Jonas mi yor tamu; Ma didina mi ngobomu
1 Wani zla ndata ti le nga Jonas tam djivi d’i, mi mbut ayîna. 2 Mi tchen Ma didina, mi dum ala: Ma didina, wana ni zla d’a an dat kurun kid’a an sä yam ambas mandid’a d’uo zu? Ni kayam ndata ba, an hal lovota atogo zak á ring Tarsis, kayam an we angî Alo ma djivi ma we hohowa suma, hurung nga mi zal atogo d’i, djivi manga kal ngola heî mi. Angî ma nga djok djib’er manga yam vama ang ngam kurung á led’ina. 3 Ki tchetchemba, Ma didina, ang tchanu! An mit pî ni hotei, kal la an kak ki iranda!
4 Ma didina mi hulong dum ala: Hur mang ma zal máma nata yat tchu?
5 Jonas mi nde woi kur azina, mi i kak abo ma yorogona, mi ve zlub’ud’a, mi kak kuru, nga mi djup á we vama mba mi le kazì mámina. 6 Ma didina Alona mi deî terera ti wul angusâ akulo yam Jonas á b’lengêm hurum yam hur mam ma zala. Jonas mi le furîd’a ngola yam terer ndata. 7 Tcha yorogod’a Alona mi sun ndjuvulâ mi mut sidei terera, ti so woyo. 8 Kid’a afata deîd’a, Alona mi mba ki simet ma hluruk d’igi d’üguna na na. Afata ti nde yam Jonas, mi seyâ, mi tchen Alona ala mi tchumu. Mi dala: An mit pî ni hotei, kal la an kak ki iranda!
9 Alona mi de mi Jonas ala: Hur mang ma zal ma yam terer ndatina nata yat tchu?
Jonas mi hulong dum ala: Nata yad’u! An zal hurun gak matna!
10 Ma didina mi de mi Jonas ala: Ang hurung hat yam terer ra ang le nga sun kat tuo, ang wulut nga ni ang nguo mi d’a. Ti deî ni kur bur ma tuna, ti so woi ni kur bur ma tuna mi. 11 Ang min ala an we hohowa azì ma ngol ma Ninif ma suma kuruma kal dudubud’a kis yam dudubud’a dok mbà suma a we nga a wal ir djivid’a ki tchod’a d’uo na zlapa ki d’uwar ma ablauna mi d’uo zu?
© Azumeina Bible © Alliance Biblique du Tchad, 1999.
