Dur ma Merom-ma
1 Kid’a Jabin ma Hasor-râ mi hum zla kus sa Josue mi kus ayînid’a, mi ge sunda ata Jobap amul ma Madon-na, ata amul ma Simron-na, ata amul ma Akesaf-fâ. 2 Mi ge sunda ata amulei suma a nga kaka yam ahinad’a abo ma norâ kä kur hor ra Jurdê-d’a abo ma sutna hapo d’a Kineret-ta kä ata yima ligitim ma go ki Dor abo ma fladegenina, 3 zlapa ki suma Kanan suma abo ma yorogona ki suma abo ma fladegena, ki suma Amor-râ, ki suma Het-na, ki suma Peris-sâ, ki suma Jebus suma a nga kaka yam ahinad’ina, ki suma Hef suma a nga ad’u ahina d’a Hermon-nda yam ambas sa Mispa-d’ina. 4 Azi buzuk kei ki azigar mazina pet, a tok tazi ablaud’a mimiyâk d’igi les ma avun alum ma ngolîna na, kakulumeina ki pus ma dur ayîna ablaud’a heî mi. 5 Amulei ndazina ki zla tazi pet a tok tazi a mba ve kang mazina ata yima tuna avun mbiyo ma teteng ma Merom-ma á dur Israel-lâ.
6 Ma didina mi de mi Josue ala: Ang lazi mandarazi d’i! Avin aboina hina dedege, an mba ni hangzi abong pet, an mba ni duruzi mbuleina, an mba ni tchazi avok Israel-lâ. Ang mba kazi gigling akulumei mazina, ang mba ngalazi pus mazi ma dur ayîna woi mi.
7 Josue azi ki mam suma dur ayîna a mba nde kazi durâ avun mbiyo ma teteng ma Merom-ma dumuzi. 8 Ma didina mi hazi abo Israel-lâ. A duruzi abo ma norâ gak a mbaza Sidon kur azì ma ngolâ, gak a mba Misrefot-Mayim, gak a mba kur hor ra Mispa-d’a abo ma yorogona. A tchazi tchi d’a tchod’a bei ar sa tu ba. 9 Josue mi le ki sed’ezi d’igi Ma didina mi hum vuna na. Mi ka gigling akulumei mazina, mi ngalazi pus mazi ma dur ayîna woi mi.
Josue mi hlazì ma ngol ma Hasor-râ
10 Kid’a Josue mi hulongîd’a, mi hlazì ma ngol ma Hasor-râ. Mi tchi amul mama woi ki mbigeu d’a fiyaka, kayam adjeu Hasor nazì ma ngol ma kur leu ndatina. 11 Mi tchi suma kurâ woi pet, mi ar nga vama muzuk bei tchi tu d’i, mi ngal azina woi mi. 12 Josue mi yo azì ma nglona kamulei mama, mi tchazi woi ki mbigeu d’a fiyaka bei mi ar sa tu ba d’igi Moise azongâ hi Ma didinina mi hum vuna na. 13 Wani azigar suma Israel-lâ a ngal nga azì ma ngol ma a minim akulo yam ahuniyônina d’i; Josue mi ngalî azì ma ngol ma Hasor-râ hol. 14 Israel-lâ a yo ahle suma a hurumuzi kur azì ma nglo mamina pet ki d’uwarâ mi. Wani a dap suma tchid’a woi pet bei ar vama muzuk tu ba 15 d’igi Ma didina mi he vuna mazong mama Moise na. Moise mi djok vun ma he máma mi Josue; Josue mi ndak vun vun ma he máma, mi ar nga vama Ma didina mi he vuna kam mi Moise-sâ kä bei le tu d’i.
Josue mi dap ambas sa yod’a
16 Josue mi yo ambasa pet, d’a yam ahuniyônid’a, d’a abo ma sutnid’a, d’a Gosen-nda, d’a kä ata yima ligitimid’a, d’a kä kur hora halum ma Jurdê-nid’a ki d’a yam ahuniyôna, ki d’a hur fula abo ma norîd’a mi. 17 Mi tinï ad’ud’a yam ahina d’a va nga kat tuo d’a dei gak mba Seir, mi kal gak mi mba Bäl-Gad kur hor ra Liban-nda kä ad’u ahina d’a Hermon-nda. Mi yo amulei suma kur ambas ndatina pet, mi dabazi tchid’a woi pet mi. 18 Josue mi dur ayîna ngola kamulei ndazina. 19 Azì ma ngol ma sum mama a djin vunazi ki Israel-lâ yam b’leng nga halasina nga d’i, ni suma Hef suma a kak kur Gabawon-na hol. Azì ma pet wana mi yomî kayî ma durâ. 20 Kayam ni Ma didina ba, mi b’alazi huruzi á dur ayîna ki Israel-lâ kayambala Israel-lâ a dabazi tchid’a woi bei wazi hohowozi d’igi Ma didina mi he vuna mi Moise na d’a.
21 Ata yi máma Josue mi i dur suma Anak suma a nga kaka yam ahuniyônina, nala, suma Hebron-na, suma Debir-râ, suma Anap-ma kazì ma pet ma yam ahuniyô suma Juda-na ki ma yam ahuniyô suma Israel-lîna mi. Mi dabazi tchid’a woi kazì mazi ma nglona pepet. 22 Sama Anak mi ar nga yam ambasa hi Israel-lîd’a d’i; a arî avo Gaza ki Gat ki Asdot hol. 23 Josue mi yo ambasa pet d’igi Ma didina mi he vuna mi Moise na. Josue mi b’rau ambasa mi Israel-lâ ad’u andjavaziya, ad’u andjavaziya. Ata yi máma ambasa kak ki halasa bei durâ.
© Azumeina Bible © Alliance Biblique du Tchad, 1999.
