Ablau suma a noî á i Kanan
1 Ablau Israel-lâ pet a nde tchina ki delezi akulo kur andjege ndata gak yina fo. 2 Ablau suma Israel-lâ pet a nde gureî yam Moise azi ki Aron, a dazi ala: Ami bomiza adjï navo Ezipte ni hotei, d’oze bomi nabagei hur fulâ ka hî pî ni hotei mi! 3 Ni kayam me ba, Ma didina mi buzugumï á imi kur ambas ndata á tchami woi kayî ma durâ ge? Ni kayam me ba, amiyômina ki gromina a mbut vama tchid’a mi ge? Le ei hulongeî ni Ezipte pî ni hotei d’uo zu?
4 A de tazi ala: Ei tini sa avorei tu, ei hulongeî Ezipte.
5 Moise azi ki Aron a puk kä ki irazi andaga avok ablaud’a hi Israel-lîd’a. 6 Josue Nun goroma ki Kalep Jefune goroma suma aduk suma a i d’uï ambasina, a haû baru mazina woyo, 7 a de mablau Israel-lâ ala: Ambas sa ami tid’imi kat á d’ud’id’a nambas sa djivi d’a kal papad’a. 8 Le Ma didina mi wei hohoweya ni, mi mba kalei kur ambas ndata, mba mi heizi mi. Ambas ndata nambas sa ambira ki mbul ayuma a nga sor kä kuad’a. 9 Wani agi sogi vuna á kak djangûna ki Ma didina d’i, agi lagi mandara suma kur ambas ndatina d’uo mi, kayam azi mba mbut ni te meina. Ma ndjunuzi nga d’i, wani Ma didina mi nga ki sed’eya. Kayam ndata, agi lazi mandarazi d’i.
10 Ablau d’a peta ti dala: Ei duruzi kahinad’a á tchazi woyo. Ata yi máma na wat subura hi Ma didinid’a ti b’o woi ir Israel-lâ yam zlub’u d’a ngaf tad’a.
Moise tchen hur ma vata yam suma
11 Ma didina mi de mi Moise ala: Sum ndazina a mba son vunan hina gaga’î mindja ge? Ahle suma simat suma an nga ni lazi adigazina hina pet pî, azi nga he gagazid’a kan nduo hina gaga’î mindja ge? 12 An nga ni tumuzi ki tugud’ei d’a tcho d’a tchi matna ni dabazi woyo, an mba ni lang andjaf ma ngol ma kalazi kablaud’ina, ma kalazi ki sib’ikina mi.
13 Moise mi de mi Ma didina ala: Ezipte-na a wala ang yoï sum mangâ woi adigazi kad’eng manga, 14 a de zla ndata mi suma kur ambas ndatina. Kayam ndata, azi hum ala ang Ma didina nga aduk sum mangâ, ang tagazi tang ira ki ira, ang tin d’ugul manga akulo kaziya, ang nga tit avorozi falei kur d’ugul la tchola gongzonga, ang nga tit andjege avorozi aduk aku d’a tchola gongzonga mi. 15 Le ang tchi sum mangâ woi d’igi sama tuna na ni, suma a hum zla mangina a mba dala: 16 Ma didina ad’engêm ndak nga á kal sum ndazina kur ambas sa mi gunuzi tam kata d’i. Ni kayam ndata ba, mi dabazi woi abagei hur fulâ wana!
17 Ki tchetchemba, an nga ni tchenengû, ar sib’ik manga ti nde woi pid’ak d’igi ang de na ala: 18 An ni Ma didina! An ni ma nga ni mbut ayîna atogo d’uo na, an ni ma djivi manda kal teglesâ, an ni ma nga ni vat hurun ndei yam tchilad’a ki murud’umba hi sumid’a, wani an ni ma nga ni ar sama le tchod’a bei ka sariyad’a kam mbuo na, an ni ma ngop grod’a yam tchod’a habuyod’a gak kur atchogoi d’a hindid’a ki d’a fid’id’ina mi.
19 An nga ni tchenengû, ang vat hurung ngei yam tchod’a hi sum mangîd’a yam djivi mang nga ngola d’igi ang vad’ï hurung ngei kazi kur buzuk mazi d’a Ezipte-d’a dei gak ini na.
20 Ma didina mi dum ala: An nga ni vat hurun ndei kazi d’igi ang de na. 21 Wani gagazi, an ni Ma bei matna, subur manda mba d’i oî yam andagad’a pet mi. 22 Suma pet suma a we subur manda kahle suma simat suma an lazi avo Ezipte kabagei hur fulâ suma a kugun ndei yazi dogo suma a humun nga vunan nduo na, 23 sum ndazina pet a mba wambas sa an gun tan kat mabuyozi ngolo á hazizid’a d’i. Azi pet suma a golon isâ a mba wat ti. 24 Wani azong mana Kalep ma nga oîd’a ki muzuk ma dingâ ma nga mi tit yam zla mandina, an mba ni kalam yam ambas sa mam d’uta, andjavam mba mi tat djona mi. 25 Suma Amale’â ki suma Kanan-na a nga kaka kur hora. Ndjivin wani, agi hulongôgi kazigagiya, agi igi hur fulâ kur lovot ta i avun alum ma ngol ma Tchereunid’a.
Ma didina mi ngop sum mama
26 Ma didina mi de mi Moise azi ki Aron ala: 27 An mba ni ar ablau d’a tcho ndata a gureî kan hina gaga’î mindja ge? An hum gureî d’a Israel-lâ a guruyôt kanda. 28 Agi dazi ala: Ma didina mi dala: Gagazi, an ni Ma bei matna, an mba ni lagi d’igi agi guruyôgi human na. 29 Agi pet suma ndumugi bizagi dok mbà yam vahlâ d’oze kal dok mbà yam vahl suma a guruyôgi kana, mad’agi mba mi sam kä woi abagei hur fulâ ka hî. 30 An gun tanu, agi mba kalagi kur ambas sa an hle vunan kat ala agi kalagi kuad’a d’i. Ni Kalep Jefune goroma ki Josue Nun goroma hol ba, a mba kal kua. 31 Ni grogi suma gurei suma agi dagi kazi ala: A mba yozi magomba na ba, an mba ni kalazi kua; azi mba wambas sa agi golot isa. 32 Wani agiya, mad’agi mba mi sam abagei hur fulâ ka hî. 33 Grogina a mba pol aho’â abagei hur fulâ bizad’a dok fid’i. A mba zi aneka hi tcho magid’a kazi gak mad’agi mi dap pei abagei hur fulâ tua. 34 Agi lagi burâ á d’u ambasa ni dok fid’i, agi mba zigi aneka hi tcho magid’a bizad’a dok fid’i mi; bur ma lara pî ni ngad’a yam bizad’a gagang. Hina wani, agi mba wagi ala ni ndaka á kak djangûna ki sed’enu. 35 Ni an Ma didina ba, ni de zla ndata. An gun tanu, ni hina ba, an mba ni le kablau d’a tcho d’a ndjak vunat á kak djangûna ki sed’en wanda. Azi pet a mba sam mbei abagei hur fulâ ka hî, azi mba bo woi mi.
36 Suma Moise mi sunuzi á d’u ambasa suma kur hulong mazid’a a de zla ambasa tchod’a suma a zut ablaud’a á gureîd’a yam Moise-sâ, 37 sum ndazina, Ma didina mi tumuzi ki tugud’ei d’a tchod’a; a bo woyo. 38 Aduk suma a d’uï ambasina, Josue Nun goroma ki Kalep Jefune goroma a arî azi hol.
Suma a hulong so vun Alona kua
39 Moise mi mba ki zla ndata mi Israel-lâ pet; azi tchi ngola. 40 A tchol ki yorogo tcholola, a djak akulo yam ahinad’a, a dala: Ami wana! Ami nga imi ata yima Ma didina mi de kama, kayam ami lami tchod’a.
41 Moise mi dazi ala: Ni kayam me ba, agi tchilagi yam vun ma hed’a hi Ma didinina ge? Agi mba ndagagi d’i. 42 Ar agi igi d’i, kayam Ma didina mi nga adigagi d’i. Ar magi suma djangûna a durugi a kus kagi d’i. 43 Kayam suma Amale’â ki suma Kanan-na a nga avorogiya, a mba durugi a mba tchagiya. Kayam agi walagi woi ki Ma didina, mam mba mi i ki sed’egi d’i.
44 Wani a so vuna, a djak akulo yam ahinad’a. Wani zandu’â hi Ma didinina ki Moise a buzuk nga woi kur kangâ d’i. 45 Ata yi máma suma Amale’â ki suma Kanan suma a nga kaka yam ahina ndatina, a duruzi a tchazi gak a tchuguzi sä Horma.
© Azumeina Bible © Alliance Biblique du Tchad, 1999.
