NGOPA KI TIN HURÂ A NGA
Ma didina mi tchuk zlad’a yam sum mama
1 Agi humugi zla d’a Ma didina mi data.
Ang tchol akulo,
ang le sariyad’a avok ahuniyôna,
ar yima ndingâ mi humung deleng mi.
2 Agi ahuniyôna kandaga d’a ad’ut
ta ge d’a ngingid’a,
agi humugi zlad’a hi Ma didinid’a
kayam Ma didina mi nga ki zlad’a ki sum mama,
mi min b’ak zlad’a ki Israel-lâ.
3 Mi dala: Agi sum mana, an lagi ni me ge?
An kawagi ni ki me ge?
Agi dandiya!
4 Kayam an buzugugï woi kur ambas sa Ezipte-d’a,
an wurak kagi kur yima a lagi magomba kuana,
an sun Moise azi ki Aron ki Miriyam avorogiya.
5 Agi sum mana, agi djib’eregi yam zla d’a
Balak amul ma Mowap-ma mi ngat kurumba,
Baläm Beyor goroma mi hulongôm humba na na ge?
Tinï ad’ud’a Sitim dei gak mba Gilgal
agi wagi sun nda djivi
d’a an Ma didina ni lat ki sed’egid’a.
Vama Ma didina mi minim ata sumina
6 Agi nga dagi ala:
Ei i avok Ma didina ni ki me ge?
Ei grivi kä avok Salad’a Alo ma sä akulo ma kal teglesâ ni ki me ge?
Ei humî gor amuhl ma bizam tuna vama ngat buzu ma ngala zu?
7 Ma didina mi min ni gamlâ ma dudubuna
d’oze mbul ma mi djang d’igi mbiyo aluma na na zu?
Ei hei ni gurei suma a vut avo’â
vama ngat buzu ma ngala
yam tchila meid’a ki tcho meid’a zu?
8 Nga na d’i!
Ang sana, a tagang wa vama djivina,
vama Ma didina mi halam atangâ ba wana:
Ang tit ni yam d’ingêra,
ang le yam djivid’a,
ang ge yang kä avok Alo mangâ luluma.
Ngop pa suma mbut ira ki suma murud’umbid’a
9 Ma didina nga mi de zlad’a
mi suma a nga kur azì ma ngolîna.
Sama ned’a ni sama ge yam kä ad’u ad’eng mambina.
Agi suma ad’u andjafâ hi Juda-nina,
agi suma pet suma nga toka kur azì ma ngolîna,
agi humugiya.
10 Na ni ndjondjoî d’a a fat ki mbut irid’a
nga avo hi suma asa’atna tua zu?
D’oze vama nga ahle ma a mbud’um gogora
mala ni vama ndjendjed’a iran
an Ma didina na mi nga tua zu?
11 An mba ni ba bei ngop sama hle kilona ata yam mbuo na
ki ma hlanek ka kur sakid’a ata yat tuo na zu?
12 Suma ndjondjoî suma kur azì mámina
huruzi mi ni oîd’a ki murud’umba,
suma a nga kaka kuruma a ni suma ka zlad’a,
sinazi ti de ni zla d’a mbut ira.
13 Ni kayam ndata ba, an mba ni togi ki ndaka,
an mba ni b’lagagi woi yam tcho magid’a mi.
14 Agi mba tagi avuna, wani agi mba hobogi d’i,
agi mba tchigi meid’a,
agi mba tinigi ahlena á ngomba,
wani agi mba wazi zlazi d’a ngomba d’i.
Ahle suma agi mba ngomozina,
an mba ni ar suma durâ a yoziya.
15 Agi mba zaragiya,
wani agi mba dud’ugi d’i;
agi mba yorogi vut olifâ,
wani agi mba lagi mbulum atagi d’i;
agi mba mired’egi guguzlud’a,
wani agi mba tchat sümut ti.
16 Agi hlagi ni zlad’a hamulâ Omri-d’a
ki zlad’a hi suma hi Ahap-mid’a,
agi tid’igi ni yam d’al mazina.
Ni kayam ndata ba,
an nga ni mba ki b’laka yam azì magi ma ngolâ,
an mba ni mbud’ugi agi suma kuruma vama lasa,
agi mba zigi zulona hi sum manina mi.
© Azumeina Bible © Alliance Biblique du Tchad, 1999.
