ISRAEL-LÂ A NGA HUR FUL LA MOWAP-PA
Balak mi yi Baläm
1 Israel-lâ a ve kangâ hur ful la Mowap-pa, sä abo alum ma Jurdê-na woi hî, ngagad’a yam Jeriko d’ar.
2 Balak Sipor goroma mi wahlena pet suma Israel-lâ a lazi ki suma Amor-râ. 3 Suma Mowap-ma a le mandarâ avok Israel-lâ yam ablau mazid’a, a tchuk susub’ok avorozi mi. 4 Suma Mowap-ma a de mi suma nglo suma Madiyan-na ala: Suma ablau ndazina a mba tahle meina d’igi amuhlâ mi te hatna abagei na. Kur atchogoi ndata Balak Sipor goroma namul ma Mowap-ma.
5 Mi tchuk suma sunda gen Baläm Beyor gorom ma nga Petor avun alum ma Efrat ma yam andaga mambina, mi dum ala: Ang gola! Suma a tcholï yam ambas sa Ezipte-d’a, a hle yina woi yam andagad’a, a kak nga ngagad’a avogon hina d’ar. 6 An nga ni tchenengû, ang mbeï gandji vuna, kayam azi kalan kad’enga. Hina wani, dam an mba ni duruziya, an mba ni digizi woi yam ambasa kla. Kayam an wala sama ang b’e vunang kama, mi ka’î sama vun ma b’ed’a kama; sama ang gum vunina, mi ka’î sama vun ma ged’a kama mi.
7 Suma nglo suma Mowap-ma ki suma nglo suma Madiyan-na a iya, a yo he d’a hawad’a abozi mi sama djopa, a mbaza gen Baläm, a dum zlad’a hi Balak-ka. 8 Baläm mi dazi ala: Agi i burugi ka hî. An mba ni hagi humba yam zla d’a Ma didina mba mi dandjid’a. Suma nglo suma Mowap-ma a ar kaka avo hi Baläm.
9 Alona mi mba ata Baläm, mi dum ala: Ni suma lara ba, avo hatang hina nge?
10 Baläm mi hulong de mAlona ala: Ni suma Balak Sipor goroma amul ma Mowap-ma mi sunuzï geven á dan ala: 11 Ang gola! Suma a tcholï yam ambas sa Ezipte-d’a a hle yina woi yam andagad’a. Ang mbeï gandji vuna. Hina wani, dam an mba ni duruziya, an mba ni digizi woi yam ambasa kla na.
12 Alona mi de mi Baläm ala: Ang i ki sed’ezi d’i, ang ge sum ndazina vuna d’i, kayam ni suma a b’e vuna kazi dana.
13 Baläm mi nde yorogo, mi de mi suma nglona hi Bala’â ala: Agi igi yam ambas magid’a, kayam Ma didina mi d’elen á i ki sed’egiya.
14 Suma nglo suma Mowap-ma a tchola, a hulong gen Balak, a dum ala: Baläm mi min mba ki sed’emi d’i.
15 Balak mi sun suma nglo suma dingâ ablaud’a. Ni suma subur mazid’a kal suma mi sunuzi avo’îna. 16 A mbaza gen Baläm, a dum ala: Wana ni zla d’a ded’a hi Balak Sipor goromid’a: Ar sa mi d’eleng á mba geven ndi. 17 Kayam an mba ni mbud’ung sama suma a mba suburum ngola heîna, an mba ni lang ahlena pet suma ang mba dan kazina. An nga ni tchenengû, ang mbeï gan sum ndazina vuna.
18 Baläm mi hulong de mazungeîna hi Bala’â ala: Le Balak mba mi han ni gong mam mba oîd’a ki bege d’a hapa ki lorid’a pî, an ndak á le vama gor roze vama ngol á tchila yam vun ma hed’a hi Ma didina Alo manina d’i. 19 Ki tchetchemba, an nga ni tchenegiya, agi burugi ini ka hî; an mba ni we vama Ma didina mba mi dandji kuana.
20 Alona mi mba ata Baläm andjege, mi dum ala: D’igi sum ndazina a mba hina wani, ang tchol i ki sed’eziya, wani ang le ni vama an mba ni dang kama.
21 Baläm mi tchol ki yorogod’a, mi zlup koro mamba, mi i ki suma nglo suma Mowap-ma.
Korod’a hi Baläm-mba
22 Alona hurum zal ngola yam i d’a mi i ki sed’ezid’a. Wani malaikana hi Ma didinina tu, mi tchol hur lovota á d’elemu. Baläm mi nga kaka akulo yam koro mamba, azungeî mama mbà a nga ki sed’em mi. 23 Korod’a ti we malaikana hi Ma didinina mi nga tchola hur lovota ki mbigeu mam mba fiyaka nga pata woi abomu. Korod’a ti d’es sei kur lovota, nga d’i i aduk asuna. Wani Baläm mi wad’at á gat kur lovota. 24 Malaikana hi Ma didinina mi tchol hur lovot ta gor ra aduk asine ma guguzlud’id’a; gulumuna nga ged’a kam abo hî abo hî. 25 Korod’a ti we malaikana hi Ma didinina, ti hep sä tat ata gulumuna, ti ket sä asem Baläm ata gulumuna. Baläm mi wad’at kua. 26 Malaikana hi Ma didinina mi kal sä woi hina ndei, mi tcholza ata yima hepa mbed’et ma yina nga tala sana mi i abo ma ndjuf foze abo ma gula d’uo na. 27 Korod’a ti we malaikana hi Ma didinina, ti bur kä ad’u Baläm. Baläm hurum zal ngola, mi wad’at ki totogo mamba. 28 Ma didina mi mal vun korod’a, ti de mi Baläm ala: An langî me ba, ang wad’an hina wawat yang hindi ge?
29 Baläm mi hulong mi dat ala: Ni kayamba ndak lan ngangatid’a! Ladjï mbigeu d’a fiyaka nabonu ni, an tchak wa adjï dei!
30 Korod’a ti de mi Baläm ala: An ni koro mang nga ang nga tit ki sed’en teteu gak inid’a d’uo zu? Na ni an lang vama hina woi yan tu zu?
Mi hulong dat ala: Hawa!
31 Ma didina mi mal ir Baläm. Baläm mi we malaikana hi Ma didinina mi nga tchola kur lovota ki mbigeu d’a fiyaka nga pata woi abomu. Baläm mi tchok yam kä mi grif kä andaga ki iramu. 32 Malaikana hi Ma didinina mi dum ala: Ni kayam me ba, ang wat koro manga hina wawat yang hindi ge? Gola! An ndeï woi ná d’eleng lovota, kayam lovot ta ang hlat wanda ni lovot ta ing kur bad’id’a. 33 Korod’a ti wanu, ti d’es sei avoron d’ed’es yat hindi. Ladjï ti d’es sei avoron nduo ni, an tchang wa, an arat wa ndad’u.
34 Baläm mi de mi malaikana hi Ma didinina ala: An le tchod’a! Kayam an we nga d’ala ang nga tchola avoron kur lovota d’a d’i. Ki tchetchemba, le i manda lang nga tang djivi d’uo ni, an hulong avo.
35 Malaikana hi Ma didinina mi de mi Baläm ala: Ang i ki sum ndazina! Wani ang de ni vama an mba ni dangzina. Baläm mi i ki suma nglona hi Bala’â.
Baläm ki Balak a ngaf taziya
36 Kid’a Balak mi hum ala: Baläm nga mi djïya d’a, mi nde á d’ugulom sä kur azì ma ngol ma Mowap ma avun alum ma Arnon-na ma avun dabid’a hi haga mambina. 37 Balak mi de mi Baläm ala: An sun suma kang ala a yangîya d’uo zu? Ni kayam me ba, ang mbeï geven nduo ge? An ni ndak á mbud’ung sama suma a suburuma d’uo zu?
38 Baläm mi de mi Balak ala: Ki tchetchemba, an mba geveng wan pî, an ndak á de zla d’a lara pî d’a an min data d’i. An mba ni de ni zla d’a Alona mba mi tinindji avunan á ded’id’a hol.
39 Baläm mi i ki Balak, a mbaza Kiriyat-Husot. 40 Balak mi ngat amuzleina ki tumiyôna buzuna, mi sun hliuna mi Baläm ki suma nglo suma a mba ki sed’ema.
Baläm b’e vunam yam Israel-lâ
41 Tcha yorogod’a Balak mi ve Baläm, mi djak ki sed’em akulo ata yima a yum ala Bamot-Bäl-lâ. Nata yima a we Israel-lâ brutna.
© Azumeina Bible © Alliance Biblique du Tchad, 1999.
