Josue 3 - Azumeina Bible 1999 (MPG)

A djak alum ma Jurdê-na

1 Josue ki Israel-lâ a tchol Sitim ki yorogo tcholola, a i avun alum ma Jurdê-na. A bur kua á djak aluma. 2 Kur bur ma hindina, suma nglo suma avok sumina a i kur kangâ, 3 a he vuna mi suma ala: Ata yima agi wagi wa suma ngat buzu suma hi Levi suma a nga zi zanduk ma vun ma djinda hi Ma didina Alo maginina mi nga kuana a tchol á id’ina, agi tchologi ata yi magi ma agi nga kuana, agi igi ad’uziya. 4 Wani agi aragi adigagi d’a ki zandu’îd’a d’igi kilometred’a tu na, agi hud’ugi go ki sed’em mbi. Hina wani, agi mba wagi lovot ta agi mba hlata. Kayam agi hlagi nga lovot ndata yagi tu d’i.

5 Josue mi de mi suma ala: Agi mbud’ugi tagi yed’et. Kayam ndjivin Ma didina mba mi le sun nda atchapma adigagiya.

6 Josue mi de mi suma ngat buzuna ala: Agi hlagi zanduk ma vun ma djinda hi Ma didinina mi nga kuana, agi kalagi avok suma. A hlumu, a nga tit avok suma mi.

7 Ma didina mi de mi Josue ala: Ini an nga ni tin ad’ud’a á tagang ngol manga woi avok Israel-lâ pet, kayam azi wala an nga ki sed’eng d’igi an nga ki Moise adjeu na mi. 8 Ang he vuna mi suma ngat buzu suma a zi zanduk ma vun ma djinda hi Ma didinina mi nga kuana ala: Le agi mbagiza wa avun alum ma Jurdê-na ni, agi i tchologi adigam mba d’ad’ara.

9 Josue mi de mi Israel-lâ ala: Agi hud’ugi ka hî go, agi humugi zlad’a hi Ma didina Alo maginid’a. 10 Mi dazi kua ala: Agi mba wagi woi ala Alo ma bei matna mi nga adigagiya, mba mi dik suma Kanan-na, suma Het-na, suma Hef-fâ, suma Peris-sâ, suma Girgas-sâ, suma Amor-râ ki suma Jebus-sâ woi avorogiya. 11 Gola! Zanduk ma vun ma djinda hi Ma didin ma Sala andagad’ina mi nga kuana sä mi djak aluma avorogi wana. 12 Agi yogi suma ad’u andjafâ hi Israel-lîna dogo yam mbà, agi hlagi sana ad’u andjafâ gagang. 13 Ata yima suma ngat buzu suma a nga zi zandu’â hi Ma didin ma Sala andagad’ina a mba tin asezi kä kur alum ma Jurdê-nina, mbiyo alum ma Jurdê-na mba mi wal lei aduk mbà; mbiyo ma tcholï akulo yam ahinad’ina mba mi tchol lei gongzong d’igi dadamana na.

14 Kid’a suma a buzuk kei kur zlub’u mazid’a á djak alum ma Jurdê-nid’a, suma ngat buzu suma a nga zi zanduk ma vun ma djinda hi Ma didinina mi nga kuana a nga tit avoroziya. 15 Yima suma a fet awuna kuana ni yima alum ma Jurdê-na nga mi kus seina. Kid’a suma ngat buzu suma a nga zi zandu’â a mba avun alum ma Jurdê-na a nik asezi aduk mbinid’a, 16 ata yi máma mbiyo ma nga mi djangî akulo yam ahinad’ina, mi tchola, mi tchol lei gongzong d’igi dadamana na, adigazi woi dei kazina hi Adam-ma, nazì ma ngol ma go ki Sartan-na. Mbiyo ma nga ni djang iram abona hapo d’a Matnid’a, mi wal lei aduk mbà. Israel-lâ a djak ngagad’a yam Jeriko d’ar. 17 Suma ngat buzu suma a nga zi zandu’â hi Ma didinina a nga tchola hur alum ma Jurdê-na asezi sod’a tching tching. Israel-lâ pet a nga djak aluma kasezi sod’a, gak a dap djaka woi pet mi.