Suma djangûna hi Juif-fîna a min d’el sunda
1 Kid’a Sanbalat mi hum ala ami nga minimi gulumuna akulod’a, hurum zal ngola, nga mi hat hurum heî mi. 2 Nga mi lazamiya, mi de avok b’oziyoma ki azigar suma Samari-na ala: Juif suma ad’engêzi nga d’uo na a le ni me na ge? A mba dap sun mazid’a á hahle suma ngat buzuna mAlo mazina zu? A mba dap sun mazi d’a min gulumuna ini kahinad’a a yot kä aduk butna d’a ngal leid’a zu?
3 Tobiya ma Amon-na nga tchola gevemu, mi dala: A min ni gulumun me ko ge? Arauna mba mi djak kua ni mam go ba, ahina ndata mba d’i dris kä woyo!
4 Kayam ndata, an tchen Alona ala: Alo mamina, ang hum las sa a nga lazamid’a, ang hulongôzi ngul la azi nga ngulumid’a kaziya, ang ar suma a hurumuziya, a yozi magomba yam andaga d’a dinga. 5 Ang vat hurung ngei kazi d’i, ang has tcho mazid’a woi avorong ngi, kayam azi nga ngulumi ami suma nga minimi gulumunina.
6 Ami minimi gulumuna ki zlam pet, ami minim akulo gak mbam aduk d’ad’ar, kayam ablaud’a a he huruzi tu á le sunda.
7 Wani ata yima Sanbalat ki Tobiya ki suma Arap-ma ki suma Amon-na ki suma Asdot-na a hum ala minda hi gulumun ma Jerusalem-ma nga i avogovogo, hod’ol mamba nga d’i duk kei mi d’a, huruzi mi zala. 8 Azi pet a ndjak vunazi tu á ndami ami suma Jerusalem-ma ayîna á d’elemi avun sun ndata. 9 Wani ami tchenemi Alo mamina, ami tinimi suma ndjola kami andjege ki falei abo suma djangû ndazina á d’elezi woi á mba atamiya.
10 Wani suma Juda-na a dala: Suma yo ahlena ad’engêzi nga d’i. Kayam butna kal ngola heî, ei ndak á tewei gulumuna d’i.
11 Mami suma djangûna a dala: A mba hum mbi, a mba we d’i, gak ei mba mbeiza adigaziya, ei mba tchaziya; ni hina ba, ei mba d’elei sun ndata.
Nehemi mi hahle suma dur ayîna abo suma le sunda
12 Wani Juif suma a nga kaka go ki mami suma djangûnina a mba yazi dogo, a dami ala: Ata yima lara ge pet ma agi nga kuana, azi mba mba atagi á durâ. 13 Ni kayam ndata ba, an ni tin suma sunda bugol gulumuna kä á ndjola, an tinizi ad’u adezezi adezezi ki mbuguyo suma fuyogeina kasubiyona ki yeûd’a aboziya. 14 Bugol la an i á gol yina tetenga, an de mi suma nglona ki suma avok sumina kablau suma pet suma a nga ata yi mámina ala: Ar agi lagi mandara magi suma djangûna d’i. Agi djib’eregi yam Salad’a ala ni Ma ngol ma kal papana, agi durugi ayîna yam b’oziyogina, yam grogi suma andjofâ ki suma aropma, yam amiyôgina, yam aziyagi mi.
15 Ata yima mami suma djangûna a hum ala ami humumiya wa zla ndata na, Alona mi pleyêzi nga hur mazina woyo. Ami pet hulongômi ata gulumuna minda, nge nge pî ata yi mam ma sunda. 16 Tin ad’ud’a kur bur máma dei wani, azungeî man suma hiuna a nga le sun mazid’a, suma hiuna a tchuk kongrongâ ataziya, a yo asubiyona ki yeûd’a ki mboriyona aboziya. Suma te yamba a nga ad’u suma Juda-na pet. 17 Suma min gulumuna ki suma zi ahlena a nga le sunda kabozi ma hina, ahle suma sïna abozi ma hina mi. 18 Suma min gonga nge nge pî mi djin mbigeu mam mba fiyaka furumu; ni hina ba, a nga le ki sunda. Sama bu adifa mi nga tchola geven mi. 19 An de mi suma nglona ki suma avok sumina kablau suma pet ala: Sun ndata ti kal ngola, yina bubud’a heî mi; ei b’rawei woi ata gulumuna teteng, adigei woi dedei mi. 20 Kayam ndata, le agi humugi adifa tchina ata yima agi nga kuana ni, agi togogï gevemiya; Alo meina mba mi dur ayîna keya.
21 Ni hina ba, ami nga imi ki sunda avogovogo; suma hiuna adigami a nga tchola kasubiyona abozi yorogo dei gak afata niga. 22 Ata yi máma tamba an de mi suma sun suma avok suma sundina ala: Nge nge pî mi bur ka hî ki mam suma sunda avo Jerusalem, kayam a ndjolei andjege, a le sunda falei mi. 23 An tan ki b’oziyona, azungeî mana ki suma a nga ngomon a tit blogona, ami nga fogomi baru mamina woi d’i, nge nge pî mi nga kahle mam suma sïna tchuka gevemu.
© Azumeina Bible © Alliance Biblique du Tchad, 1999.
