Suma sunda hi Jean ma le suma batembina
(Gol Luc 7.18-35)1 Kid’a Jesus mi hat mam suma hat suma dogo yam mbàna hata, mi tchol ata yi máma, mi i á hat suma, á tchi wala kur azì máma mi.
2 Wani kid’a Jean ma le suma batembina mi nga kur dangeinid’a, mi hum zla sunda hi Christ-sa, mi sun mam suma hata gen Jesus 3 á djobom ala: Angî ma nga mbana, d’oze ami djubumi ni sama ding zu?
4 Jesus mi hulong dazi ala: Agi i dagi mi Jean vama agi humugizina ki vama agi wagizina mi. 5 Suma duka a nga we, suma dileîd’a a nga tid’a, suma libina a nga yak keyo, suma ngela a nga huma, an nga ni tchol suma matna akulo, an nga ni tchi wal Zla d’a Djivid’a mi suma hohoud’a mi. 6 Sama le nga hur ma mbàmbàna kan nduo na, mi le furîd’a.
7 Ata yima suma hata hi Jean-na a ina, Jesus mi de zlad’a mablau suma yam Jean ala: Agi igi abagei á gologi ni me ge? Tchereu ma simetna nga mi gazama zu? 8 Wani agi i gologi ni me ge? Sama tchuk baru d’a djif fa luluîd’ina zu? Wani suma a nga tchuk baru d’a djif fa luluîd’ina ni suma a nga avo hamuleina. 9 Agi i gologi ni me ge? Ma djok vun Alona zu? Â, an nga ni dagiya, mi kal ma djok vun Alona ngola. 10 Wana ni Jean ma a b’irim zlam kur mbaktumba hAlonid’ina ala: Alona mi dala: Gola! An nga ni sun man ma sunda avorong á min lovot manga na. 11 Gagazi, an nga ni dagiya, aduk suma aropma a vud’uzina pet, ma kal Jean ma le suma batembina ki ngolina nga d’i. Wani ni ma gor ma nga kur leu d’a akulod’ina ba, mi kalam ki ngola. 12 A tinï ad’ud’a kur atchogoid’a hi Jean ma le suma batembina dei gak ini, suma a nga b’at leu d’a akulod’a ni kad’enga, ni azi suma a b’ad’at kad’engî ba a hlat mi. 13 Suma djok vun Alona pet azi ki gata hi Moise-sa a de zlad’a yam leud’a hAlonid’a gak mba kur atchogoid’a hi Jean-d’a. 14 Le agi hagi gagazid’a yam zla manda ni, Jean ni Elie ma a dum zlam mbei ala nga mi mba na. 15 Sama nga ki humba á humbina, ar mi huma.
16 An mba ni nga suma kur atchogoi d’a wandina ni ki me ge? Azi ni d’igi gugurei suma a nga kaka kä ad’u su’îna na. A yi tazi akulo ala: 17 Ami nga bugi taulâd’a, agi nga luwugi d’i; ami nga tchimi horâ, agi nga tchigi d’uo mi. 18 Kayam Jean ma le suma batemba mi mba, mi te nga avu d’i, mi tche nga süm guguzlud’a d’i, wani suma a nga de kam ala: Mi nga ki muzuk ma tchona kurumu. 19 An Gor Sana ni mba, nga ni te, nga ni tche. Suma a nga dala: Gola! Sa máma ni sama b’oid’a, ni sama tche süm guguzlud’a heîna, ni suma ve lombod’a azi ki suma tchona banazina. Wani ned’a hAlonid’a ti tak kei ala ndat ni d’ingêru ni ki sun mat ta led’a.
Azì ma nglo ma noî á he gagazid’ina
(Gol Luc 10.13-15)20 Ata yi máma, Jesus mi nde ngop azì ma nglo ma mam le sun nda nglo d’a atchapa kurâ, kayam azi mbut nga huruzi yam tcho mazid’a d’i. 21 Mi dazi ala: Ni zla d’a hohoud’a kagi agi suma Korazin-na. Ni zla d’a hohoud’a kagi agi suma Betsaida-na. Kayam an ladjï sun nda ndandal la wanda aduk suma Tir-râ ki suma Sidon-na d’igi an lat adigagi agi na ni, azi mbut wa huruzi dedei, a tchuk wa baru d’a dodora ki butna kazi mi. 22 Wani an nga ni dagiya, kur bur ma ka sariyad’a, sariya d’a a mba kat yam azì ma nglo mámid’a mba d’i kal la a kat yam azì ma ngol ma Tir-râ ki d’a yam azì ma ngol ma Sidon-nid’a. 23 Agi suma Kapernayum-ma, agi djib’eregi kurugi ala a mba yogi gak igi akulo zu? Alona mba mi tchugugi kä woi azul leyo. Kayam an ladjï le sun nda ndandala aduk suma Sodom-ma d’igi an lat adigagi na ni, Sodom mbi nga gak ini tua. 24 Wani an nga mi dagiya, kur bur ma ka sariyad’a, sariya d’a a mba kat yam azì ma nglo mámid’a mba d’i kal la a kat yam andaga d’a Sodom-mbid’a.
Mbeyegï gevenu, an mba ni hagi tuk tad’a
(Gol Luc 10.21-22)25 Ata yi máma, Jesus mi hulong dala: Abun ma Sala akulod’a kandagad’ina, an lang mersi, kayam ang ngei ahle suma wana woi ir suma ned’a ki suma wed’a, wani ang tagazi woi mi gugureina. 26 Gagazi, Abunu, ang le hina ni min manga á lang tang djivid’a.
27 Abun mi han ahlena pet abonu. Sama wan an Gorâ nga d’i, nAbun hol. Sama wAbun nga d’i, ni an Goroma hol mi. Sama an Gorâ ni min tagam Abun woina, an tagamzi woi mi.
28 Agi pet suma kawagi abo anekina, agi mbeyegï gevenu, agi tugugi tagiya. 29 Ar agi hlagi djuk mana, agi had’agi atanu, kayam an ni sama lulumana ma hurun ab’lengîna mi, agi mba fagi tuk tad’a mi. 30 Kayam djuk mana mafefeta, ahle man suma zid’a a nga anek kuo mi.
© Azumeina Bible © Alliance Biblique du Tchad, 1999.
