Matiye 9 - Azumeina Bible 1999 (MPG)

Jesus mi sut sama gugutud’a

1 Jesus mi djak kur alumba, mi djak mbina, mi hulong kur aziyam ma ngolâ. 2 A mbamï sama gugutud’a, mi nga burâ kä kur zlatna. Ata yima Jesus mi we he gagazi mazid’ina, mi de mi sama gugutud’a ala: Gorona, ang ve tangû! An vat wa hurun ndei yam tcho manga da’.

3 Wani suma hat gat suma hiuna a de kuruzi ala: Sa máma nga mi las Alona gi?

4 Jesus mi we djib’er ra kuruzid’a tcha, mi dazi ala: Ni kayam me ba, agi djib’eregi djib’er ra tchod’a na ge? 5 Vama afefeta kal á ded’a ni me ge? An vat wa hurun ndei yam tcho manga da’ d’oze: Ang tchol akulo, ang tid’a d’a zu? 6 Wani kayam agi wagi woi ala an Gor Sana ni nga kad’enga yam andagad’a ka hî á vat hurun ndei yam tchod’a hi sumid’a..., mi de mi sama gugutud’a ala: Ang tchol akulo, ang hle zlat mangâ, ang i avo hatangû.

7 Sama gugutud’a mi tchol akulo, mi i avo hatamu. 8 Ata yima ablau suma a wahle ndazina hina na, a le mandarâ, a subur Alo ma had’eng nga hina d’a mi sumina.

Jesus mi yi Matiye

(Gol Mar 2.13-17Luc 5.27-32)

9 Jesus mi tchol ata yi máma, nga mi kala, mi we sana simiyêm ala Matiye, mi nga kaka kä kur gong nga ve lombod’a. Jesus mi dum ala: Ang mbeï ad’unu. Mi tchola, mi i ad’umu.

10 Kid’a Jesus mi nga kaka kä avun tena avod’a, suma ve lombod’a azi ki suma tchona ablaud’a a mba, a nga kaka kä ki Jesus azi ki mam suma hata mi. 11 Kid’a Fariziyêna a we hina d’a, a de mi mam suma hata ala: Ni kayam me ba, magi ma hat suma nga mi te tena ki suma ve lombod’a azi ki suma tchona mi ge?

12 Kid’a Jesus mi hum hina d’a, mi dazi ala: Suma a nga kad’eng tazina va mi ndolozi nga ki dokdor ri, wani ni suma tugud’eid’a hol. 13 Wani agi igiya, agi i had’agi ad’u zla d’a a b’irit kur mbaktumba hAlonid’a ala: Alona mi dala: An min ni we hohowa suma, nga ni buzu ma ngata d’uo d’a, kayam an mba ná yi suma d’ingêrâ d’i, wani ná yi suma tchona.

A djop Jesus yam d’el ta d’a bei te tenid’a

(Gol Mar 2.18-22Luc 5.33-39)

14 Bugola, suma hata hi Jean ma le suma batembina a mba gen Jesus, a djobom ala: Ni kayam me ba, ami ki Fariziyêna d’elemi tami bei te tena, wani mang suma hata a nga d’el tazi bei te tena d’uo ge?

15 Jesus mi dazi ala: Suma sala tela mi yazina a ndak á d’el tazi bei te tena kid’a sala tela mi nga ki sed’ezi tua d’a zu? Nga na d’i! Wani burâ nga mi mba, a mba hle sala tela woi adigaziya. Kur bur máma, a mba d’el tazi bei te tena tua.

16 Sa nga mi dup ir baru ma adjeuna ki baru ma awilina d’i. Le mi le na ni, baru ma awilina mba mi haû ma adjeuna woyo. Haû ndata mba d’i kal la avoka. 17 Sa nga mi sel süm ma ayîna kur agolongeî suma adjeuna d’i. Le mi le na ni, agolongeîna a mba to woyo, süma mba mi b’lak kei mi. Wani süm ma ayîna a selemî kur agolongeî suma awilina. Hina wani, mba mi b’lak kei d’i.

Gor ra atchad’a katcha d’a do vun baruna hi Jesus-nid’a

(Gol Mar 5.21-43Luc 8.40-56)

18 Ata yima Jesus nga mi de zla ndata tua na, ma ngolâ hi gonga toka hi Juif-fîna, mi mba, mi grif kä avok Jesus, mi dum ala: Goronda ti mid’ï ka tchetchem, wani ang mbeï tin abong kad’u, ti tchol akulo. 19 Jesus azi ki mam suma hata a i ad’umu.

20 Wani atcha d’a nga ki tugud’ei d’a djang buzunid’a ti nga, ti le bizad’a ki sed’et ni dogo yam mbà, ti hud’ï bugol Jesus, ti dom vun baru mama, 21 kayam ti de kurut ala: An le domî vun baru mama hina go pî ni, tugud’ei manda mba d’i aranu.

22 Wani Jesus mi mbut iram mi golod’u, mi dat ala: Goronda, ndak ve tagu, he gagazi maka sud’uk wa da’. Ata yi máma, buzu mat ma djang mi ka mi.

23 Kid’a Jesus mbaza avo hi ma ngolâ hi gong nga toka hi Juif-fîd’a, mi we suma a nga siwel kaduveina ki wulula ngola gandjau. 24 Mi dazi ala: Agi hud’ugi tagi woyo, kayam gora ti mit nga d’i, wani ti burî sena. Azi nde lazamu. 25 Kid’a mi dik ablau suma woi abud’a, mi kal klaviya, mi vat abod’u, ti tchol akulo. 26 Zla ndata ti b’rau woi yam andaga ndata pet.

Jesus mi mal ir suma duka woi mbà

27 Jesus mi tchol ata yi máma, nga mi kala; suma duka mbà a nga tit ad’umu. A er ad’uzi akulo, a dum ala: Ang David goroma, ang wami hohowomiya.

28 Kid’a mi mbaza avod’a, suma duk ndazina a mba gevemu. Jesus mi djobozi ala: Agi hagi gagazid’a ala an ndak á le na zu?

Azi hulong dum ala: Â, Salamina.

29 Ata yi máma, mi tin abom iraziya, mi dazi ala: Yam he gagazi magid’a, iragi d’i mal leyo. 30 Irazi d’i mal leyo! Jesus mi gad’azi ngola, mi dazi ala: Agi gologi tagi djiviya, ar sa mi we zla ndata d’i. 31 Wani a buzuga, a i dum zlam mbei yam andaga ndata pet.

Jesus mi mal hum ma ndumîd’a woyo

32 Kid’a suma duka a nga id’a, suma dingâ a mbamï sama ad’enga ki sed’em á de zlad’a woina, kayam sa máma mi nga ki muzuk ma tchona kurumu. 33 Kid’a Jesus mi dik muzuk ma tchona woi kurum dad’a, sa máma mi nde de zlad’a. Ablau suma a le atchap, a dala: Ei wei nga vama hina na aduk Israel-lâ yei tu d’i.

34 Wani Fariziyêna a dala: Mi nga mi dik muzuk ma teteng ma tchona woi ni kad’eng nga amulâ hi muzuk ma tchona mi humzid’a.

Jesus mi we hohowa ablau suma

35 Jesus nga mi ngui tita kur azì ma nglona kazì ma gureina pet. Nga mi had’azi kur gongîyo mazi suma toka, nga mi tchazi wal Zla d’a Djivi d’a yam leud’a hAlonid’a, nga mi sud’uzi woi kur andjaf tugud’ei mazid’a teteng ki suma homozed’a pet mi. 36 Wani kid’a mi wablau sumid’a, mi wazi hohowoziya, kayam azi nga kur kaud’a, ad’engêzi nga d’uo d’igi tumiyô suma bei salazi ma polina na. 37 Ata yi máma, mi de mi mam suma hata ala: Awu ma feta mi nga ngola, wani suma sunda akid’eid’a. 38 Kayam ndata, agi tchenegi Sala awuna, kayam mi sun suma sunda á fet awu mama.