HLED’A HAMBAS SA KANAN-NDA
Josue mi vrak balum Moise
1 Kid’a Moise azongâ hi Ma didinina mi mit da d’a, Ma didina mi de mi Josue Nun goroma azongâ hi Moise-sâ ala: 2 Azong mana Moise mi mit da’. Ki tchetchemba, ang tchol akulo, ang i djak alum ma Jurdê ma wana, ang ki sum ndazina pet, agi igi yam ambas sa an nga ni hat mi Israel-lîd’a. 3 Ata yima lara ma agi mba tinigi asegi kuana, an mba ni hagizi d’igi an de mi Moise na. 4 Haga magid’a mba d’i tinï ad’ud’a hur fulâ abo ma sutna gak ti mba yam ambas sa Liban-nda abo ma norâ, ti kal gak ti i avun alum ma Efrat-na yam andagad’a hi suma Het-nid’a pet abo ma yorogona gak ti mba avun alum ma ngol ma Mediterane-na abo ma fladegena. 5 Ata yima ang nga ki irang yam andagad’ina, sama mba mi tchol avorongâ nga d’i, kayam an nga ki sed’eng d’igi an nga ki Moise adjeu na. An mba ni arang vang ngi, an mba ni arang ngei d’uo mi. 6 Ang ve tang ad’enga, ang so tangû, kayam ni ang ba, mba i ki sum ndazina yam ambas sa an gun tan kat mabuyozi ngolo á hazizid’a. 7 Wani ang ve tang ad’enga, ang so tangû, ang ngom gat ta pet ta Moise azong mana mi hang vuna kata, ang tit kat mi. Ar ang i abo ma ndjuf foze abo ma gula d’uo mi. Hina wani, ang mba fahlena pet suma ang mba lazina. 8 Ar ang wal lei ki mbaktumba hi gatid’a d’i, ang dugud’ot ndumba á djib’er kat andjege ki falei á ngomot á tit yam ahlena pet suma a b’irizi kuana. Hina wani, ang mba ndak vun ahlena pet suma ang mba lazina, ang mba fazi mi. 9 Ni an ba ni hang vuna d’uo zu? Ang ve tang ad’enga, ang so tangû, ang le mandar ri, ang ar vunadigang pat tuo mi. Kayam an Ma didina Alo mangâ ni nga ki sed’eng ata yima lara ge pet ma ang mba i kuana.
Josue mi min tam á djak alum ma Jurdê-na
10 Josue mi he vuna mi suma avok sumina ala: 11 Agi igi kur kangâ, agi hagi vuna mi suma, agi dazi ala: Agi minigi tagi kahle suma tena, kayam ar burâ hindi agi mba djagagi alum ma Jurdê ma wana á hlambas sa Ma didina Alo magina nga mi hagizid’a.
12 Josue mi de mandjafâ hi Ruben-na kandjafâ hi Gad-na kabo andjafâ hi Manase-na ala: 13 Agi djib’eregi yam zla d’a Moise azongâ hi Ma didinina mi dat ata yima mi hagi vunina ala: Ma didina Alo magina mi hagiya wa tuk tad’a, mi hagiya wa ambas sa wanda da d’a. 14 Amiyôgina ki grogina ki d’uwar magina a mba ar ka hî yam ambas sa Moise mi hagizi abo alum ma Jurdê-na ka hid’a. Wani agi suma dur ayîna pet, agi tchugugi tagi avok b’oziyogina, agi ndjunuzi 15 gak Ma didina mi hazi tuk tad’a d’igi mi hagizi mi agi na mi. Ar azi hlambas sa Ma didina Alo magina nga mi hazizid’a tua ba, agi hulongôgi á kagagi yam ambas sa Moise azongâ hi Ma didinina mi hagizi abo alum ma Jurdê-na ka hî abo ma yorogonid’a tua.
16 Azi hulong de mi Josue ala: Ami mba lami ahlena pet suma ang hami vuna kazina. Ata yima lara ma ang mba sunumi kuana, ami mba imi kua mi. 17 Ami mba gami yami kä avorong d’igi ami gami yami kä avok Moise na. Ar Ma didina Alo mangâ mi kak ki sed’eng d’igi mi kak ki Moise adjeu na mi. 18 Sama lara ma humung nga vunang nguo, mi ge nga yam kä ad’u vun ma he ma ang mba huma pet tuo na, a tchum mbeyo. Wani ang ve tang ad’enga, ang so tang mi.
© Azumeina Bible © Alliance Biblique du Tchad, 1999.
