Matna hi Jean ma le suma batembina
(Gol Mar 6.14-29Luc 9.7-9)1 Ata yi máma, Herot ma te yamba yam andaga d’a Galile-d’ina, mi hum zla Jesus. 2 Mi de mi azungeî mama ala: Ni Jean ma le suma batemba ba, mi tchol akulo aduk suma matna. Ni kayam ndata ba, nga mi lahle suma ndandalâ wana.
3 Kayam adjeu Herot mi ve Jean mi djinim mi gum dangeina kayam Herodiyas atchad’a hi wiyema Filip-pa. 4 Kayam Jean mi dum teteu ala: Gat meid’a ti arang nga lovota á vat ti. 5 Herot mi min ala mi tchumu, wani nga mi le mandara Juif-fâ, kayam azi we Jean ala ni ma djok vun Alona.
6 Kid’a Herot mi le tena yam bur mam ma vutid’a, Herodiyas gorota ti nde lü ndjongâ woi avok suma mi yazï yam tenina. Herot tam lum djivid’a heî yam ndjong matna. 7 Mi gunut tam ala ti le tchenem ni me pî, mam mi hattchiya. 8 Yam zla d’a asut ti dattchi kuruta ti dum ala: Ang hanï yam Jean ma le suma batemba kur tazana ka tchetchem. 9 Amulâ hurum b’lak ngola heî, wani kayam gun nda mi gun tam avok suma mi yazi ata yima tenina, mi he vuna a hattchiya. 10 Mi sun azigarâ kur dangeina á ngad’ï yam Jean. 11 A mba ki yam Jean kur tazana, a hat mi gora, ti it masud’u. 12 Mam suma hata a mba a hlum mad’amu, a i tozomu, a i de mi Jesus vama lena.
Jesus mi hop suma dudubud’a vahl ki tena
(Gol Mar 6.30-44Luc 9.10-17Jn 6.1-14)13 Kid’a Jesus mi hum zla ndatid’a, mi ar yi máma, mi djak kur alumba, mi i abagei ata yima sa nga kua d’uo na. Kid’a ablau suma a humum zlamba, a buzuk kur azina teteng, a nga i ad’um kasezi avun mbina. 14 Kid’a mi nde woi kur alumbid’a, mi wablau suma ngola. Hurum hat kaziya, mi sut suma tugud’ei suma a nga adigazina mi.
15 Kid’a afata mbut fladege dad’a, mam suma hata a hut gevem a dum ala: Ei ka hî nabageya, yina kal wa da’. Ar ablau suma a iya, kayam azi i kur azì ma gureina á gus te mazina.
16 Wani Jesus mi dazi ala: Nga djivid’a á azi i d’i. Agi tagid’a ba, hazi tena.
17 Azi hulong dum ala: Ami nga kavungôna vahl hawa ki kulufâ mbà mi.
18 Mi dazi ala: Agi mbeyendjïya. 19 Ata yi máma, mi he vuna mablau suma á kak kä yam asuna. Mi yo avungô ma vahlâ ki kuluf ma mbàna, mi hle iram akulo, mi le mersi mAlona kamu. Mina, mi mbruk avungôna kä, mi he mi mam suma hata; a b’rawam mi suma. 20 Azi pet a te, a hoba. Mam suma hata a tar avungôna ad’um mba ara, ti oî gumud’a dogo yam mbà. 21 Suma a tavungô mámina andjuveina ni d’igi dudubud’a vahl na, a ndum nga aropma ki gugureina d’i.
Jesus mi tit yam mbina
(Gol Mar 6.45-52Jn 6.15-21)22 Ata yi máma na wat, Jesus mi sek mam suma hata ped’et ala a tchuk kur alumba, a i avogom abo apod’a woi hî, kayam mam tamba mi tin ablau suma woi ta tua. 23 Bugol la mi tin ablau suma woi ta d’a, mi djak akulo yam ahinad’a woi ken vam á tchen Alona. Kid’a afata nik dad’a, Jesus sä hî ni vam tu.
24 Wani alumba nga aduk apod’a, abilâ nga mi tchat tata, kayam simetna nga mi sirï navorozi d’ar. 25 Ki vun pipira, Jesus nga mi iza geveziya, nga mi tit yam mbina. 26 Kid’a suma hata a wum nga mi tit yam mbinid’a, vunadigazi d’i pat fek, a dala: Nangusa, a er ad’uzi akulo abo mandarâ.
27 Ata yi máma na wat, Jesus mi dazi ala: Agi vagi tagiya! Ni anu, agi lagi mandar ri.
28 Pierre mi hulong dum ala: Salamina, le ni angû ni, ang han vuna an izi geveng yam mbina.
29 Jesus mi dum ala: Ang mbeya.
Pierre mi tchuk asem mbei kur alumba, nga mi tit yam mbina á i gen Jesus. 30 Wani kid’a mi we babarîd’a, mi le mandarâ. Ata yi máma mi nde sir kä, mi er ad’um akulo ala: Salana, ang sud’unu!
31 Atogo hina zak, Jesus mi mat abom mi vum mi dum ala: Ang ma gagazi manga akid’eid’ina, ni kayam me ba, ang le hurung mbàmbà ge?
32 Kid’a Jesus azi ki Pierre a djak kur alumbid’a, babarâ tchol b’et. 33 Suma kur alumbina a kud’or Jesus, a dala: Gagazi, angî Alona Goroma.
Jesus mi sut suma tugud’ei suma Jenesaret-na
(Gol Mar 6.53-56)34 Kid’a Jesus azi ki mam suma hata a djak sä woi abo hid’a, a mbaza yam andaga d’a Jenesaret-ta. 35 Kid’a suma ata yi mámina a wala ni Jesus-d’a, a tchuk sunda kur azì máma pet, a mbam suma tugud’eid’a pet. 36 A tchenem ala mi arazi a domî vun baru mamba go. Suma pet suma a dotna a tchol akulo woi kur tugud’ei mazid’a.
© Azumeina Bible © Alliance Biblique du Tchad, 1999.
