ki djera
ki teb’rezena ki djer galagana
suma an sunuzi á b’lagagi ahligiyegi woi kuad’a.
26 Agi mba tagiya,
agi mba hobogiya,
agi mba gilen an Ma didina Alo magi
ma mba mi lahle suma atchapma kagina.
Agi sum mana,
agi mba mbud’ugi zulona d’uo d’a.
27 Agi mba wagi ala an nga aduk Israel-lâ,
an ni Ma didina Alo magina.
Ma ding nga d’i.
Agi sum mana,
agi mba mbud’ugi zulona d’uo d’a.
Ma didina mba mi vo Muzuk mama yam suma pet
28 Ma didina mi dala:
Bugol ahle ndazina,
an mba ni vo Muzuk mana yam suma pet.
Grogi suma andjofâ ki grogi suma aropma a mba djok vuna,
momorogei magina adïd’a mba d’i daziya,
azungeî magina ahlena a mba nde tazi woi irazi mi.
29 Kur bur máma an mba ni vo Muzuk mana
yam azungeîna ki yuguneina.
30 An mba ni lahle suma atchapma
kur akulod’a, kä yam andagad’a mi,
nala, buzuna, akud’a kandos ma tchola gozongâ.
31 Afata mba d’i mbut nduvunda,
tilâ mba mi mbut buzuna
avok mbad’a hi burâ hi Ma didininid’a.
Bur máma ni bur ma ngolâ,
ni bur ma mandarâ mi.
32 Ata yi máma sama lara pî
ma mba mi yi Ma didina á ndjunuma,
mba mi fe suta,
kayam a mba fe yima ngeid’a
yam ahina d’a Siyon-nda avo Jerusalem
yam suma a mba sutna
d’igi Ma didina mi de na.
Ni suma mam mba mi yazi á sutina.
© Azumeina Bible © Alliance Biblique du Tchad, 1999.
