Ndjendjed’a hi yi ma kak ma Jerusalem-ma
1 Alë! Ni nana ba, lora nga d’i wile d’uo ge?
Ni nana ba, lor ra bei zozota ba d’a
nga d’i ngal wiwilik kuo ge?
Ahina d’a a min ki gong nga a tinit irat vata,
ti b’rau wa woi ir palumba teteng mi.
2 Alë! Ni nana ba, Siyon grot suma a kal tegles
suma d’igi lor ra bei zozota ba d’a na na,
a mbut golozi d’igi dei ma andaga
ma sama min deina mi minima na ge?
3 Hâna pî nga mi hapona mi groma á tched’a,
wani sum mana a mbut ni djalagauna
d’igi ariget ta hur fulîd’a na.
4 Gogor ma avun aponina vunam mi so,
sinam ti b’al akulo ata d’id’igamu.
Gugureina a nga hal tena,
wani sama hazizina nga d’i.
5 Suma a nga te te ma djivina adjeuna,
a nga bo kä ir palumba.
Suma a wul kur djivid’ina,
a nga bulul kä yam djimgilâ.
6 Tchod’a hi sum manid’a,
ti ngola kal tchod’a hi Sodom
mba a b’lagat tei atogo hina zak
bei sa mi tin abom atat ba d’a.
7 Mazi suma nglona adjeu a hapa titil kal gagarad’a,
a hapa kal ambira mi.
Hliwizi mi ngal wiwilik kal ahina korela,
irazi ti ngal wiwilik kal ahina safira mi.
8 Ki tchetchemba, irazi ti mbut wurad’a
kal nduvun nda i’îlika,
sa nga mi wazi woi ir palumba d’uo d’a,
babagazi ti b’al wa kä yam asogoziya,
ti so woi d’igi aguna na mi.
9 Suma a tchazi avun ayînina hotei
kal suma meid’a ti tchazi
suma ad’engêzi ti dap pei
suma tena kid’agazina.
10 Arop suma we hohowa suma
a nga yi grozina kabozi á mud’uzi
abo b’lak ka ti mba yam sum manid’a!
*
11 Ma didina mi ndak wa vun ayî mama,
mi vo wa ayî mama woi da’,
mi do akud’a ata Siyon,
ti ngalat kä woi kad’ut ta ged’a pet.
12 Amulei suma yam andagad’ina
ki suma a nga kaka yam andagad’ina pet,
a he nga gagazid’a ala ma djangûna d’oze ma huneîd’a
mba mi kal avun agre’â hi Jerusalem-ma d’i.
13 B’lak ndata ti mba ni yam tchod’a hi mat suma djok vuna,
ki tchod’a hi mat suma ngat buzu
suma a vo buzuna hi suma d’ingêrâ woina.
14 A nga tcha tata ir palumba d’igi suma duka na,
a mbut ndjendjed’a abo buzuna.
Kayam ndata, sana ndak á dozi baru mazina d’i.
15 Suma a nga dazi ala: Agi hud’ugizi woi gevemiya!
Agi suma ndjendjed’a, hud’ugizi woyo!
Hud’ugizi woyo! Ar agi domi d’i!
A nga ringâ, a nga tcha tata aduk andjaf suma.
Wani a nga dazi ala:
Ar agi kagagi avo hatami ka hî d’i!
16 Ma didina tamba mi ndjoyôzi woi vivreng,
mi min wazi d’uo d’a.
Sa nga mi he ngola mi suma ngat buzuna
d’oze sa nga mi we hohowa momorogeina d’uo mi.
*
17 Irami ti kau hawa kau á djup ma ndjunumina,
ami djubumi andjaf ma mba á sud’umina tatâ pî,
wani mi mba nga d’i.
18 A nga tchid’i aseya, ei ndak á tchei blangeîna d’i.
Dabi meid’a mba wa go, bur meina ndak wa...
Dap kei da’!
19 Suma a nga djobei vuneina, afefed’ezi kal b’aruna.
A nga digï akulo yam ahuniyôna,
a nga buri kä abagei hur fulâ.
20 Ma ei nga ki arid’a kama,
ni ma Ma didina mi manam mi tinim amulina,
ni mam ba, ei nga dei kam ala ei nga ni kaka ad’u anguzumu,
ei mba kagei aduk andjaf suma kamu na,
gola, a vum wa ki dau mazina!
*
21 Ndak gor weid’a Edom,
ndak ka nga kaka yam andaga d’a Us-sid’a,
ndak ayâ, ndak le furîd’a.
Wani kop ma sariyad’a nga mi mba kagu.
Ndak mba d’i gurut kiya, ndak mba d’i ar gandilad’a.
*
22 Ndak gor weid’a Siyon, sariya d’a yam tcho makid’a ndak da’.
Mi mba mi ik magomba d’uo d’a.
Ndak gor weid’a Edom, ni yam tcho maka ba,
mi mba mi gad’agu,
mba mi gak ad’u tcho maka woi abu mi.
© Azumeina Bible © Alliance Biblique du Tchad, 1999.
