Josue 7 - Azumeina Bible 1999 (MPG)

Akan mi le tchod’a; Alona mi ngobomu

1 Israel-lâ a le tchod’a ngola kahle suma a d’el kazi ala a yozi d’uo na. Sana tu ad’u andjafâ hi Juda-na a yum ala Akan mam mi Karmi ma Zapdi goromina goroma, abum ngolo ni Zera, mi yo ahle suma Ma didina mi d’el kazina. Ni kayam ndata ba, Ma didina hurum zal ngola yam Israel-lâ.

2 Navo Jeriko ba, Josue mi sun suma Aï d’a nga go ki Betel-Aven-nda abo ma yorogona hi Betel-la. Mi dazi ala: Agi i d’ugi ambasa. Sum ndazina a i a d’u Aï, 3 a hulongîya, a mba de mi Josue ala: Ar azigarâ a i pet ti. Ar suma 2000 d’oze 3000 a i á dur Aï; ar a kau suma pet ti, kayam suma djangûna a nga ngol li.

4 A sun azigarâ go ki 3000 á dur Aï, wani azi ring avok suma Aï-na. 5 Suma Aï-na a tchi suma adigazi ni go ki dok hindi yam karagaya. A tinizï dika ei avun azì ma ngolâ dei mba Sebarim, a tchazi ata yima azi nga b’at sulugota kä na. Ata yi máma suma pet tazi tchuk susub’ok, huruzi ka mbina mi.

6 Josue ki suma nglo suma Israel-lâ, a haû baru ma atazina woyo, a tchuk andagad’a kaziya, a grif kä andaga ki irazi avok zandu’â hi Ma didinina, a ar bur kä ata yi máma gak fladege. 7 Josue mi dala: A! Salad’a Alo mamina! Ni kayam me ba, ang djagami alum ma Jurdê-na woi á hami abo suma Amor-râ á tchami woi ge? Ladjï ami kagamiza abo alum ma Jurdê-na sä hî ni, hotei d’uo zu? 8 Ma didina, ki tchetchemba, ami Israel-lâ nga ringîmi avok mazi suma djangûna wanda; an de nana mi d’ang nge? 9 Suma Kanan-na ki suma yam ambas sa dingina pet a mba huma, a mba tok tazi kamiya, a mba dabami woi yam andagad’a. Ang mba le ni nana ba, simiyêng ma kal teglesâ mba mi yi d’ang nge?

10 Ma didina mi de mi Josue ala: Ni kayam me ba, ang ge tang kä andaga ge? Ang tchol akulo! 11 Israel-lâ a le tchod’a, a but vun ma djin ma an hazi vuna kama woyo, a yo ahle suma an d’elezi kazi ala azi yozi d’uo na, a kuluziya, a ngeyezi nga aduk ahle mazina. 12 Kayam ndata, Israel-lâ a ndak á tchol avok mazi suma djangûna d’i, a mba ringî avok mazi suma djangûna hina baba, kayam azi mbut ni d’igi ahle suma an he vuna kazi á b’lagazi woina na mi. Le agi b’lagagi nga ahle ndazina woi adigagi d’uo ni, an dok ni kak ki sed’egi d’uo d’a! 13 Ang tchola akulo, ang mbut suma yed’et, ang dazi ala: Ndjivin agi mbud’ugi tagi yed’et, kayam Ma didina Alona hi Israel-lâ mi dala: Ahle suma an d’el kazi ala agi yozi d’uo na, a nga adigagiya. Le agi yogi nga ahle ndazina woi adigagi d’uo ni, agi ndak á tchologi avok magi suma djangûna d’i. 14 Avin yorogo agi mba hud’ugï nad’u andjafâ ad’u andjafâ. Andjaf ma an Ma didina mba ni manama, mba mi hud’ï adesâ ad’u adesâ. Ades ma an Ma didina mba ni manama, mba mi hud’ï ki sum mama ki sum mama. Sama an Ma didina mba ni manama, sana mba mi hud’ï ni tutu. 15 Sama an Ma didina mba ni gum ad’um mbei ni fahle suma an Ma didina ni d’el kazina avo hatama, a mba ngalam mbei kakud’a kahle mama pet, kayam mi but vun ma djinda hi an Ma didinina woyo, mi le ni tchod’a aduk Israel-lâ mi.

16 Josue mi tchol ki yorogo tcholola, mi mba ki Israel-lâ ad’u andjafâ ad’u andjafâ. Ma didina mi man andjafâ hi Juda-na. 17 Mi hud’ï andjafâ hi Juda-na ad’u adesâ ad’u adesâ. Ma didina mi man adesâ hi Zera-na. Mi hud’ï adesâ hi Zera-na ki sum mama ki sum mama. Ma didina mi man Zapdi. 18 Mi hud’ï sum mama sana tutu. Akan mam mi Karmi ma Zapdi goromina goroma, abum ngolo ni Zera, ni ma ad’u andjafâ hi Juda-nina, Ma didina mi gum ad’um mbeyo.

19 Josue mi de mi Akan ala: Gorona, ang subur Ma didina Alona hi Israel-lîna, ang hum ngola, ang dan ndei yam vama ang luma, ang ngeyen va d’i.

20 Akan mi hulong de mi Josue ala: Gagazi, an le tchod’a avok Ma didina Alona hi Israel-lîna. Ang gol vama an luma ba wana: 21 An gol aduk ahle suma ei hurumuzina, an we baru d’a ngol la djif fa Sinar-ra ki kawei ma hapma kikis mbà ki mbuka hi lor-ra d’a aneget ndak ir grama go ki kikis sa klavandid’a. An le d’od’oka kaziya, an yoziya, a nga ngeid’a kä aduk andagad’a kur zlub’u manda; kawei ma hapma mi nga tchuka kä ad’uziya.

22 Josue mi sun suma; a ring hur zlub’ud’a hi Akan-nda, a i feï ahle ndazina ngeid’a kä kur zlub’u mamba; kawei ma hapma mi nga tchuka kä ad’uzi mi. 23 A pad’azi akulo woi kur zlub’ud’a, a mba ki sed’ezi mi Josue ki Israel-lâ pet. A tinizi kä avok Ma didina. 24 Josue ki Israel-lâ pet a ve Akan Zera gorom ngolona, ki kawei ma hapma ki baru d’a ngola, ki lor ra mbuka, ki grom suma andjofâ, ki grom suma aropma, kamuzlei mama, ki koro mama, ki tumiyô mama, ki b’ogei mama, ki zlub’u mamba, kahle mama pet. A i ki sed’ezi kur hor ra Akor-ra.

25 Josue mi de mi Akan ala: Ni ang ba, mba ki ndaka kamiya. Ki tchetchemba, Ma didina nga mi mba ki ndaka kang mi. Ata yi máma Israel-lâ a durum kahinad’a, a tchumu, a dur sum mama kahinad’a mi. Azi ngalam ahle mama woi pet mi. 26 Bugola, a mol ahinad’a kamu; ahina ndata nga gak ini. Ni kayam ndata ba, a nga yi yi máma ini ala hor ra Akor-ra . Bugol ahle ndazina, Ma didina hurum b’lengâ.