Kur kulufâ, Jonas mi tchen Alona
1 Ma didina mi sun kuluf ma ngolâ atogo zak, mi lik Jonas; mi le burâ kurum falei hindi andjege hindi. 2 Jonas mi nga kur kulufâ, mi tchen Ma didina Alo mama.
3 Mi dala:
Ma didina, kur ndak manda an yangû;
ang hulongôn humba.
Ata yima azuleina
an yang ala ang ndjununu,
ang humun delenu.
4 Ang gan kä kur galileina halumina,
mbiyo ma djangâ mi nguyunu,
abil mangâ nga mi kal akulo kanu.
5 An djib’er ala:
Ma didina, ang digin wa woi dei avorongû.
Wan pî, an mba ni gol gong mang nga kud’ora kua.
6 Mbina mi mban kelen ta,
alum ma ngolâ mi hlubunu,
tchereuna mi heben yan kä mi.
7 An sir kä ad’u ged’a hahinad’id’a,
vun azì ma azuleina mi nga duka kan ngingi.
Wani Ma didina, Alo mana,
ang tcholon akulo woi kur zula karid’a.
8 Ata yima an nga ni lá matnina,
an djib’er kangû.
Ma didina, tchen man nda an tchenenga,
ang humunï kur gong mang nga kud’ora.
9 Suma a nga kud’or filei ma hawa ya’îna,
a wal lei dei ki ang ma ndak á sud’uzina.
10 Wani anu, an mba ni le mersi,
an mba ni hang he d’a hawa d’a ngat buzuna,
an mba ni ndak vun vun ma hle ma an hlangzina.
Gagazi, suta ti tcholï nata ang Ma didina!
11 Ma didina mi he vuna mi kulufâ, mi vin Jonas sei avun gongôd’id’a.
© Azumeina Bible © Alliance Biblique du Tchad, 1999.
