Israel-lâ a kus yam suma Kanan-na
1 Amul ma Arat ma Kanan ma nga kaka abo ma sutnina, mi hum ala: Israel-lâ a hleï nga lovot ta Atarim-mba. Mi duruziya, mi yo suma dingâ magomba adigaziya.
2 Ata yi máma Israel-lâ a hle vunazi mi Ma didina ala: Le ang hami sum ndazina abomiya ni, ami mba b’lagazi aziyazi woi kakazeî.
3 Ma didina mi humuziya, mi hazi suma Kanan-na aboziya. Azi b’lagazi woi kazì ma nglona mi, a yi yi máma ala Horma.
Guguyo suma ayîna
4 Israel-lâ a tchol yam ahina d’a Hor-ra, a hle lovot ta i avun alum ma ngol ma Tchereunid’a á ngui woi keng ambas sa Edom-mba. Suma tazi tchuk susub’ok kur lovota, 5 a nde gureîd’a yam Alona azi ki Moise, a dala: Ni kayam me ba, agi buzugumï woi kur ambas sa Ezipte-d’a á tchami woi abagei hur fulâ ka hî ge? Kayam vama te nga d’i, mbiyo ma tche nga d’i, avu ma tcho máma, mi mbut avunami tchod’a mi!
6 Ata yi máma Ma didina mi sunï guguyo suma ayîna ata suma. A ed’eziya, a tchazi ablaud’a. 7 Suma a arâ a i gen Moise, a dum ala: Ami lami tchod’a, kayam ami guruyômi yam Ma didina, kang ang mi. Ang tchen Ma didina, mi yo guguyo ndazina woi atamiya. Moise mi tchen Ma didina yam suma.
8 Ma didina mi dum ala: Ang yor kawei ma hleuna hle tam d’igi gugui ma ayîna na, ang gabam akulo avun aguna. Sama lara ma guguina mi ed’ema, le mi golomu ni, mba mi sud’a.
9 Moise mi yor kawei ma hleuna guguina, mi gabam akulo avun aguna. Le guguina mi et sana ba, mi gol gugui ma kawei máma ni, mi sud’a.
Israel-lâ a i gak yam ahina d’a Pisga-d’a
10 Israel-lâ a tchol a i ve kangâ Obot. 11 A tchol Obot, a i ve kangâ Ije-Abarim hur ful ma ngagad’a ki Mowap-ma abo ma yorogona. 12 A tchol ata yi máma, a i ve kangâ kur hor ra Zeret-ta. 13 A tchol ata yi máma, a i ve kangâ avun alum ma Arnon-na abo hî. Ni mbiyo ma tchila yam andaga d’a Amor-ra ma nga mi djang hur fulîna, kayam, alum ma Arnon-na navun haga d’a Mowap-pa aduk Mowap azi ki Amor. 14 Kayam ndata, a de kur Mbaktum mba dur ayîna hi Ma didinid’a ala: Ambas sa Vahep pa kur Sufa d’a avun hora halum ma Arnon-nid’a 15 ki hor ra sulugot kä abo azì ma Ar ma avun haga d’a hi Mowap-pina... 16 A tchol ata yi máma, a i Ber. Nata yi máma ba, Ma didina mi de mi Moise ala: Ang tok suma kayam an hazi mbina.
17 Nata yi máma ba, Israel-lâ a hle sawal la wanda ala:
Ndak golonga, ndak hoba akulo!
18 Golong nga suma nglo suma avok suma a kat
ta suma nglona a tchota,
a kat ki totogo d’a tamula,
a tchot ki dunguru mazina mi.
19 A tchol hur fulâ, a i Matana; a tchol Matana a i Nahaliyel; a tchol Nahaliyel, a i Bamot. 20 A tchol Bamot, a i kur hor ra yam ambas sa Mowap pa akulo yam ahina d’a Pisga d’a ngagad’a yam fulâ d’ara.
Israel-lâ a kus yam Sihon ki Ok
21 Israel-lâ a tchuk suma sunda ata Sihon amul ma Amor-râ, a dum ala: 22 Ang arami lovota ami kalami yam ambas manga. Ami mba d’ezemi woi aduk asinena d’oze aduk guguzlud’a d’i, ami mba tchami mbiyo golonga d’uo mi. Ami mba tid’imi ni kur lovot ta ngola gak ami kalami woi yam ambas manga.
23 Sihon mi ar nga Israel-lâ lovota á kal yam ambas mamba d’i, mi tok sum mama pet. A buzuk á dur ayîna ki Israel-lâ abagei hur fulâ, a mbaza Jahas, a dur ki suma Israel-lâ. 24 Israel-lâ a durumu, a hlambas mamba, tinï ad’ud’a avun alum ma Arnon-na dei gak mba avun alum ma Jabo’â, gak mba avun hagad’a hi suma Amon-nid’a, kayam hagad’a hi suma Amon-nid’a ni haga d’a ad’eng nga ngingid’a. 25 A hle azì ma nglona hi suma Amor-rîna pet ki Hesbon kazì ma gurei ma nguyuma pet, a kak kua mi. 26 Hesbon nazì ma ngolâ hi Sihon amul ma Amor ma dur ayîna kamul ma Mowap ma avo’â. Mi hleï ambas mamba pet gak mba avun alum ma Arnon-na. 27 Kayam ndata, suma a de zla d’a d’ogola a dala:
Agi mbeyegï Hesbon,
ar agi minigi azì ma ngolâ hi Sihon-na akulo.
28 Kayam akud’a ti ndeï Hesbon,
sinat nga d’i trâ azì ma ngolâ hi Sihon-na,
ti ngal azì ma Ar-Mowap-ma woi
ki suliyom suma yam yima nding ma halum ma Arnon-na woi mi.
29 Ni vama hohoud’a kang ang Mowap!
Agi suma tuwalagi Kemos-sâ, agi bagi woyo!
Mi mbut groma ni suma ring avok suma,
mi he grom suma aropma mi Sihon amul ma Amor-râ magomba.
30 Ami yed’ezi ki yeû mamid’a,
ami b’lagami azì ma Hesbon-na woi
gak mbami kur azì ma Dibon-na,
ami b’lagami yina woi
gak mbami kur azì ma Nofa-na,
gak mbami kur azì ma Medeba-na mi.
31 Israel-lâ a kak yam ambasa hi suma Amor-rîd’a. 32 Moise mi sun á d’u azì ma Jazer-râ; a hle azì máma kazì ma nguyuma, a dik suma Amor suma kuana woyo. 33 A ar lovot ndata, a hle lovot ta i Basan-nda. Ok amul ma Basan-na mi buzuk ki sum mama pet á dur ayîna ki Israel-lâ avo Edrei.
34 Ma didina mi de mi Moise ala: Ang lum mandaram mbi, kayam an hangziya wa abong ki sum mama kambas mamba pet mi. Ang mba lumî d’igi ang le ki Sihon amul ma Amor ma kak Hesbon-na na.
35 Israel-lâ a durum ki groma ki sum mama pet. Sa mam sut nga tu d’i; a hlambas mamba mi.
© Azumeina Bible © Alliance Biblique du Tchad, 1999.
