Juif-fâ a tchen hur ma vata
1 Kur bur ma dok mbà yam fid’ina hi til mámina, Israel-lâ a tok taziya, a d’el tazi bei te tena, a tchuk baru d’a ndjondjorod’a ataziya, a tchuk andagad’a kazi mi. 2 Kid’a andjaf Israel-lâ a wal tazi woi kangoyogeina peta, a i a de tcho mazi d’a azi lata woi ki d’a habuyozid’a mi. 3 Bugola, a tchol akulo kaseziya, a ndum Gata hi Ma didina Alo mazinid’a gak lera hindi, a däd’u tcho mazi d’a azi lata woyo, a grif kä avok Ma didina Alo mazina gak lera hindi mi.
4 Josue, Bani, Kadamiyel, Sebaniya, Buni, Serebiya, Bani ki Kenani a djak akulo ata yima ndingâ hi suma hi Levi-nina, a nga er ad’uzi akulo avok Ma didina Alo mazina. 5 Bugola, suma hi Levi-na Josue, Kadamiyel, Bani, Hasapneya, Serebiya, Hodiya, Sebaniya ki Petahiya a dazi ki delezi akulo ala: Agi tchologi akulo! Ar agi gilegi Ma didina Alo magina kur atchogoid’a katchogoid’a gak didin.
Tchen nda subur Alona
A de kua ala: Ar ami gileng simiyêng ma subur ma kal lei yam subura ki giled’a petna.
6 Ni ang Ma didina tu ba, lakulod’a kahle suma kurutna pet, andagad’a kahle suma kurutna pet, alum ma nglona kahle suma kuruma pet mi. Ahle ndazina pet ang hazi arid’a, ahle suma akulona pet a nga grif kä avorong mi. 7 Angî Ma didina Alo ma man Abram ma ndumî woi kur Ur ra Kalde-d’a ma tinim simi ma Abraham-mina. 8 Ang wum ni ma d’engzengâ avorongû, ang djin vunang ki sed’em á handjavam ambasa hi suma Kanan-nid’a, hi suma Het-nid’a, hi suma Amor-rîd’a, hi suma Peris-sîd’a, hi suma Jebus-sîd’a ki d’a hi suma Girgas-sîd’a. Ang le sunda yam zla d’a ang data, kayam angî ma d’engzengâ.
9 Ang we ndaka habuyomi ngolo d’a Ezipte-d’a, ang hum tchi mazi ma avun alum ma ngol ma Tchereunina. 10 Ang tak ahle suma yoyou suma ndandalâ woi ata Faron, ata azungeî mama, ata suma yam ambas mambina pet mi, kayam ang we murud’um mba ngol la azi lat mabuyomi ngolod’a, ang tak subur manga woi atazi d’igi ini na mi. 11 Ang wal alum ma ngolâ woi avoroziya, azi djagam kasezi sod’a tchitching, wani suma a nga digizi blogozina, ang sirizi kä aduk galileina d’igi ahinad’a sir kä aduk mbina na.
12 Ki faleid’a ang tinizi d’ugula tchola avorozi gongzong, andjege ang tinizi akud’a tchola avorozi gongzong á b’o lovota woi avorozi á tita. 13 Ang tchuk aseng kä yam ahina d’a Sinai-d’a, ang dazi zlad’a ei akulo, ang hazi gat ta d’ingêra, hat ta gagazid’a ki vun ma he ma djivi ma kal teglesâ mi. 14 Ang tagazi bur mang ma sabat ma ang tinim iram vama, ang hazi vuna, hata ki gata abo azong mangâ Moise.
15 Ata yima meid’a tchazina, ang hazi avungô ma ei akulona; ata yima vunazi sona, ang hazi mbiyo ma buzugï aduk ahinad’ina. Ang dazi ala a i hlambas sa ang hle vunang kat á hazizid’a. 16 Wani abuyomi ngolo a le yam mba ad’enga, a song vunangû, a hum nga gat manga d’uo mi.
17 Azi noî á ge yazi kä avorongû, a mar rei yam ahle suma djivi suma ang nga lazi kazina, a le yam mba ad’enga, kur so vun mazina a man sana avorozi tu á hulong kur magom mazid’a. Wani ang Alo ma nga vat hurung ngei atogo za’â, ma sumad’a ma we hohowa sumina, ma hurung nga zal atogo zak kuo na, ma djivi ma kal teglesâ, ang arazi nga woi d’i. 18 Ata yima a yor kaweina gor amuhlîna, a dala: Wana nalo mei ma buzugi woi avo Ezipte-na, a ngulung ngola heî. 19 Yam we hohou mang nga kal teglesa ang arazi nga woi abagei hur fulâ d’i. Ang arazi nga bei tinizi d’ugula avorozi gongzong kur tit mazi d’a faleid’a d’i, ang arazi nga bei tinizi akud’a avorozi gongzong á b’o lovota woi avorozi kur tit mazi d’a andjeged’a d’uo mi.
20 Ang hazi Muzuk mang ma djivina á mbud’uzi suma ned’a, ang d’elezi nga man ma ang hazizi á ted’ina d’i, ang hazi mbina yam vunazi ma sona mi. 21 Ang ngomozi abagei hur fulâ bizad’a dok fid’i; va tu pî mi kid’agazi nga d’i, baru mazi mi tumus nga woi d’i, asezi mi hop nga d’ad’amrak kuo mi.
22 Ang hazi leud’a kandjaf suma á b’rawat abo taziya. Azi te yam ambas sa Hesbon nda Sihon mi te kata, yam ambas sa Basan nda Ok mi te kata mi.
23 Ang zuluzi grozina d’igi tchitchiud’a na, ang kalazi yam ambas sa ang de kat ala ang mba hat mabuyozi á te kad’u d’a. 24 Grozina a te yam ambas ndata; suma Kanan-na ang gazi yazi kä avoroziya, ang hazizi aboziya, azi kamulei mazina ki suma yam ambasina mi tala azi le vama huruzi mina ki sed’eziya d’a. 25 Azi yo azì ma nglo ma a minim ad’enga ngunguna kandaga d’a tub’ad’a mi, a yo azì ma nglo ma nga oîd’a kahle suma djivinina, golongeîna, guguzlud’a, agu olifâ kagu ma vuta ablaud’a mi. A te, a hoba, a d’ora, a kak kur duzîd’a ni yam djivi mang nga kal teglesa.
26 Hina pet pî, a tchol a kak djangûna ki sed’engû, a mbut azigazi mi gat manga, a tchi mang suma djok vun suma a nga dazi teteu ala a hulongî gevengû na woyo, a he tazi á le sun nda ndjendje d’a kal teglesa avorongû.
27 Ni kayam ndata ba, ang arazi abo mazi suma djangûna, a lazi ndaka. Wani ata yima azi nga kur ndakina, a tchi kangû, ang tang humuzï akulo dei. Yam we hohou mang nga ngola, ang hazi suma a prud’uzi woi abo mazi suma djangûnina.
28 Ata yima azi nga kur halasina, a hulong le tchod’a avorongû. Ni hina ba, ang arazi abo mazi suma djangûna; a te kaziya. Wani a hulong a tchi kang kua d’ei, ang tang humuzï akulo d’ei, yam we hohou mang nga ngola, ang sud’uzi woi yang dodogo.
29 Ang ngobozi á hulong ata gat manga, wani azi nga i avogovok ki yam mba ad’enga, a hum nga gat manga d’i, a nga le tchod’a, a noî vun mang ma he ma sana le mi le sunda kamu ba, mi kak karid’ina woyo. A nga yo djedjerezi akulo avorongû, a nga b’al yazi woyo, a hum nga zla manga d’i.
30 Ang ve tang ki sed’ezi kur bizad’a ablaud’a, ang gigid’ezi ki Muzuk mangâ ki mang suma djok vuna mi. Wani azi tin nga humazi d’i. Ata yi máma ang hazi woi abo andjaf suma dingâ. 31 Wani yam we hohou mang nga ngola, ang dabazi nga woi tchid’a d’i, ang arazi nga woi d’uo mi, kayam angî Alo ma sumad’a, ni ma we hohou sumina mi.
32 Ki tchetchemba, ang Alo mamina, angî ma ngolâ, angî ma sib’ika, angî ma kal papana, angî ma nga ngom vun mang ma djindina, angî ma nga mi we hohowa sumina, ar ang gol ndak ka nga d’i lamid’a d’igi vama gor go hina d’i, nala, ndak mamid’a ki d’a amulei maminid’a ki d’a hi suma nglo maminid’a ki d’a hi suma ngat buzu maminid’a ki d’a hi suma djok vun maminid’a ki d’a habuyomi ki sum maminid’a pet ta ami fad’ï kur atchogoid’a hamulei suma Asiri-nid’a dei gak inid’a. 33 Angî d’ingêr kur ahlena pet suma a mba kamina, kayam angî ma d’engzengâ, wani ami lami tchod’a. 34 Amulei mamina, suma nglo mamina, suma ngat buzu mamina kabuyomi a tin nga humazi yam gat manga d’i, a tin nga humazi djivid’a yam vun ma he mangâ d’uo mi na, yam ngop pa ang ngobozid’a d’uo mi. 35 Kid’a azi nga kaka kur amul mazid’a yam ambas mazid’a tua d’a, a nga aduk ahle suma djivi suma ablau suma ang hazizina, a nga yam ambas sa bibini d’a tub’a d’a ang hazizid’a. Wan pî, a lang nga sun ndi, a ar nga sun mazi d’a tcho d’a a nga lata woi d’uo mi.
36 Gola! Ini ami nga ni kur magomba! Ami nga ni kur magomba yam ambas sa ang hat mabuyomi kayambala a le furîd’a kahle mat suma djivina d’a. 37 Nga d’i zul ahligiyet mamulei suma ang hazi ad’enga á te kamina kayam tcho mamid’a. A nga te kami ki d’uwar mamina kur min mazid’a. Ami nga kur ndak ka ngola mi.
Suma a he tazi á ngom Gata
38 A de kua ala: Kayam ndata, ami hami tamiya, ami djinimi vunamiya, ami b’irim kä. Mami suma avok sumina, mami suma hi Levi-na ki mami suma ngat buzuna a tin simiyêzi kur mbaktumba, a tum tampongâ kua mi.
© Azumeina Bible © Alliance Biblique du Tchad, 1999.
