Moise sun suma á d’u Kanan
1 Ma didina mi de mi Moise ala: 2 Ang sun suma á d’u ambas sa Kanan nda an nga ni hat mi Israel-lîd’a. Agi sunugi suma ad’u andjafâ habuyozina gagang, agi sunugi ni suma nglo suma avok sumina.
3 Ni hur ful ma Paran-na ba, Moise mi sunuzi d’igi Ma didina mi hum vuna na. Sum ndazina pet ni suma avok Israel-lîna. 4 Simiyêzi ba wana:
Ma ad’u andjafâ hi Ruben-nina ni Samuwa Zakur goroma;
5 Ma ad’u andjafâ hi Simeon-nina ni Safat Hori goroma;
6 Ma ad’u andjafâ hi Juda-nina ni Kalep Jefune goroma;
7 Ma ad’u andjafâ hi Isakar-rîna ni Jigal Josef goroma;
8 Ma ad’u andjafâ hi Efraim-mina ni Ose Nun goroma;
9 Ma ad’u andjafâ hi Benjamin-nina ni Palti Rafu goroma;
10 Ma ad’u andjafâ hi Zabulon-nina ni Gadiyel Sodi goroma;
11 Ma ad’u andjafâ hi Josef azi ki Manase-nina ni Gadi Susi goroma;
12 Ma ad’u andjafâ hi Dan-nina ni Amiyel Gemali goroma;
13 Ma ad’u andjafâ hi Aser-rîna ni Setur Mikayel goroma;
14 Ma ad’u andjafâ hi Neftali-nina ni Nabi Vofsi goroma;
15 Ma ad’u andjafâ hi Gad-nina ni Gewel Maki goroma.
16 Wana ni simiyê suma Moise mi sunuzi á d’u ambasina. Mi tin Ose ma Nun goromina simina ala Josue.
17 Moise mi sunuzi á d’u ambas sa Kanan-nda, mi dazi ala: Agi igi ni ki lovot ta abo ma sutnid’a. Bugola, agi djagagi akulo yam ahuniyôna. 18 Agi gologi ambasa na ni ti ni nana, suma kurutna a nad’enga d’oze a namangeîd’a, a nakid’eid’a d’oze a nablaud’a zu? 19 Agi i gologiziya, le nambas sa djivid’a d’oze d’a tchod’a, le suma nga kaka kurutna a ni kur kangâ d’oze kur gulumun ma ad’eng ma ngunguna. 20 Agi i gologiziya, nandaga d’a tub’ad’a d’oze d’a bei tub’ad’a, aguna nga kua d’oze mi nga kua d’uo zu? Agi igiya, agi vagi tagi ad’enga, agi mbagi ki vud’agu ma yam ambas ndatina abogiya. Kayam ni yima a tin ad’u dut guguzlud’ina.
21 Sum ndazina a i á d’u ambasa, a tinï ad’ud’a hur ful ma Tisin-na dei gak a mba Rehop go ki Hamat. 22 A hle lovot ta abo ma sutnid’a, a i gak a mbaza Hebron ata yima Ahiman, Sesai ki Talmai Anak groma a nga kuana. Hebron a minit ni bizad’a kid’iziya avok Sowan nda Ezipte-d’a. 23 Azi i gak a mbaza kur hor ra Eskol-la. Ata yi máma azi ka abo guguzlud’a kadezet ma vuta. Suma mbà a hlat kaguna, a yo vud’agu grenatna ki vud’a tuluma mi. 24 A yi yi máma ala hor ra Eskol-la, yam ades guguzlu d’a Israel-lâ a kata.
Suma a sunuzina a mba
25 Suma Moise mi sunuzi á d’u ambasina a leï burâ dok fid’i, a mba. 26 Kur mba mazid’a, a i gen Moise azi ki Aron kablaud’a hi Israel-lîd’a avo Kades hur ful ma Paran-na, a dazi zlad’a yam ahle suma azi wazina pet, a tagazi vud’agu ma yam ambas ndatina mi. 27 Wana ni zla d’a azi dat mi Moise-sa:
Ami mbamiza yam ambas sa ang sunumi kata. Gagazi, ambas ndata nambas sa ambira ki mbul ayuma a nga sor kä kuad’a. Wana ni vud’agu ma katna mi.
28 Wani suma a nga kaka katna a ni suma sib’ika, azina ni nguid’a ki gulumun ma ad’eng ma ngunguna, azina kal ngola heî mi. Ami wami Anak groma ki irami mi. 29 Suma Amale’â a kak nga abo ma sutna, suma Het-na ki suma Jebus-sâ ki suma Amor-râ a nga kaka yam ahuniyôna, suma Kanan-na a nga kaka go kalum ma ngolâ avun alum ma Jurdê-na mi.
30 Kalep mi seng suma a nga ka ad’u Moise-sâ, mi dala: Ei ïgiya! Ei mba hlei ambas ndata, kayam ei mba kuzi kad’u!
31 Wani suma a i ki sed’ema a dum ala: Ei ndak á i duri ki sum ndazina d’i, kayam azi ad’enga kaleya!
32 A de ki delezi akulo avok Israel-lâ yam ambas sa azi d’ud’ï d’a ala: Ambas sa ami tid’imi kat á d’uta nambas sa nga d’i tchi suma a nga kaka katna woid’a. Suma katna pet suma ami wazina ni suma fuyogeina. 33 Ami wami suma fuyogeina Anak groma nandjaf suma fuyogeina, ami golomi tami ni d’igi djera na avoroziya; azi tazid’a a golomi ni d’igi djera na avorozi mi.
© Azumeina Bible © Alliance Biblique du Tchad, 1999.
