SUMA A MBA HULONG KAK TCHUGOT KUR AMBASA
Jerusalem nazì ma ngol ma halasâ
(Yam verse ma 1-3-na, ang gol Is 2.1-4)1 Kur atchogoi d’a nga d’i mbad’a,
ahina d’a a min gong nga kud’ora hi Ma didinid’a kata,
a mba b’alat akulo yam ahuniyôna yazi d’a ked’iwurenga,
mba d’i kal akulo yam ahuniyôna pepet.
Ata yi máma andjaf suma a mba i kua zuzuk.
2 Suma ablau ndazina a mba i kua,
a mba dala: Agi mbeyegïya.
Ei i djagei akulo yam ahinad’a hi Ma didinid’a
kur gong nga kud’ora hAlona hi Jakob-mid’a,
kayam mi had’ei gat mamba.
Ar ei tid’i kur lovot mam mba mi tageizid’a.
Kayam Gata mba d’i tcholï ni Siyon,
zlad’a hi Ma didinid’a mba d’i tcholï ni Jerusalem mi.
3 Mam mba mi mbut ni ma ka sariyad’a
aduk andjaf suma ablaud’a,
mba mi mbut ni ma min zlad’a handjaf suma sib’ik suma sä deina,
mbuguyo mazi suma fuyogeina mba mi zlazi sï kowuyona,
asubuyo mazina mba mi zlazi mbaragumba.
Andjaf ma ding mba mi tchol durâ kandjaf ma ding ngi,
sa mba mi hat ayî ma dur ruo mi.
4 Azi nge nge pî mba mi kak kä ad’u guguzlu mamba,
kä ad’u tulum mama mi,
sama mba mi mbud’uzi mandarîna nga d’i.
Wana ni zla d’a Ma didin ma ad’engêm kal petna mi data.
5 D’igi andjaf suma pet nge nge pî
nga mi ge yam kä ad’u alo mama na,
ami pî nga gami yami kä
ad’u Ma didina Alo mamina
burâ ki burâ gak didin.
Ma didina nga mi tamula avo Jerusalem
6 Ma didina mi dala: Kur bur máma
an mba ni veï suma dileîd’a atanu,
an mba ni togï suma a yozi magombina,
ki suma an lazi tchod’a adjeuna mi.
7 Suma dileîd’a an mba ni sud’uziya,
suma a yozi magomba woi adjeu deina
a mba mbut andjaf ma sib’ika.
An Ma didina mba ni te kazi
yam ahina d’a Siyon-nda
tinï ad’ud’a ata yi máma dei gak didin.
8 Ang yima nding ma Jerusalem
ma kak ndjola yam suma
d’igi gong nga fiyak ka ndjola na na,
ar ndjö ang mba fad’eng mang nga avoka.
Ang azì ma ngol ma Jerusalem-ma, ang mba mbut
nazì ma ngol ma awili ma kur leud’ina.
Kuka ki prut ta a prut Jerusalem mbeid’a
9 Agi suma Jerusalem-ma,
ni kayam me ba,
agi eregi ad’ugi akulo
ki tchetchemba na ge?
Amul nga avo hatagi d’uo zu?
Magi suma de d’alâ a bö ba,
ndaka ti nde kagi
d’igi ndaka ti nde yam atcha d’a vutid’a na zu?
10 Agi tchagi tata abo ndaka,
agi zamagi tagi
d’igi atcha d’a ti nde vutid’a na,
agi buzugugi woi kur azì ma ngolâ,
agi i kagagi sä abageya,
agi igi gak Babilon.
Ata yi máma Ma didina mba mi prud’ugi woyo,
mba mi prud’ugi woi kua
abo magi suma djangûna.
11 Ki tchetchemba, andjaf suma ablaud’a
a tok wa kagi á durâ, a nga dala:
Ar azì mazi ma ngolâ mi b’lak keyo,
ei golei b’laka hi Jerusalem-mba.
12 Wani azi we nga djib’era hi Ma didinid’a d’i,
a we nga nga hur mama d’uo mi.
A we nga d’ala mi togoziya wa
d’igi sana mi tok mbugulud’a kä ambid’ak na d’a d’i.
13 Ma didina mi dala:
Agi suma Jerusalem-ma,
agi tchologi akulo, agi togi awuna.
An mba ni mbud’ugi ad’enga
d’igi adif ma kaweina na,
d’igi alif ma kaweina na mi.
Agi mba kazlagi andjaf suma ablaud’a kä kakahl,
ahle mazi suma ndjondjoî suma agi mba yozina,
agi mba tinindji irazi vazi mi an Sala andagad’a.
14 Ki tchetchemba, agi suma Jerusalem-ma,
agi togogi adesâ adesâ
d’igi vama taka na yam yor tad’a,
agi togogi azigar magina.
Ki tchetchemba, suma djangûna a nga nguyiya,
a mba wat agohl ma ngol ma avok
Israel-lîna ki totogod’a.
© Azumeina Bible © Alliance Biblique du Tchad, 1999.
