Josue mi sun suma d’u yina mbà avo Jeriko
1 Kid’a azi nga Sitim-mba, Josue Nun goroma mi sun suma d’u yina ngumun mbà, mi dazi ala: Agi i d’ugi ambasa kazì ma Jeriko-na. Azi iya, a mbaza, a kal avo hatcha d’a gaulangâ a yat ala Rahap, a bur kua.
2 Suma a mba de mamul ma Jeriko-na ala: Gola! Israel-lâ a mbeï ka andjege wana á we fed’a suma kur ambasina.
3 Ata yi máma amul ma Jeriko-na mi tchuk suma sunda ata Rahap, a dat ala: Ndak buzugumï suma a mba tchuk avo hata’â woi abua. Kayam azi mba ná we fed’a suma kur ambasina pet.
4 Wani atcha ndata ti yo suma mbà ndazina, ti i ngeyeziya, ti de mi suma hamulîna ala: Gagazi, sum ndazina a mba avo hatanu, wani an we nga yima azi tcholï kuana d’i. 5 Ata yima yina mi ve tam duka kid’a suma a nga duk vun agre’îd’a, sum ndazina a buzuga. An we nga yima a i kuana d’i. Agi b’ad’agi blogozi atogo, agi mba faziya!
6 Doli na ni d’igi ti djak wa ki sed’ezi akulo yam gonga, ti ngeyezi kä ad’u akei d’a ti ndjat yam gongid’a. 7 Suma amulâ mi sunuzi ndazina a i bugol sum ndazina kur lovot ta i avun alum ma Jurdê-nid’a, gak a mbaza ata yima suma a djak mbina kua kasezina. Kid’a a buzuk kei a i blogozid’a, a duk vun agre’â akulo. 8 Kid’a suma d’u yina a nga bei bur kä tua d’a, Rahap pi djak akulo gevezi yam gonga, 9 ti dazi ala: An wala Ma didina mi hagiya wa ambas sa wanda abogiya; mandaragi mi vamiya wa batei. Suma kur ambas sa wandina pet a tchuk wa susub’ok abogiya. 10 Kayam ami humumi ala kid’a agi buzugugï woi kur Ezipte-d’a, Ma didina mi so alum ma ngol ma Tchereuna woi avorogiya. Bugola, ami humumi zla d’a agi lat kamulei suma Amor suma mbà suma a nga te leud’a sä abo alum ma Jurdê-na woi hina, nala, Sihon azi ki Ok suma agi tchazi woi bei wazi hohowozi ba na. 11 Ata yima ami humumi zla ndatina, ad’engêmi nga d’uo d’a. Nge nge pî hurum ka mbina avorogiya, kayam Ma didina Alo magina nAlo ma sä kur akulod’ina ni Ma yam andagad’a ka hina mi. 12 Ki tchetchemba, agi gunun tagi ki simiyê Ma didina tala agi lagi djivid’a ki sum mana d’igi an le djivid’a ki sed’egi na mi d’a, agi tagan vama simat ma mba mi kak vama simat ma gagazinina. 13 Agi hlan vunagi ala agi mba aragi abun azi kasun ki b’oziyon suma andjofâ ki b’oziyon suma aropma kahle mazina pet bei tchid’a, agi sud’umi woi avun matna mi.
14 Sum ndazina a dat ala: Le ndak dami nga zlami woi d’uo ni, ami arami go á hami tami kagiya. Fata Ma didina mi hami ambasid’a, ami mba lak djivid’a ki d’engzenga mi.
15 Ti sirizi kä ir fenetred’a ki ziyona, kayam aziyat nga ni yam gulumuna hazinina abo ma woi abuna. 16 Ti dazi ala: Agi i ngeyegi tagi yam ahinad’a abo suma a nga digigina, agi ngeyegi sä kua burâ hindi gak suma a digigina a hulong avo tua ba, agi hlagi lovot magid’a, agi igiya.
17 Sum ndazina a dat ala: Vama ami mba lum ma gun nda ami gunuk tamid’a mba d’i vami d’uo d’a ba wana: 18 Gola! Fata ami mbami kur ambasid’a, ndak djin ziyo ma hleuna ir fenetre d’a ndak sirimi kä kuad’a, ndak tok sum ma’â pet avo hatagu, nala, abugu, asugu, ki b’oziyo’â. 19 Sama lara ma mi nde woi avun agrek ma’îna, buzuwamî kam mam tamba. Wani le sa adigami mi tin abom ata sama nga avo hata’â ni, buzuwamî kamiya. 20 Wani le ndak de woi kamiya ni, gun nda ami gunuk tamid’a mba d’i vami d’i.
21 Ndat ti dazi ala: Ar agi lagi d’igi agi hlan vunagi na. Ti arazi a iya, ndat ti djin ziyo ma hleuna ir fenetred’a mi. 22 Azi iya, a mbaza yam ahinad’a, a ngei tazi kua burâ hindi gak suma a digizina a halazi tatâ, a fazi nga d’i, a hulong avo. 23 Suma mbà ndazina a tchuk asezi kä woi yam ahinad’a, a djak alum ma Jurdê-na, a mbaza gen Josue Nun goroma. A vum ad’u ahlena pet suma a le ki sed’ezina.
24 Azi de mi Josue ala: Gagazi, Ma didina mi hei wa ambas ndata aboya; suma kur ambasina pî a nga zlak avorei mi.
© Azumeina Bible © Alliance Biblique du Tchad, 1999.
