1 Ma didina mi de mi Aron ala: Ang ki grongâ ki b’oziyong suma ad’u andjafâ hi Levi-nina, agi zigi aneka hi tchod’a pet ta suma a mba lat ata yima kud’orid’a. Ang ki grongâ agi zigi aneka hi tcho d’a suma ngat buzuna a mba lata pet mi. 2 Ang mba hud’ï b’oziyong suma hi Levi suma ad’u andjafâ habungâ, kayam azi kak ki sed’eng á ndjunung ata yima agi ki grongâ agi mba igi avun zlub’u d’a zanduk mana nga kuad’ina. 3 Azi ngom vun mang ma hed’a, a ngom ahlena hi zlub’ud’ina pet mi. Wani azi hut go kahle suma a tinizi irazi vazina d’oze ki yima ngal ahle suma ngat buzuna d’uo kayambala agi ki azi bogi woi d’uo d’a. 4 Azi mba kak ki sed’engû, a ngom ahlena hi zlub’ud’ina, a lat sunut pet mi.
Sama ding mi tchila gevegi d’i. 5 Agi ngomogi ahlena hi yima kud’orina kahlena hi yima ngal ahle suma ngat buzunina kayambala an hurun zal yam Israel-lâ d’uo d’a. 6 Gola! An man b’oziyogi suma hi Levi-na aduk Israel-lâ yam anu, an hagizi he d’a hawad’a á le sunda hi zlub’u d’a ngaf tad’id’a. 7 Ang ki grongâ agi ngomogi sun magi d’a ngat buzuna kahlena hi yima ngal ahle suma ngat buzunina kahle suma krovo bugol baru d’a ka irina pet, agi lagi sun magi d’a ngat buzuna. Wana ni sun nda an hagizi he d’a hawad’id’a. Sama ding ma mi tchila atatna, a mba tchum mbeyo.
Ahle suma a hazi mi suma ngat buzunina
8 Ma didina mi de mi Aron ala: Gola! An hang sun nda ngom he d’a hawa d’a Israel-lâ a nga handjid’a, an hangzi kahlena pet suma Israel-lâ a tinizi irazi vazina mi ang ki grongâ. A arî b’rau manga kandjavang ki iragi fafat. 9 Ahle suma a tinizi irazi vazi suma a nga handji suma a nga ngalazi kakud’a d’uo suma a mba arî mangîna ba wana: He mazi d’a hawa d’a afuta pet, ahle mazi suma ngat buzu suma zlup yam tchod’ina kahle mazi suma ngat buzu suma yam tchilad’ina. Ahle suma a tinizi irazi vazi ndazina pet a mba arî mi ang ki grongâ. 10 Agi tagizi nata yima tu ma a tinim iram vama. Andjofâ pet a taziya, a arî ahle suma a tinizi irazi vazi mi agina.
11 He d’a hawa d’a Israel-lâ a mba gazat akulo avoronda, an hangzi mi ang ki grong suma andjofâ ki grong suma aropma kua; ti arî gat ta didinda. Sama lara ma avo hatang ma yed’etna, mi ndak á tad’u. 12 An hang ahle suma avok suma a mba handjina, nala, mbul ma djivi ma kalâ pet, süm guguzlu ma ayî ma kalâ kawuna mi. 13 Ahle suma navok kur asine suma a mba handji mi an Ma didinina, a mba arî mangâ. Sama lara ma avo hatang ma yed’etna, mi ndak á taziya. 14 Ahle suma Israel-lâ a mba tinizi irazi vazi mi an ki irazi fafatna, a mba arî mangâ. 15 Ahle suma a vut avo’â pet suma a mba handjina, sana d’oze d’uwarâ, a arî mangâ. Wani ang mbut yam gor ma a vud’um avo’â ki d’uwar ma ndjendje ma a vud’um avo’â mi. 16 Le a ndak tilâ tu ni, ang mbud’uzi yazi ni ki gus sa ang ngata. Ang mba mbud’uzi yazi ni ki bege d’a hapa grama vavahl ndak ir aneka hi bege d’a a ngat á hed’a yam zlub’u d’a kud’orid’a. Bege ndata ni ir gera dok mbà. 17 Wani ang mbut yam gor amuhl ma a vud’um avo’â d’oze yam gor timi ma a vud’um avo’â d’oze yam gor b’ë ma a vud’um avo’â d’uo mi. Azi nahle suma djivi suma a tinizi irazi vazina. Ang vozi buzuwazi yam yima ngal ahle suma ngat buzuna, ang ngalazi mbuluzi vama ngal ma his ma afufuîna avoron an Ma didina. 18 Hliuna hi va mámina mi arî mangâ d’igi didi’â kab’al ma ndjufâ suma a gazazi akulona na.
19 He d’a hawa d’a a tinit irat vat ta Israel-lâ a nga handjid’a, an hangzi mi ang ki grong suma andjofâ ki grong suma aropma ki irazi fafat. Ni vun ma djin ma didin ma an djinim ki ang kandjavangâ.
20 Ma didina mi de mi Aron kua ala: Ang mba fe djo ma ted’a kur ambas sa an mba ni hagizid’a d’i; b’rau manga nga adigazi d’uo mi. An ni b’rau manga ki djo mangâ adigaziya.
Ahle suma a hazi mi suma hi Levi-nina
21 Ma didina mi de mi Aron kua ala: An he dim ma Israel-lâ a nga handjina mi suma hi Levi-na djona. Ni wurak ka yam sun mazid’id’a, nala, sun nda zlub’u d’a ngaf ta d’a azi nga lata. 22 Ar Israel suma ding a tchila atat a hle tchod’a kazi ba, a bo d’i. 23 Suma hi Levi-na a mba le sunda kur zlub’u d’a ngaf tad’a, a mba zi aneka hi tcho mazid’a mi. Zla ndata arî gat ta didinda kagi kur atchogoi magi d’a lara ge pet. Azi mba fe djo ma ted’a aduk Israel-lâ d’i. 24 An nga ni hazi djo mazina ni dim ma Israel-lâ a mba handjina. Ni kayam ndata ba, an de kazi ala azi nga ki djona aduk Israel-lâ d’uo ni na.
25 Ma didina mi de mi Moise ala: 26 Ang de mi suma hi Levi-na ala: Ma didina mi dala: Ata yima agi vagi dim ma Israel-lâ a handji mi an á hagizi djonina, agi pad’agi dima aduk ahle suma a handji dima ndazina á handjiya. 27 He d’a hawa magi ndata a mba ndumut ni d’igi suma a nga pat awuna kä avun ambid’a’â na, d’igi a pat süm guguzlud’a kä ata yima a nga mired’et kuana na mi. 28 Ni hina ba, agi tagid’a mban he d’a hawa magi d’a agi mba pad’at aduk dim ma agi mba vum abo b’oziyogi suma Israel-lîna, agi mba humî ma ngat buzuna Aron. 29 Aduk he d’a hawad’a pet ta agi mba vata, agi pad’agi ahle suma djivi suma kalâ, agi tinizi irazi vazi mi an Ma didina. 30 Fata agi pad’agi ahle suma djivi suma kalîd’a, dim ma agi mba ndumum mi suma hi Levi-nina ni d’igi awu ma a pad’am kä avun ambid’a’îna na, d’igi süm guguzlu d’a a pad’am kä ata yima mired’et kuana na mi. 31 Ata yima lara pî agi ki sum magina, agi tagiziya, kayam ni wurak magid’a yam sunda hi zlub’u d’a ngaf tad’a d’a agi nga lata. 32 Hina wani, agi mba lagi tchod’a ata yima agi pad’agi ahle suma djivi suma kalâ d’i, agi mba mbud’ugi he d’a hawa d’a a tinit irat vat ta Israel-lâ a handjid’a ndjendjed’a d’i, agi mba bogi d’uo mi.
© Azumeina Bible © Alliance Biblique du Tchad, 1999.
