Josue 9 - Azumeina Bible 1999 (MPG)

Suma Gabawon-na a mba djin vunazi ki Israel-lâ

1 Kid’a amulei suma a nga kaka kä abo alum ma Jurdê-na woi hî yam ahinad’ina ki suma hur ful la kikid’ikina ki suma a nga kaka avun alum ma ngol ma Mediterane-na gak mba Liban-na, nala, suma Het-na, ki suma Amor-râ, ki suma Kanan-na, ki suma Peris-sâ, ki suma Hef-fâ, ki suma Jebus-sâ, a hum zla ndatid’a, 2 a tok tazi a ndjaf vunazi tu á dur Josue ki Israel-lâ.

3 Kid’a suma a nga kaka avo Gabawon-na a hum zla d’a Josue mi lat ki suma Jeriko-na ki suma Aï-nid’a, 4 a nde le lemba. A mbut tazi d’igi suma a sunuzina na. A yo sak ka adjeud’a ki bud’omei suma adjeu suma a dubuzi irazi suma a vo süm guguzlud’a kuana, a djinizi huyok koro mazina. 5 A tchuk atuguru ma adjeu ma a dubuma aseziya, a tchuk baru d’a adjeud’a atazi mi. Avungô ma azi yom abozina pet ni bubuk avungô ma sod’a.

6 A i a fe Josue azi ki Israel-lâ pet kur kangâ avo Gilgal, a dazi ala: Ami tcholomi ni yam ambas sa deid’a. Ki tchetchemba, ar ei djini vuneya.

7 Israel-lâ a hulong de mi suma Hef ndazina ala: Dam agi ni suma nga kaka go ki sed’emina kla ni; ami djinimi vunami ki sed’egi ni nana ge?

8 Azi de mi Josue ala: Ami nazungeî mangâ.

Josue mi djobozi ala: Agi ni suma lara ge? Agi tchologi ni lara mi ge?

9 Azi hulong dum ala: Ami azungeî mangâ tcholomi ni yam ambas sa deid’a, kayam simiyê Ma didina Alo mang ma zlam nde yinina, yam ami humum zlam kahle suma mi lazi ki Ezipte-nina pet, 10 kahle suma mi lazi kamulei suma mbà suma Amor suma a sä kaka abo alum ma Jurdê-na woi hî na, nala, Sihon amul ma Hesbon-na ki Ok amul ma Basan ma nga kaka Astarot-na mi. 11 Ni kayam ndata ba, mami suma nglona ki suma yam ambas mamid’ina pet a dami ala: Agi yogi te ma agi tagizi sä iragi glovotna abogiya. Agi i d’uguloziya, agi dazi ala: Ami azungeî magina mbamiya wa. Ki tchetchemba, ar ei djini vuneya. 12 Gola! Avungô ma ami yomizi abomi avo a mbami gevegina ni kakuwamu. Ki tchetchemba, mi so wa, mi mbut bubu’â wana! 13 Bud’omei suma ami oyômi süm guguzlud’a kurâ ni suma awilina. Gola! A haû woi wana! Baru mamina katuguru mamina a haû woi wana nabo azì ma deina!

14 Israel-lâ a ve tena abozi bei djop Ma didina ba. 15 Josue mi djin vunam ki sed’ezi yam halasa ala a lazi va d’i. Suma nglo suma avok sumina a gunuzi tazi mi.

16 Kur bur ma hindina bugol la azi djin vunazi ki sed’ezid’a, a hum ala azi ni ndrozi suma azina, ni suma a nga kaka adigazina. 17 Israel-lâ a iya. Kur bur ma hindina a mbaza kur azì mazi ma nglona, nala, Gabawon ki Kefira ki Bërot ki Kiriyat-Jarim. 18 Israel-lâ a tchazi nga d’i, kayam gun nda suma avorozina a gunuzi tazi ki simiyê Ma didina Alona hi Israel-lîd’a. Wani ablau d’a peta nga d’i gureî yam suma nglo suma avorozina.

19 Suma nglo suma avorozina a hulong dazi ala: Ni ami ba, gunuzi tami ki simiyê Ma didina Alona hi Israel-lîna. Ki tchetchemba, ei ndak á tini aboi atazi d’i. 20 Vama ei mba lum ki sed’ezina ba wana: Ei mba arazi bei tchid’a, kayam gun nda ei gunuzi teid’a. Le d’uo ni, Ma didina hurum mba mi zal keya. 21 Ei arazi bei tchid’a, ar azi kei aguna, a guli mbina mablaud’a hi suma d’igi suma avorozina a de na.

22 Josue mi yi suma Gabawon-na, mi dazi ala: Agi ni suma nga kaka adigami ka hina mi na. Ni kayam me ba, agi lobomi ala agi tchologï nata yima deina ge? 23 Ki tchetchemba, a gagiya wa vuna da’, agi pet mba aragi bei le magomba d’i. Agi mba kagi aguna, agi mba gulugi mbina kur gong nga kud’ora hAlo manid’a.

24 Sum ndazina a hulong de mi Josue ala: Ami azungeî mangâ humumi ala Ma didina Alo mangâ mi he vuna mazong mama Moise á hagi ambas sa wanda á tchi suma kurutna woi avorogi pet. Kayam ndata, mandaragi mi vami ngola, kayambala agi mba tchamiya d’a. Ni kayam ndata ba, ami mbami ki gevegi wana. 25 Gola! Ki tchetchemba, ami ni hur abong da’! Ang le vama djivi ma d’ingêr ma hurung minim á led’a ki sed’emina.

26 Wana ni vama Josue mi lum ki sed’ezina. Mi d’el Israel-lâ ala a tchazi d’i. 27 Kur bur máma Josue mi tinizi ata sun nda ka aguna ki sun nda gul mbina mablaud’a hi Israel-lîd’a ki yima ngal ahle suma ngat buzuna hi Ma didinina ata yima mam mba mi manam yam simiyêma mi. A nga le sun ndata kua gak ini.