GAT TA YAM SUN NDA NGAT BUZUNID’A
He d’a hawa d’a ngala
1 Ma didina mi yi Moise kur zlub’u d’a ngaf tad’a, mi dum ala: 2 Ang i de mi Israel-lâ ala:
Le sa adigagi mi min he he d’a hawad’a mi an Ma didina ni, ar mi he ni d’uwar ma ngolâ d’oze ma gorâ.
3 Le he d’a hawa mam mba ngala ni d’uwar ma ngolâ ni, ar mi he ni va mandjuf ma bei daka ba na, ar mi humî avun zlub’u d’a ngaf tad’a tala an Ma didina ni vum abomu d’a. 4 Ar mi tin abom yam vama mam mba mi hum á ngala mi an Ma didinina, an mba ni vum abom á zlup yam tcho mamba. 5 Ar mi ngat gor amuhlâ kä avogon an Ma didina. Bugola, suma ngat buzuna Aron groma a gas buzuna avogonu, a yamam huyok yima ngal ahle suma ngat buzu ma nga avun zlub’ud’ina. 6 Ar sa máma mi ze vama mam hum he d’a hawa d’a ngalina woyo, mi walam hliwim kä woi teteng. 7 Suma ngat buzuna Aron groma a tchuk akud’a yam yima ngal ahle suma ngat buzuna, a ndja aguna kad’u. 8 A tchuk hliu ma a walam kä woi máma ki yamba ki mbulâ yam agu ma a vum akud’a yam yima ngal ahle suma ngat buzunina. 9 Ar ma ngat buzuna tu mi mbus aruwatna kasema woi ki mbina, mi ngalazi woi yam yima ngal ahle suma ngat buzuna pet. Wana ni he d’a hawa d’a ngal la his sa afufuî d’a avogon an Ma didinid’a.
10 Le he d’a hawa mam mba ngala ni d’uwar ma gureina, nala, gor timina d’oze gor b’ëna ni, ar mi he ni mandjuf ma bei daka ba na. 11 Ar mi ngad’amî abo ma norâ hi yima ngal ahle suma ngat buzunina avogon an Ma didina. Suma ngat buzuna Aron groma a go buzuna, a yamam huyok yima ngal ahle suma ngat buzuna. 12 Ar sa máma mi wal hliuna iram kä woi teteng zlapa ki yamba ki mbulâ mi. Ar ma ngat buzuna mi tchuguzi yam agu ma a vum akud’a yam yima ngal ahle suma ngat buzunina. 13 Ar sa máma mi mbus aruwatna kasema woi ki mbina, mi yozi pet. Ar ma ngat buzuna mi ngalazi woi yam yima ngal ahle suma ngat buzuna. Wana ni he d’a hawa d’a ngal la his sa afufuî d’a avogon an Ma didinid’a.
14 Le he d’a hawa mam mba ngala le naluweina ni, ar mi he gugu bed’egera d’oze gugu d’a avod’a. 15 Ma ngat buzuna mi hat tei yam yima ngal ahle suma ngat buzuna. Ar mi ngad’at yat teyo, mi ngalat tei yam yima ngal ahle suma ngat buzuna, mi ar buzuna mi djang kä huyok yima ngal ahle suma ngat buzuna. 16 Mi pad’at fofogot ki hlimid’it teyo, mi tchuguzi kä gen yima ngal ahle suma ngat buzuna abo ma yorogona ata yima a nga tchuk butna kuana. 17 Ar mi wak gugu ndata aduk bei ngad’at gigingât tei ba, ar mi ngalat tei yam yima ngal ahle suma ngat buzuna yam agu ma a vum akud’ina. Wana ni he d’a hawa d’a ngal la his sa afufuî d’a avogon an Ma didinid’a.
© Azumeina Bible © Alliance Biblique du Tchad, 1999.
